Ерөнхий сайд С.Батболдод Япон улсад хийж байгаа айлчлалынхаа үеэр өчигдөр “Эрдэнэс Тавантолгой” компани болон Японы
Мицүй компаний хооронд хамтран ажиллах санамж бичигт гарын үсэг зурлаа. "Мицүй" компани нь Монголд дулааны
цахилгаан станц барих, гангийн үйлдвэр байгуулахад оролцох санал
тавиад байсан юм. Санамж бичигт гарын үсэг зурснаар Тавантолгойн
ордоос гарах коксжих нүүрсийг худалдах, худалдан авах асуудлаар хамтран
ажиллах боломжтой болж байгаа юм байна. Ингэснээр “Эрдэнэс Тавантолгой”
төрийн өмчит компани нүүрсний салбарт гурав дахь зах зээлийн орнуудад
нүүрс экспортлох боломж эрэлхийлсэн бодит яриа хэлэлцээ эхэлж байна гэж үзэж байна.
"Мицүй" компани нь одоо ч Тавантолгойн Зүүн цанхийн уурхайгаас олборлож байгаа нүүрсний тодорхой хувийг Хятадын компаниас худалдан авч байгаа бөгөөд Эрдэнэс Тавантолгой компаниас шууд худалдан авах зорилгоор хэлэлцээр хийж байгаа юм. Ерөнхий сайд Тавантолгойн төсөл дэх Японы оролцоог хангах бодлого баримталж байгаа. Нүүрс олборлох, баяжуулах болон уул уурхай, ашигт малтмалын салбарын хөгжилтэй уялдуулан төмөр замын сүлжээг барьж байгуулах талаарх томоохон төслүүдэд Японы хувийн хэвшлийн компаниудтай хамтран ажиллах сонирхолтой байгаагаа илэрхийлж байсан юм.
139 жилийн түүхтэй "Мицүй" компани нь дэлхийн 75 оронд 175 гаруй салбартай, тэдгээрт нь 40 гаруй мянган ажилтан, албан хаагч ажилладаг байна. Мөн худалдаа, үйлдвэрлэл, экспорт, импорт, олон улсын худалдаа,үйлчилгээ зэрэг бизнесийн үйл ажиллагааг төмөрлөг, гангийн үйлдвэрлэл, ашигт малтмал, бүх төрлийн машин механизм, электрон техник, мэдээлэл харилцаа холбоо, эрчим хүч, өргөн хэрэглээний бүтээгдэхүүний үйлдвэрлэл, худалдаа аж үйлчилгээ, санхүүгийн зах зээл болон тээврийн салбарт үйл ажиллагаа явуулдаг байна. Гэхдээ ашигт малтмал эрчим хүч болон дэд бүтцийн салбар нь тус компанийн цаашдын хөрөнгө оруулалтын төлөвлөгөөнд чухал байр эзэлдэг гэж эх сурвалж мэдээллээ
