УИХ-ын ээлжит бус чуулганаар ганцхан асуудлыг шийдэж чадаагүй үлдээсэн нь Орон нутгийн сонгуулийн тухай хуульд өөрчлөлт оруулах байсан. МАН болон АН-ын бүлгийн гишүүд чуулганы сүүлийн өдөр тав, таван төлөөлөгч гаргаж хуралдсан ч тодорхой зөвшилцөлд хүрээгүй гэж мэдэгдэж байсан юм. Тэгвэл УИХ-ын дэд дарга Н.Энхболд өнөөдөр дээрх хуулийг бүхлээр нь боловсронгуй болгохын тулд Үндсэн хуульд нэмэлт, өөрчлөлт оруулах шаардлагатай байгаа, үүний тулд ард нийтийн санал асуулга явуулахаар МАН, АН санал нэгдсэн гэж мэдээллээ. Өнөөдөр хүчин төгөлдөр үйлчилж байгаа Орон нутгийн сонгуулийн тухай хуулинд УИХ болон Орон нутгийн сонгуулийг зэрэг явуулах гэж заасан байгаа. Гэсэн ч хугацаа бага үлдсэн тул сонгуулийг зохион байгуулах хүн хүч, техник хэрэгсэл гээд олон асуудал тулгарч байгааг УИХ-ын дэд дарга Н.Энхболд хэлж байлаа. Тэрбээр “Энэ хуульд өөрчлөлт оруулах нь зөвхөн зэрэг эсвэл тусад нь явуулах тухай асуудал биш. Өөр олон хууль эрх зүйн зөрчил үүсэх гээд байгаа болохоор Үндсэн хуульд нэмэлт өөрчлөлт оруулах шаардлага гарч байна. Тиймээс МАН Үндсэн хуульд нэмэлт, өөрчлөлт оруулах талаар ард нийтийн санал асуулга явуулах санал гаргасан” гэв. Үүнийг АН-ын УИХ дахь бүлгийн гишүүд ч дэмжсэн байна.
УИХ-ын гишүүн Д.Балдан-Очир “Үндсэн хуулинд орон нутийн удирдлагуудын бүрэн эрхийг хугацаа дөрвөн жил байх ёстой. Гэтэл зургаадугаар сард УИХ-ын сонгуультай зэрэг явуулна гэхээр бүрэн эрхийн хугацаа нь 3,5 жил болчихоод байгаа юм. Тэгээд ч нэг нь төрийн эрх барих, нөгөө нь цэвэр нутгийн өөрөө удирдах ёсны байгууллага тул хоорондоо зарчмын ялгаатай” гэв. Тиймээс ирэх хаврын чуулганаар Үндсэн хуульд нэмэлт, өөрчлөлт оруулах тухай ард нийтийн санал асуулга явуулах эсэх нь хамгийн эхний хэлэлцэх асуудал байх аж.
Сэтгэгдэл (1)