Төрийн ордонд болж байгаа МоАХ-ны залуучуудын анхдугаар чуулганд хот, хөдөөгийн 800 гаруй залуучууд оролцож байна. Тэд тус холбооны үйл ажиллагаа болон залуучуудын амьдралд тулгамдаж байгаа асуудлуудыг хэлэлцэж байгаа юм. Энэ дунд Хэнтий аймгийн төлөөлөгч МАН-ын нарийн бичгийн дарга, НАМЗХ-ны тэргүүн Л.Оюун-Эрдэнийг хурц шүүмжлэв. Тэрбээр “Намын дэргэдэх залуучуудын байгууллага олигархуудыг хамгаалагч болж хувирчээ. Тухайлбал, НАМЗХ-ны тэргүүн Л.Оюун-Эрдэнэ сүүлийн үед дарга нарыг хамгаалсан утгатай зүйл ярих болж, үүгээрээ ч тушаал дэвшдэг бололтой. Боловсролтой залуу хүн байж аймгийн засаг дарга нарыг АТГ шалгаж байгаа нь орчин цагийн хэлмэгдүүлэлт гэсэн байна. Аймгийн засаг дарга нар бол шалгуулах ёстой хүмүүс” гэв. Мөн намын дарга нарынхаа саналыг зөвшөөрөхгүй, шүүмжилдэг хүмүүсээ хавчиж шахаж байдаг нь нууц биш гэлээ. Хэнтий аймгийн төлөөлөгч тус аймагт хамгийн их тулгамдаж байгаа нь хүйсийн тэгш байдал болоод байгааг хэлсэн юм. Аймгийн төв, сумдад эрчүүд нь мал дээрээ үлдэж, охидууд нь Улаанбаатар хот руу сургуульд сурахаар явж байгаа. Охидууд нь хотод суурьшаад үлддэг болохоор сумд баахан эхнэр хайсан эрчүүд үлддэг. Тиймээс хөдөөгийн залуучуудад зориулсан тусгай бодлого гаргах хэрэгтэйг уриалсан юм. Залуучууд МАН-ын удирдлагуудаас гадна АН-ын дээд албаны зарим хүмүүсийг ч шүүмжилсэн. Дундговь аймгийн АН-ын дарга гэхэд л энэ суудлыг авахын тулд 100 сая төгрөг зарцуулсан аж. Сонгууль дөхөөд ирэхээр улс төрийн наймаа хийдэг байдлыг зогсооё гэж Дундговь аймгийн төлөөлөгч уриалав.
“Хэрэв ирэх сонгуулийн дүнг МАН дахин будлиантуулах юм бол зэвсэг барин тэмцэхээс өөр аргагүй” гэж Хэнтий аймгийн төлөөлөгч хэлсэн нь хурлын уур амьсгалыг тодорхойлж байлаа.
