Монголд сураггүй алга болсон АНУ-ын иргэнийг хөнөөсөн байжээ. Нью-Жерси мужийн Моунт Олив хотын харьяат, 45 настай Жон Мартин Кийнийн цогцос олдсон талаар Нью жерси Хиллт өнгөрсөн даваа гаригт орон нутгийн цагаар 17 цаг 37 минутад нийтэлсэн байх юм.
Манай сайт мэдээлэл авсан даруйдаа Монгол дахь АНУ-ын элчин сайдын яамны олон нийттэй харилцах албаруу өдөржингөө залгасан боловч утсаа авахгүй байсан юм. Монголд болсон хэргийг хилийн чанадад нийтэлсэн байхад манай улсад энэ талаар ямар ч мэдээлэл алга байна.
Сайтад мэдээлснээр Жон Мартины ээж Маргарет Кийнлүү өнгөрсөн даваа гаригийн 22 цагийн үед Монгол дахь АНУ-ын элчин сайдын яамаас залгаж хүүгийнх нь цогцос олдсоныг мэдэгджээ. 70 настай Маргарет Кийн: “Элчингийнхэн миний хүүг алсан алуурчинг барьсан гэсэн. Сэжигтэн эмэгтэй хүн байсан бөгөөд Мартиныг монголд бизнес эрхлэхээр очсоноос хойш найз болсон байсан” гэв.
Хатагтай Маргарет хүүгийнхээ цогцсыг ирэхийг хүлээж байгаа бөгөөд тэр үед хэргийн талаар илүү их мэдээлэл авна гэж найдаж буйгаа сайтын сэтгүүлчдэд хэлжээ.
Жон Мартин Кийн нь Дархан хотоос нэгдүгээр сарын 6-ны өдөр гэрийнхэндээ мэйл явуулснаасаа хойш сураггүй болсон байна.
Тиймээс ар гэрийнхэн нь түүнийг барьцаалагдсан байж болзошгүй хэмээн санаа зовниж АНУ-ын Төрийн Департамент болон Монгол, Хятад дахь Элчин Сайдын Яамдыг сайтар идэвхитэй ажиллахыг шаардаж байсан аж. Мөн Моунт Оливын ахлах сургуулийг хамт төгссөн найзууд нь түүнийг фейсбүүкээр хайж байсан байна. Талийгаач хамгийн сүүлд 12 дугаар сарын 24-нд фейсбүүкт холбогдсон байв.
Жон Мартины ээж Маргарет Кийн Монгол дахь АНУ-ын элчин сайдын яамны фейсбүүк хуудсанд хүүг нь олж өгөөч хэмээн бичсэн байна.
Жон Мартин нь 45 настай бөгөөд “Мак Гуер” агаарын хүчинд алба хааж байгаад тэтгэвэрт гарснаас хойш Тайваньд эхнэр хүүхдийн хамт амьдарч байсан байна. Тэрбээр өнгөрсөн жил Монголд бизнесийн санал хүлээн авч Дархан хотод ирсэн гэнэ.
Хүүгийн маань сүүлийн хүсэлт “Мак Гуер” агаарын хүчний баазд оршуулагдах байсан юм гэж ээж нь ярьсан байна. Яагаад, хэзээ энэ хүсэлтээ хүү нь ээждээ хэлснийг сэтгүүлчид тодруулаагүй байна.
Жон Мартин Кийнийг хэн, яагаад хөнөөсөн, хэзээ, хаанаас цогцсыг нь олсон, сураггүй алга болсныг нь мэдээд Монгол дахь АНУ-ын элчин сайдын яам ямар нэгэн арга хэмжээ авсан уу? зэрэг олон асуулт хариултгүй байна.
Энэ тухай манай сайт эргэн мэдээллэх болно.
Д.Идэржаргал
