Энэ сарын 14-нд цагдаагийн экс дарга нарт холбогдох шүүх хурал болсон. Уг шүүх хурлын үеэр тэднийг цагдан хорих шийдвэр гаргахад цагдаагийн бие бүрэлдэхүүн ажил хаяна гэдгээ мэдэгдсэн. Энэ талаар ЦЕГ-ын Захиргааны удирдлагын хэлтсийн дарга, цагдаагийн хурандаа Ц.Арвинбуудайгаас тодрууллаа. -Цагдаагийн экс дарга нарыг хорих шийдвэр гаргахад цагдаагийн бие бүрэлдэхүүн ажил хаяна гэдгээ мэдэгдсэн. Энэ талаар ямар нэгэн тайлбар өгөөч?
-Цагдаа нар ажил хаяна гэдэг ташаа мэдээлэл. Хэн ямар зорилгоор тийм мэдээлэл гаргасныг гайхаж байна. Ажил хаяхыг хуулиар хориглосон байдаг учраас ажил хаяна гэдэг нь худлаа мэдээлэл.
-Шүүх хурлын үеэр 50 60 цагдаа ирсэн байсан. Энэ нь шүүх хуралдаанд нөлөөлөх гэсэн хэмээн ярьж байсан?
-Тийм зүйл байхгүй. Хэвлэлээр л шүүх хуралдааны үйл ажиллагааг тасалдуулах зорилгоор очсон гэх мэдээлэл гарсан байсан. Цагдаагийн алба хаагчид цагдаагийн байгууллагын тухайн хууль, шүүхийн тухай хуулиар шүүх хуралдаан болон шүүгчдийн аюулгүй байдлыг хангах үүднээс чиг үүрэгтэй цагдаа нар ажилласан. Хэв журмыг хамгаалахаар ажилласан.
-Тэгвэл Ч.Хосбаяр шүүгч рүү жагсагчид дайрахад нэг ч цагдаа хамгаалаагүй шүү дээ?
-Одоогоор шүүх хуралдааны дараа шүүгчийн биед халдаж, шийдвэр гаргахад хөндлөнгөөс нөлөөллөө гэх гомдол санал ирээгүй байна. Зурагтаар харахад манай дүрэмт хувцастай цагдаа замыг нь чөлөөлж байсныг харсан. Мөн ямар нэгэн зохион байгуулалттай арга хэмжээ авч ажиллаагүй.
-Цагдаагийн экс дарга нар эмнэлэгт байгаа. Эмнэлэгт байх хугацаанд нь цагдаагийн алба хаагчид хамгаалалтад гарч байгаа гэсэн үнэн үү. Ер нь биеийн байдал нь хэр байгаа вэ?
-Биеийн байдал нь ерөнхийдөө муу. Эрчимт эмчилгээний тасагт эмчилгээнд байгаа. Дөрвөн цагдаагийн алба хаагч хамгаалалтад гарч байгаа.
Б.Чимэг
