Өнгөрсөн нэгдүгээр сарын 27-ны өдөр ХЗДХЯ-ны сайд Ц.Нямдорж Улсын ерөнхий прокурор Д.Дорлигжавд цагдаагийн экс дарга нарыг цэргийн гэмт хэргээр зүйлчлэн яллах нь буруу хэмээн өргөдөл гарган, албан бичиг хүргүүлсэн билээ. Албан бичгийн хариуг Улсын ерөнхий прокурор Д.Дорлигжав өнөөдөр өглөө. Уг бичигт “Прокурорын байгууллагад хандаж өргөдөл шилжүүлэх тухай 2012 оны нэгдүгээр сарын 27-ны өдөр таны ирүүлсэн тоотод дурьдсаны зарим асуудлын талаар дараах хариултыг өгч байна.
Та албан тоотдоо Цагдаагийн байгууллагын удирдлага нарт холбогдуулан эрүүгийн хэрэг үүсгэн шалгаж байгаа гэмт хэргийн зүйлчлэлийн асуудалд туйлын нухацтай анхаарлаа хандуулж зөвхөн хуулийн хүрээнд шударга шийдвэр гаргахыг хүссэн байна.
Дээрх хүмүүсийн үйлдэлтэй холбогдуулан шалгагдаж байгаа хэргийг мөрдөн байцаах болон прокурорын байгууллага хуулийн хүрээнд нарийн судлан зүйлчилж яллах дүгнэлт үйлдэн шүүхэд шилжүүлсэн.
Энэ хэргийн зүйлчлэлийн талаарх эрх зүйн үндэслэл шүүх хурлын үеэр дэлгэрэнгүй тодорхой яригдан шийдвэрлэгдэх тул хэргийг шийдээгүй байхад урьдчилан тайлбар өгөх боломжгүйг та ойлгоно гэдэгт найдъя” гэжээ.
Б.Чимэг
