Ойрын өдрүүдэд нийслэлд +4 хэм хүртэл дулаарч байв. Харин хаврын тэнгэр олон ааштайг сануулж, маргааш нөгөөдрөөс зарим нутгаар цас орж, сэрүүсэх тул нимгэн хувцас шүүрэхээ түр азнаарай.

Ус цаг уурын хүрээлэнгээс гаргасан цаг агаарын тав хоногийн урьдчилсан төлвөөс харахад энэ сарын 17-ноос төв, зүүн зүгийн нутгийн зарим газраар, 19-нд баруун зүгийн нутгийн баруун хэсгээр, 20-нд баруун болон төвийн нутгийн хойд хэсгээр бага зэргийн цас орж, зөөлөн цасан шуурга шуурна. Салхи 19-нд Алтайн салбар уулсаар, 20-нд нутгийн баруун хагаст секундэд түр зуур 16-18 метр хүрнэ.

Увс нуур, Дархадын хотгор, Идэр, Тэс голын сав газраар шөнөдөө 29-34 градус, өдөртөө 13-18 градус, Хангай, Хөвсгөлийн уулархаг нутаг, Хараа, Ерөө, Туул, Тэрэлж, Хэрлэн, Халх голын сав газраар шөнөдөө 20-25 градус, өдөртөө-6-11 градус, говийн бүс нутгаар шөнөдөө 10-15 градус хүйтэн, өдөртөө нэг градус дулаанаас дөрвөн градус хүйтэн, бусад нутгаар шөнөдөө 16-21 градус, өдөртөө 3-8 градус хүйтэн байна. 19-нөөс нийт нутгаар дулаарах аж.

Амралтын өдрүүдэд Улаанбаатарт өдөртөө таван градус хүйтэн байх бөгөөд даваа гаригаас хоёр, мягмарт таван градус дулаан байна.