АНУ-ын иргэн Жон Мартин Кийныг алсан хэргийн сэжигтний талаарх мэдээлэл америкийн сайтад гарчээ.

Талийгч Жон Мартин Кийны сайн найз Остандар “Кийн Тайваньд байхдаа нэгэн монгол бүсгүйтэй сайн найз болсон. Бүсгүй Кийнд Монголын нийслэл Улаанбаатар хотод “Шүрэн гүүр” /Coral Bridge/ нэртэй зочид буудал, ресторан баръя гэсэн санал тавиад зочид буудлыг ажиллуулах төлөвлөгөө болон зураг төслийн ажлыг танилцуулж байсан гэсэн” хэмээн мэдэгдсэн байна.

Сайтад мэдээлснээр сэжигтэн эмэгтэй Б талийгч Кийныг эхлээд зочид буудлын ажилд нь туслахыг хүссэн байна. Дараа нь Кийнээс өөрийг нь дэмжиж 10 мянган долларын хандив өгөхийг хүсч, хамтран ажиллах санал тавьжээ.

Талийгч Жон Мартин Кийн ээждээ “Монголд хэрэгжүүлэх бизнесийн хамтрагч нь монголын олны танил гэр бүлийн хүүхэд. Түүний аав нь МУИС-д ажилладаг, физикийн ухааны профессор хүн” хэмээн ярьж байжээ.   

Талийгч нэгдүгээр сарын зургааны өдөр ээжрүүгээ ярьсан нь хамгийн сүүлд ээжтэйгээ холбогдсон хэрэг болсон байна.

Тэрбээр ээжрүүгээ залгаад Монголд -40 градусын хүйтэн байна. Гэхдээ бүх зүйл сайн байгаа гэсэн байна. Үүний дараа ээж нь сэжигтэн эмэгтэй Б-тэй ярьсан байна. “Тэр нэлээн орос аялгатай” ярьж байсан гэж хатагтай Маргарет Кийн хэвлэлд ярьсан байна.  

Хүү минь надад бизнесийн хамтрагч эмэгтэйг хууль ёсоо сайн сахидаг хүн гэж итгэж байгаагаа хэлсэн. Тэгээд л бид баяртай гэж хэлээд салсан гэв.

Кийн сураггүй алга болохоосоо өмнө өдөр бүр мэйл, фейсбүүк эсвэл утсаар ээжтэйгээ холбогддог байжээ. Гэвч нэгдүгээр сарын зургаанд утсаар ярьснаасаа хойш сураггүй алга болсон аж.

Талийгчийн ээжрүү нь сэжигтнээр татагдсан эмэгтэй Б “Кийн ээжтэйгээ холбогдож чадахгүй байгаадаа уучлал гуйж байна лээ” хэмээн талийгчийн өмнөөс холбогдож байжээ. Сайтад хэзээ ингэж холбогдсоныг нь бичээгүй байна.

Талийгч Жон Мартин Кийн Тайваньд амьдарч байхдаа Тайваний технологийн их сургуульд англи хэл заадаг байжээ. Тэнд эхнэр Хуэй Йенгтэй уулзаж /англи нэр нь Нэнси Ли/ 12 настай Каролин гэдэг охинтой болсон байна. Хатагтай Кийн хүүгээ 2006 онд Тайваньлуу явахад нь хамгийн сүүлд харсан байна.

Монголын цагдаа нар Жон Мартин Кийн алагдсан хэрэгт сэжигтнээр татсан эмэгтэйн талаар мэдээлэл авах гэтэл маш их нууцалж байсан нь олны танил гэр бүлийн хүүхэд байсантай холбоотой байсан бололтой. Мөн сэжигтэн өөрийгөө олонд зарлавал амиа хорлоно хэмээн мэдэгдсэн гэсэн мэдээлэл бий. Цагдаагийн байгууллага хэргийг шалгаж байгаа юм. Ямартай ч сэжигтэн 24 настай эмэгтэй Б 10.000 америк долларт шунан хүний амь хөнөөсөн бололтой.