Онц байдлын үед галт зэвсэг хэрэглэх хэрэгтэй, Батлан хамгаалахын яаманд сайд нь ганцаараа энгийн хүн байна гэж мэдэгдсэнээрээ сөрөг хүчин болон олон нийтийн дургүйцлийг хүргэх болсон Ж.Энхбаяр сайдыг Тагнуулын ерөнхий газраас шалгажээ. Тэрбээр намрын чуулганы үеэр энэ мэдэгдлийг нь АН-ын гишүүд эсэргүүцэж эхэлсэн тул яаран сандран тайлбар хийсэн. Сайдын суудлаас огцрохгүй гэж өөрийгөө өмөөрсөн тайлбар хийхдээ түүнийг улсын нууцад хамаарах зарим мэдээллийг өдөр тутмын хэвлэл болон УИХ-ын байнгын хорооны гишүүдэд материал тараасан гэж зарим гишүүд үзжээ. Монгол улс хэдэн мэргэн бууч бэлдэж байгаа, цаашид ямар мэргэжлийн, хэдэн хүнийг бэлтгэх тухай зэрэг мэдээллийг дэлгэсэн юм. Тиймээс Тагнуулын ерөнхий газраас түүнийг дуудан тайлбар авч, шалгасан байна. Ж.Энхбаяр сайд энэ ам асуултанд юу гэж хариулсан нь тодорхойгүй ч нэг хэсэгтээ л түүний нэр үндэсний аюулгүй байдал, улсын нууцтай холбогдох болж байна. Сайдын суудалдаа олонхийн хүчээр тогтож үлдсэн ч түүнийг АН-ын гишүүд нэг хэсэгтээ л араандаа зуух бололтой. УИХ-ын гишүүн Э.Бат-Үүл “Төрийн хүчирхийллийн дуу хоолой нь жижиг Ж.Энхбаяр буюу Батлан хамгаалахын сайд, гудамжны дуу хоолой нь том буюу Н.Энхбаяр болсон” гэж нэгэн өдөр тутмын сонинд ярилцлага өгөхдөө дурджээ.  Өмнө нь Говь-Алтай аймгийн малчиддаа тусалж байна гэж 247 чоно хоморголон агнасан, 2008 онд гишүүнээр сонгогдохдоо хууль зөрчсөн үйлдлүүд хийсэн гээд энэ дөрвөн жилд түүний нэр олон "сонирхолтой" хэрэгт холбогдож байна.