Сингапур орныг үндэслэгч, тус улсын “эцэг” хэмээн хүндлэгддэг Ли Куан Ю 91 насандаа эмнэлэгт таалал төгссөн тухай дэлхийн бүхий л томоохон хэвлэлүүд мэдээлж байна. Хөгжиж цэцэглэсэн өнөөгийн Сингапурыг үүсгэн байгуулахад гол үүрэг гүйцэтгэсэн тэрээр өнгөрсөн сарын дундуур биеийн байдал нь эрс муудаж, эмнэлэгт хэвтсэн бөгөөд өчигдөр шөнө амьсгал хураасан байна.
Ли Куан Ю нь Ази тивд ихээхэн хүндтэй бизнес, улстөр, нийгмийн сэхээтэн байжээ. Одоогоос 31 жилийн өмнө энгийн л нэгэн жижиг боомт хот байсан Сингапурыг Ли Куан Ю 1990 он хүртэл удирдсанаар өнөөдрийн олон улсын санхүүгийн зах зээлийн төв болтлоо хөгжсөн юм.
Ли Куан Ю 1959 онд ерөнхий сайдаар ажилласнаас хойш эх орондоо Кэмбрижийн боловсролын тогтолцоо, хууль эрх зүй, боловсролын суурь баазыг бий болгохын сацуу аялал жуулчлал, нийгэм эдийн засгийн үсрэнгүй хөгжлөөр азийн бар улсыг байгуулсан юм.
Талийгаачийн хүү Ли Хсен Лон өдгөө Сингапурын ерөнхий сайдаар ажилладаг бөгөөд энэ онд тусгаар тогтносон улс болсныхоо 50 жилийн ойг тэмдэглэхээр зэхэж байгаа билээ.
Агуу удирдагчаа алдсан олон мянган сингапурчууд төв талбайдаа цуглан хүндэтгэл үзүүлж байна.

Д.Үжин