ОХУ-ын ерөнхийлөгч Владимир Путин Беларус, Казахстан улсын тэргүүнүүдтэй уулзлаа. Өнгөрсөн баасан гарагт Казахстаны нийслэл Астанад болсон уулзалтаар тэрээр Евразийн нэгдсэн валюттай болох саналыг дахин тавьсан байна.

В.Путин “Бид ирээдүйд хэрэглэх нэгдсэн мөнгөн тэмдэгттэй болох тухай ярилцах цаг ирсэн хэмээн бодож байна. Нүүр тулан ажиллахад санхүү-эдийн засгийн заналхийллүүдийг мэдрэхэд илүү  хялбар байх  бөгөөд бидний хамтарсан зах зээлийг хамгаалахад бас хялбар байх болно” хэмээн хэлжээ.

Орос, Беларус, Казахстан болон Армени багтдаг Евразийн эдийн засгийн бүсийн хувьд нэгдсэн валюттай болох асуудлыг нэг бус удаа тавьж байсан. Хэвлэл мэдээллийн хэрэгслээр "алтын" болон "еврази" нэртэй хувилбаруудыг хэлэлцэж байсан. Өнгөрсөн оны 5-р сард Владимир Путин, Александр Лукашенко, Нурсултан Назарбаев нар Евразийн эдийн засгийн холбоо байгуулах тухай гэрээнд гарын үсэг зурсан ч валютын тухай асуудлыг 2025 он хойшлуулаад байсан юм.

Евразийн эдийн засгийн холбооны дийлэнх гишүүд болох гурван улсын тэргүүн нэгдсэн валюттай болохоос гадна эдийн засгийн уналт болон эрчим хүчний зах зээлд хэрхэн хамтран ажиллах тухай хэлэлцжээ. Үүнд өнгөрсөн зургаадугаар сард баррель нь 115 ам.долларын үнэтэй байсан ч одоо 54 ам.долларт хүрээд буй газрын тосны тухай асуудлыг чухалчлан ярилцсан хэмээн Оросын хэвлэл бичжээ.

Д.Идэр