Перу-Чили улсын хилийн ойролцоо зургаан баллын хүчтэй газар хөдөллөө хэмээн АНУ-ын Геологийн судалгааны хүрээлэнгээс мэдээллээ. Газар хөдлөлтийн голомт газрын гүнд 128.1 км-т байсан аж. Газар хөдлөх чичиргээ голомтоос 105 км-т орших Перугийн өмнөд хэсгийн Такна хотод хүртэл мэдрэгдсэн байна. Мөн голомтоос 33, 99 км-ийн зайд орших Чилийн Арика болон Путре хотуудод чичиргээ мэдрэгдсэн гэлээ.

Чилийн Үндэсний газарзүйн агентлаг газар хөдлөлтийн хүч зургаа биш 6.3 балл байсан хэмээн мэдээлж байна. Тус улсын Аюулгүй байдал, Дотоод хэргийн сайдын мэдээлснээр газар хөдлөлтөөс үүсэлтэй гэмтлийн хэмжээ бага биш ч Цунамийн анхааруулга өгөх хүртэл их байгаагүй юм байна.
2014 онд Чилид олон удаа газар хөдөлснөөр нийт зургаан хүн амиа алдсан юм. Харин Перуд 2007 онд найман баллын хүчтэй газар хөдөлснөөр 519 хүн амиа алдаж, 1366 хүн гэмтэж бэртсэн билээ.

Д.Идэр