Йемений Гадаад хэргийн сайд Персийн булангийн Арабын орнуудыг тус улсад цэргийн интервенц хийхийг хүссэн байна. Гадаад хэргийн яам газар нутгийнхаа өмнөд хэсгийг Шиа Хоуди босогчдоос хамгаалахад гадаадын улсууд цэрэг оруулж туслахаас өөр арга үлдээгүй хэмээн үзжээ.

Эрх мэдэл, дайчдынхаа тоог нэмсээр байгаа Хоуди босогчид өнгөрсөн сард ерөнхийлөгч Абдраббух Мансур Хадиг суудлаас нь унагаасан юм. Экс ерөнхийлөгч Адень боомт хотруу зугтаасан боловч босогчидтой тэмцэх хүчнийг цуглууж байгаа бөгөөд өөрийгөө одоо хүртэл ерөнхийлөгчийн эрхтэй хэмээн үзэж буйгаа мэдээлсэн билээ.

Хоудичууд өнгөрсөн амралтын өдрүүдэд Йемений гурав дахь том хот Тайзийг эзэлсэн бөгөөд одоо өмнөд хэсгийн томоохон хот аденийг эзлэхээр зэхэж байгаа аж.

НҮБ тус улсыг иргэний дайны ирмэгт ирсэн тухай даваа гарагт хоёр дахь удаагаа анхааруулсан байна.

Ерөнхийлөгч Хадигийн Гадаад хэргийн сайд Риад Яассинь Персийн булангийн хамтын ажиллагааны зөвлөлийн зургаан улсыг цэрэг оруулахыг хүсчээ. Тэрээр мөн НҮБ болон тус зөвлөлийг нислэгийн бус бүс үүсгэхийг хүсчээ. Учир нь өнгөрсөн долоо хоногт Аден хот дахь ерөнхийлөгчийн ордонд байлдааны онгоцууд дайралт өгсөн юм.

Өнгөрсөн оны есдүгээр сард Йемений хойд хэсэгт хүчээ авсан шиа групп Хоуди нийслэлийг эзэлснээр тус улсад эмх замбараагүй байдал үүсэж эхэлсэн юм. НҮБ-ын Аюулгүйн зөвлөлийн тайланд тэмдэглэснээр “Йемен замын зөрлөг дээр байна. Нэг бол иргэний дайн эхэлнэ, нэг бол газар нутгийн хувьд задарна” хэмээжээ. Үүнээс гадна орон даяар эмх замбараагүй байдал үүссэн нь тус улсад мөхөл авчрахаас гадна алах хядах Аль-Кайда бүлэглэл энэ байдлыг ашиглах хүч авч байгаа хэмээн анхааруулсан байна.

АНУ, Их Британи, Франц улсууд нийслэл Санаа хот дахь элчин сайдын яамдуудаа хаагаад байгаа юм.

Д.Идэр