Лондон хотын барилгачид Дэлхийн ll дайны үеийн аварга том дэлбэрээгүй бөмбөгийг санаандгүйгээр газар дороос нээсэн нь Их Британи төдийгүй дэлхий нийтэд шуугиан тарьж байна. Барилгын ажилчид бөмбөгийг Их Британийн цагаар даваа гаргийн 09.15 цаг орчимд Бермондсей дүүргийн Гранж замын ойрлцоох газар дороос ухаж гаргасны дараа хүчний байгууллагуудад мэдэгдсэн байна.
Аварга том тэсрэх бөмбөг 1.5 метрийн өндөртэй, 453 кг жинтэй хэмээн албаны эх сурвалжууд мэдээлжээ.
Бөмбөгийг олсны дараа аюулаас урьдчидан сэргийлж ойролцоох замуудын хөдөлгөөнийг хаасан байна. Тодруулбал, бөмбөгөөс 400 метрийн зайтай хөл хорио тогтоогоод байгаа юм. Үүний хүрээнд Цамхагт гүүрний замын хоёр урсгалыг хааснаар Темза мөрнийг гатлах гэсэн иргэдийн асар урт цувуу үүссэн гэлээ. Мөн зэргэлдээ орших барилгууд доторх хүмүүсийг нүүлгэн шилжүүлсэн бөгөөд хоёр ч сургуулийн үйл ажиллагааг түр хаажээ. Бөмбөгний ойролцоо оршин суудаг иргэдэд тусгай төв гаргаж өгсөн бөгөөд маргаашийг хүртэл гэрт нь оруулах боломжгүй хэмээн мэдээлээд байна.
Одоогийн байдлаар бөмбөгийг өөр газарт шилжүүлэх боломжтой эсэх тухай нарийн мэдээлэл өгөхгүй байна. Зэвсгийг аюулгүй болгох ажиллагаа үргэлжилж байгаа бөгөөд зургийг нь олон нийтэд цацахыг хориглосон аж.
Лондон хотын өмнөд хэсэгт орших Бэрмондсей дүүрэг нь Дэлхийн ll дайны үед хүнд бөмбөгүүд хамгийн ихээр суурилуулсан Их Британийн цэгүүдийн нэг юм. Тус хотод үйлдвэржлэлт ихээр хөгжсөнөөс гадна Лондонгийн хамгийн завгүй эзэмшил газрууд болон төмөр замын гол сүлжээ замууд байдаг учраас дайны үед дайралтад өртөх магадлал өндөр байжээ. Бэрмондсей хотод өнгөрсөн таван жилийн хугацаанд долоон дэлбэрээгүй том бөмбөг, таван гар бөмбөгийг газар доороос илрүүлж байжээ.
Д.Идэр
www.24tsag.mn
Аварга бөмбөг олсон газраас 400 метрийн зайнд хөл хорио тогтоожээ.
Тэсрээгүй бөмбөгийг салгах багийн зарим гишүүд.
Дэлхийн ll дайны үед Бэрмондсей хот.
Сэтгэгдэл (1)