Германы “Germanwings” компанийн онгоц  Барселонагоос Дьюсселдорф хүрэх замдаа Францын нутагт Альпийн нуруунд осолдсон тухай мэдээлсэн. Тэгвэл дэлхий дахины анхаарлыг татаж буй ослын тухай “BBC” агентлаг сурвалжилжээ. Airbus A320 маркын онгоцны 4U 9525 дугаар нислэгт нийт 150 хүн явсан бөгөөд тэднээс нэг нь ч амьд гараагүйг албаны эх сурвалжууд баталсан байна.  
Францын Дотоод хэргийн сайдын мэдээлснээр онгоцны хар хайрцагны бичлэг одсон байна. Ослын шалтгааныг одоо хүртэл тогтоогоогүй боловч онгоц өндрөө  наймхан минутын дотор алдаж, хурдтайгаар унаж осолдсон байна. Энэ хугацаанд ослын дохио дуугаргасаар байсан гэлээ.
Амиа алдсан зорчигчдын дунд сурагч солилцооны хөтөлбөрт хамрагдаад гэрлүүгээ харих гэж явсан 16 герман сурагч байсан байна. Онгоцонд явсан нийт 150 хүнээс 67 нь германы иргэн байсан бол 45 хүн испани нэртэй байжээ.
Ослын газарт ажиллаж буй мэргэжилтнүүдийн мэдээлснээр онгоц бүхэлдээ сүйрсэн бөгөөд бүтэн үлдсэн хэсэг бараг байгаагүй гэлээ. Францын төлөөлөгчдөөс гадна Германы Дотоод хэргийн сайд мөн ослын газарт очсон байна. Тэрээр харсан зүйлээ “аймшигт дүр зураг” хэмээн тодорхойлжээ.
Хэрэглэгчдэд илүү хямд үнээр үйлчилдэг “Germanwings” компанийг аюулгүй байдлаараа тэргүүлдэг Германы томоохон авиа компани “Lufthansa” эзэмшдэг юм.

Д.Идэр