Афганистаны ерөнхийлөгч Ашраф Гани АНУ-д албан ёсны айлчлал хийж байна. Тэрээр лхагва гарагт ерөнхийлөгч Барак Обаматай уулзсан бөгөөд өөрийн тавьсан хүсэлтээ зөвшөөрүүлж чадсан байна. АНУ Афганистан дахь цэргүүдээ 2015 оны эцсээр эргүүлэн татах шийдвэрийг 2016 он дуустал хойшлуулсан байна. Ингэхдээ энэ онд л лав цэргийн тоог өнөөгийн хэмжээнээс бууруулахгүй хэмээн тохиролцжээ.
Барак Обама цэргүүдээ эргүүлэн татах шийвэрээ 2014 онд гаргасан бөгөөд 2015 оны эцэс гэхэд тоог нь бууруулж 5500-д хүргэнэ хэмээн мэдэгдэж байсан юм. Тэрээр “Би Афганистан дахь 9800 цэргээ энэ оны эцэс хүртэл хадгалахаар шийдлээ. Харин 2016 онд хэр их цэрэг бууруулахыг тухайн жилд шийднэ” хэмээн зарласан байна. Мөн Афганистан улсад террорист халдлагууд сэргэхээс сэргийлж батлан хамгаалахын уян хатан бодлого баримталж буйгаа онцолсон байна.
Ашраф Гани ерөнхийлөгч болон АНУ-д цэргүүд, татвар төлөгчдөд олон жилийн турш ард түмэнд нь дэмжлэг үзүүлсээр ирсэнд талархал илэрхийлжээ. Тэрээр мягмар гарагт Америкийн Батлан хамгаалахын нарийн уичгийн дарга Аштон Картер болон Төрийн нарийн бичгийн дарга Жон Керритэй уулзсан билээ. Харин маргааш Конгрессын гишүүдтэй уулзахаар төлөвлөсөн аж.
Террорист бүлэглэл “Исламын улс” Афганистаныг эзлэхийг оролдоно гэсэн мэдээлэл нь Ашраф Ганиг батлан хамгаалахын гадаад тусламжийг нэмэгдүүлэх шийдвэрт хүргэж байгаа юм.
Д.Идэр
