“Мон-Уран” компаний захирал Х.Наранхүү бага насны охиныг садар самуунд уруу татсан гэх “амьдаа”-гаасаа болж хэвлэлийн хуудсанд олон цоллуулсан. “Зууны мэдээ” сонины сэтгүүлч түүнийг Х.Наранхүү гэгчтэй андуурч бичсэн нь нэгэнт тодорхой болсон юм. Гэсэн ч тэрбээр шүүх, прокурорын газраас салахаа больжээ. Гурван жил гаруй болж байгаа “Анод” банкны хэрэгт түүнийг сэжигтнээр татсанаар Х.Наранхүүг УПЕГ-аас шалгаад даруй хоёр, гурван сар болж байгаа юм. Харин тэрбээр буруутай, буруугүй эсэх нь тогтоогдоогүй, хэрэг нь шалгагдаж байгаа энэ үед АН-аас УИХ-д нэр дэвшихээр аль хэдийн бэлтгэлээ хангаад эхэлсэн байна. Долдугаар сарын нэгний үймээнийг өдүүлсэн хэмээн буруутгагдаж байхдаа прокуророос зугтаж АН-руу орсон О.Магнай, Ж.Батзандан нараас тэрбээр туршлага судалсан бололтой. Таван хүний амь насаар төлөөс хийж жагссан О.Магнай, Ж.Батзандан нар өнөөдөр АН-ын гишүүн гэсэн нэрийн дор намирч бас мандаж ч явна. Үүнээс жишээ авч “Мон-Уран”-ы захирал АН-аас нэр дэвшиж, тойрог авахын тулд 50 сая төгрөгөө ч аль хэдийн тушаажээ.УПЕГ-т АН, тэр дундаа ерөнхийлөгч Ц.Элбэгдоржийн гарын хүмүүс байдаг гэдэг нь аль хэдийн олон нийтэд ил болсон асуудал. Хэрэгт холбогдоод, зам нь шулуудах тийшээ хандсан бол аль нэг намыг түших нь ч жишиг болоод байх шиг. Хэрэв УПЕГ Х.Наранхүүгийн хэргийг шалгаж, гэм буруутай гэж тогтоовол тэрбээр сонгуульд нэр дэвших байтугай эрхгүй болно. Харин сонгуульд оролцох “тийз” болсон 50 сая төгрөгөө төлчихсөн хүнийг бол АН нь яаж ийж байгаад УПЕГ-аас “авч гарна”. УИХ-ын сонгууль шинэ тогтолцоотой болж, нэр дэвших тойргийн мандатын тоо буурсан. МАН ч тэр, АН ч тэр тойргоо хуваарилах гэж зарим нэгнээ гомдоож, зарим нэгнийг өстөн болгож байгаа энэ үед Х.Наранхүү сонгуульд нэр дэвших итгэлээр дүүрэн байгаа нь “жижүүрийн” 50 сая байтугай их мөнгө цацсан байх гэж ойрын эх сурвалжууд нь хэлж байна. УИХ-д шинэ цус сэлбэх хэрэгтэй гэж олон нийт үзэж байгаа энэ үед УИХ-ын гишүүн болох гэж буй түүнийг буруутгах аргагүй. Гэхдээ АН-д үзэл бодлын төлөө биш харин прокуророос зугтаж хоргодох байр болгож байгаад АН-ын олон жирийн гишүүд дургүйцэж байна.
Т.Цэнгэл
