24tsag.mn интернэт хэрэглэгч мянга мянган залуусынхаа дунд чөлөөт цагаа, зөв боловсон өнгөрүүлэх, цаашлаад бага ч гэсэн өөртөө итгэх итгэл, урам өгөхийн тулд “Фото мисс”, “Фото мистер”-ийн уралдааныг зарлаад дөрөв дэх сардаа амжилттай зохион байгуулж байгаа билээ. Зүгээр ч нэг биш сар бүрд шалгарсан ялагчиддаа ивээн тэтгэгчдийн шагналыг гардуулаад зогсохгүй сар сарын шилдгүүдээ хагас жилээр дахин өрсөлдүүлж, далайн эрэг дээр биеэ шаран хэвтэх боломжийг олгох юм. Тэгвэл өнгөрсөн сарын буюу манай сайтын дөрөв дэх удаагийн “Фото мисс”, “Фото мистер”-үүд тодорлоо. “Фото мистер”-ээр Г.Содномцогт тодорсон бол “Фото мистер”-ээр С.Тэргэл шалгарлаа. Нэмж хэлэхэд энэ сарын шилдгүүдийг “Aqua Fitness” төвийн нэрэмжит шагналыг гардуулсныг дуулгахад таатай байна.


 “Фото мисс”-ээр шалгарсан С.Тэргэлийн сэтгэгдлийг нь хуваалцлаа.

-       Манай сайтын уншигчдад өөрийгөө танилцуулахгүй юу?

-       Намайг С.Тэргэл гэдэг. Би 115-р сургуульд сурдаг. 8-р ангийн сурагч. Өмнө “Эра модель” агентлагт нэг жил суралцсан. Ер нь загварын чиглэлээр суралцаад нэг жил болж байна.

-       Манай сайтаас зарласан уралдааныг яг яаж мэдэж оролцов?

-     Нэг өдөр интернэт үзэж яваад танай сайт руу орсон. Тэгсэн ийм уралдаан зарласан байсан. Өмнө нь өөр ямар ч сайтууд залуусыг дэмжсэн ийм уралдаан зарлаж байгаагүй. Тийм учраас танай сайтаас зарласан уралдаан маш сонирхолтой санагдсан. Загварын чиглэлээр суралцдаг хүүхдүүдэд өөрсдийгөө нээх бас нэгэн том боломж юм шиг санагдсан.

-       Энэ сарын уралдаан маш өрсөлдөөнтэй явж өнгөрлөө. Чамд өрсөлдөхөд хэр хүнд байсан бэ?

-     Түрүүлсэндээ маш их баяртай. Өрсөлдөхөд хүнд ч зүйл байлаа. Сайхан ч зүйл байлаа. Хүмүүс янз бүрийн үгээр шүүмжилсэн сэтгэгдэл бичихэд нь үнэхээр хэцүү байсан. Ер нь энэ уралдаанд би их идэвхтэй оролцсон. Уралдаанд оролцож байгаагаа найзууддаа мэдэгдсэн. Найзууд маань намайг их дэмжсэн.

-       Өрсөлдөгч нар хэр хүчтэй байв?

-       Их хүчтэй байсан шүү.

-       Чөлөөт цагаараа юу хийх дуртай вэ?

-       Чөлөөт цаг гарвал л бүжиглэх ч юм уу, зураг зурдаг. Энэ чиглэлээрээ өмнө нь хэд хэдэн амжилт гаргаж байсан. Танай сайтаас зарласан уралдаанд түрүүлсэн нь миний бас нэгэн амжилт боллоо.

-       Хэдхэн сарын дараа гадаадад амрах эрхийн төлөө шилдгийн шилдэгүүд өрсөлдөнө. Чи хэр бэлдэж оролцох вэ?

-    Шинээр зургаа авахуулаад маш идэвхтэй оролцоно гэж бодож байгаа. Зургаа авахуулах сонирхолтой олон охид хөвгүүдийг энэ уралдаанд идэвхтэй оролцоосой гэж бодож байна. 24tsag.mn сайтын хамт олондоо амжилт хүсье.

 
Манай энэ сарын “Фото мистер”-ээр шалгарсан Г.Содномцогт тодорхой шалтгааны улмаас ирж чадсангүй. Юуны өмнө түүнд баяр хүргэе!

Хагас жилийн шилдгүүдэд өрсөлдөхөөр дөрвөн залуу, дөрвөн охин маань шалгараад байгаа бөгөөд тав дахь сарын уралдаан дахин эхэлснийг дуулгахад таатай байна. Сэтгэлд сэвгүй сайхан залуу, үзэсгэлэнт охид бүсгүйчүүддээ урам өгч, дэмжихийг нийт хэрэглэгчдээсээ хүсье. Нэмж хэлэхэд та ч бас уралдаанд оролцож, финалын шатанд өрсөлдөж болно гэдгийг санаарай. Мөнгө төгрөг, цаг зав үрэлгүй зөвхөн өөрийгөө тодорхойлох саак зурагнуудаа илгээхэд л хангалттай. Таныг манай хэрэглэгчид шалгаруулах болно.