Монголд ирсэн даруйдаа амиа алдсан АНУ-ын иргэн Жон Мартин Кийнтэй холбоотой олон баримтыг 24tsag.mn сайт дэлгэсэн билээ. Энэ хэргийг УМБГ, Эрүүгийн цагдаагийн газрын хамтарсан ажлын хэсэг одоо хүртэл шалгаж байгаа юм. 42 настай Жон Мартин Кийн нь монголоос бизнесийн санал хүлээн авч, өнгөрсөн нэгдүгээр сарын 5-ны өдөр ирсэн юм. Монголд ирээд хэдэн сар сурггүй алга болсон Жон Мартин Кийныг цагдаа нар хайсны эцэст түүний цогцсыг олсон. Хэрэгт талийгчид бизнесийн санал тавьсан Ч.Баттуул, түүний найз залуу Ш.Нямдорж, ах Ч.Батсайхан нарыг сэжигтнээр татан байцааж байгаа.
Талийгчийн эхнэр Тайваньд амьдардаг Нэнси Ли бидэнтэй холбогдож мэйлээр нөхрийнхөө хэрэгтэй холбоотой мэдээллийг явуулсаар байна. Тэрбээр энэ удаа нөхрийнхөө аавдаа бичсэн захидлыг бидэнд илгээсэн юм.
Нэнси Ли бидэнд ирүүлсэн мэйлдээ “Би танд Жоны аавдаа бичсэн захидлыг явуулж байна. Жон бизнесийн санал аваад маш их догдолсон байсан. Даанч бүх зүйл .... Би Баттуулыг хэзээ ч өршөөхгүй” гэсэн байлаа. Хүний нутагт бизнес эрхэлнэ хэмээн хууртагдан ирж амиа алдсан нөхрийнхөө араас эхнэр нь хичнээн их гашуудаж байгаа нь ойлгомжтой. 24tsag.mn сайт Жон Мартин Кийны аавдаа бичсэн захидал болон сэжигтэн Ч.Баттуулын гадаад паспортыг дэлгэж байна.
Талийгаач Жон Мартин Кийны аавдаа бичсэн захидлыг бүрэн эхээр нь хүргэж байна."2011 оны 12 сарын 6, 11:32 цаг
Сайн байна уу аав аа!
Бүх зүйл сайн байгаа. Миний найз Ч.Баттуулаас сканердсан хэд хэдэн бичиг баримт болон гадаад пасспортын хуулбар, бидний зочид буудал, рестарон, супермаркетаа ажиллуулах үл хөдлөх хөрөнгийн зургууд ирлээ. Баттуулын надад тавьсан санал маш бодитойгоос гадна сэтгэл татаж байна.
Би зочид буудал болон рестароны менежер хийх бөгөөд сард 3600 долларын цалин авна. Би бүх орлогоо хадгална гэж бодож байгаа. Хэрвээ намайг хүсэх юм бол түүний ахын алт олборлолтын компанид бас ажиллах боломжтой гэж Баттуул хэлсэн. Намайг долоон өрөө байшинд амьдруулна, "Toyota Camry" машин унуулна гэсэн.
Миний хийх ажил маш хялбар. Зочид буудал болон рестароны үйл ажиллагааг аль болох сайн зохион байгуулах. Супермаркет аль хэдийн бэлэн болчихсон, 20 ажилтантай. Бичиг баримтад хавсрагдсан нэрс бол Баттуулын бизнесийг хамтран хэрэгжүүлэх ах нар нь байгаа юм. Бидний төлөвлөгөө талдаа орчихсон явна. Монгол зах зээлийн хувьд ч бидний төлөвлөсөн бизнес хийхэд маш боломжтой. Дотоодын нийт бүтээгдэхүүн нь ирэх жил 5 хувиар өснө гэсэн судалгаа байна. Ялангуяа Монголын уул уурхайн салбар эрчимтэй хөгжиж байгаа.
Би Баттуулын надад мэйлдсэн баримтуудыг танд явуулж байна. Мөн Баттуулын ахын компаны веб хуудасны линкийг явуулж байна. “Монголын шар хуудас” нэртэй байгууллагуудын бүртгэлд байна лээ. Веб хуудсан дах мэдээлэл бүгд монгол хэл дээр байгаа учраас та хэвлэж аваад Монголын элчин сайдын яам дээр очиж орчуулуулаарай.
Түүний ахын компаны веб хуудасны линк: www.yp.mn Энд бас байгаа: http://www.teplomontaj.mn
Баттуул бол 24 настай. Намайг Тайваний технологийн их сургуульд англи хэл заадаг байхад Баттуул миний оюутан байсан юм. Баттуул хятад хэл, хоолны эрүүл ахуй, рестораны менежмент судлахаар Тайваньд солилцоогоор ирж сурсан юм. Түүний гэр бүл Монголын хүндэтгэлтэй гэр бүлийн нэг. Түүний аав МУИС-ийн физикийн ухааны профессор. Баттуул таван ахтай, нэг эгчтэй. Тэр 24 настай монгол залуутай гэрлэсэн.
Би зураг болон үл хөдлөх хөрөнгүүдийн зургийг тусад нь явуулна. 3500 метр кв. Их том юм байна лээ"
Талийгч жон Мартин Кийн аавдаа ийм захидал бичжээ. Гэсэн хэдий ч сэжигтэн Ч.Баттуулын ах Ч.Батсайханы эзэмшдэг компани гэх “Тепломонтаж” руу утасдан лавлахад алт олборлох нь битгий хэл тийм хүн манайд ажилладаггүй гэж байлаа. “Тепломонтаж” нь барилгын үйлчилгээ үзүүлдэг компани байв.24tsag.mn энэ хэрэгтэй холбоотой дараагийн нийтлэлдээ Нэнси Лигийн илгээсэн бусад материалууд болон сэжигтэн Ч.Баттуул, Ш.Нямдорж нарын зургийг нийтэлнэ.
Сэжигтэн Ч.Баттуулын гадаад паспортын хуулбар
