Хятадын төрийн өмчит, хөнгөн цагааны тэргүүн компани /China Aluminium Corp - Chalco/ “Чалко” корпораци Монголын нүүрс олборлолтын компани “SouthGobi resources” компаний хувьцааг эзэмшихээр “Айвенхоу Майнз”-д санал тавьжээ.

    Одоогийн байдлаар “SouthGobi resources” компанийн 57.6 хувийг “Айвенхоу Майнз” компани эзэмшиж байгаа юм.

    Өмнөговийн “Овооттолгой” нүүрсний уурхайд үйл ажиллагаа явуулж буй SouthGobi resources” компани Хятадын “Чалко”-той хамтран ажиллах гэрээ байгуулснаа өчигдөр мэдээллээ.

    “Чалко” хамтын ажиллагааны гэрээний хүрээнд “SouthGobi resources” компанийн 60 хүртэлх хувьд оногдох нэгж хувьцаа бүрийг 8.48 канад доллараар буюу нийтдээ 889 сая доллараар худалдан авахаар болжээ.

    “SouthGobi resources” (HK: 1878)-ийн хувьцаа өнөөдрийн байдлаар Хонконгийн бирж дээр 51.25 хонконг долларын үнэлгээтэйгээр худалдаалагдаж байна. “Чалко”-гийн санал болгосон 8.48 канад доллар нь “SouthGobi resources”-ийн хувьцааг 29 хувийн илүү үнээр худалдаж авах үнэлгээ юм.

    Хэрэв “Чалко” “SouthGobi resources”-ийн 60-аас илүү хувийг авах болвол бусад хувьцаа эзэмшигч бүрээс эзэмшлийг нь худалдаж авах магадлалтай. Энэ нь монголын нүүрсний олборлолтын томоохон компанийг хятадын төрийн өмчит “Чалко” удирдана гэсэн үг юм.

    “SouthGobi resources”-ийн олборлолт явуулж буй Өмнөговийн Гурвантэс сум дахь “Овооттолгой” орд нь хагас коксжих болон сайн чанарын эрчим хүчний нүүрсний уурхай юм. Хамгийн сүүлийн хайгуулын ажлаар ордын нөөцийг 302.3 сая тонн гэж тогтоожээ. Үүний 175.7 сая тонн нь батлагдсан нөөц юм.