СГЗ сэтгүүлч, яруу найрагч Загдын Түмэнжаргал өнгөрсөн Бямба гаригийн үүрээр зуурдаар нас нөгчжээ. Түүний үр хүүхэд, хамаатан садан Франц улсыг зорьсон бөгөөд талийгаачийг чандарлан, эх нутагт нь эргүүлэн авчрахаар болсон байна.

   З.Түмэнжаргал дуучин Б.Мягмарсүрэн, хүү Т.Тэнгисийн хамт Франц улсад амьдарч байсан юм. 1953 онд Төв аймгийн Угтаалцайдам суманд төржээ. Түүний хамгийн сайн хийдэг хоол нь “Угтаалцайдам шөл” хэмээн нутгийнх нэрээр нэрлэгддэг байлаа. Яруу найраг, утга зохиолын салбарт байсан энэ нэгэн эрхэм дундад Азийн нэгэн яруу найрагчийн Амьд яваа минь Алхам тутамдаа гайхамшиг... хэмээх шадыг үргэлж санаж явсан гэдэг. 1970-аад онд Монголын уран зохиолын салбарт орсон тэрбээр багадаа ном бүтээх хүсэл мөрөөдөлтэй байсан бөгөөд үүндээ ч хүрчээ. Анхны ном нь 1977 онд “Бид” нэртэйгээр хэвлэгдэж байжээ. Цөөнгүй ном зохиол туурвиж, шүлэг яруу найраг тэрлэсэн түүний бүтээлүүдээс “Ус мөрөн олончиг...”, “Очоод золгоно доо”, “Уяхан цэнхэр хавар”, “Халтар манан хөөрөг”, “Бага насаа би хайрлаж явна” зэрэг нь ард олны сэтгэл зүрхэнд хоногшин үлджээ. Түүнийг нэгэнтээ амьдралд сургамжтай мөртүүд хэлээч гэхэд:

“Цаазын илдэнд бөндгөрөө тасдуулахаас долоон дор эмгэнэл 
Цаг хугацааны бөгтгөнөн гүйж одох эмгэнэл
Цанхаалан гүйж одсон тэрхүү цаг хугацааны
Царайгаа дахиж яавч харуулдаггүй нь гүн гүнзгий эмгэнэл” хэмээж байлаа. Энэ эрхэм эргэж бидний дунд ирэхгүй ч гэлээ түүний бүтээл, туурвил бидний дунд үргэлж хамт байх болно.