Өнгөрсөн оны намар Б.Тулгыг сулла хэмээн Б.Батболд, З.Баянсэлэнгэ, М.Амартүвшин, Я.Мөнхсайхан, Д.Шонхоо нар нийслэлийн прокурорын газрын өмнө удаа дараалан жагсаал хийсэн билээ. Тухайн үед тэднийг жагсаал цуглаан хийлээ хэмээн ЧД-ийн Прокурорын газрын хяналтын прокурор Ц.Хашбаатар “Прокурорын газрын хяналтын прокурор О.Мөнхбаатарыг хуулиар хүлээсэн үүргээ гүйцэтгэж байхад нь хүч хэрэглэн эсэргүүцсэн тул ЭХ-ийн 230 дугаар зүйлийн 230.1 дэх хэсэгт, 245.1 дэх хэсэгт зааснаар харъяаллын дагуу ЧД-ийн шүүхэд шилжүүлэн ялласугай” гэсэн дүгнэлтийг хүргүүлсэн юм. Учир нь тэд О.Мөнхбаатар прокурорыг ажлаасаа гараад явахад нь саатуулсаар байгаад шүүхэд өгөх бичиг баримтын цагийг хойшлуулж байсан билээ. Харин прокурорын энэхүү үйлдлийг тус иргэд “МУ-ын үндсэн хуулийн 16-р зүйлийн 10 дахь заалт, 13 дахь заалт, 14 дэх заалт, 16 дахь заалт, 19-р зүйлийн 1 дэх заалт бүрнээр нь зөрчсөн” хэмээн үзэж, Үндсэн хуулийн цэцэд өргөдөл гаргасан байна.
Мөн прокурор О.Мөнхбаатар нь мөрдөн байцаалтанд ”Надад хүч хэрэглээгүй, гомдолгүй” хэмээн мэдэгдсэн аж. Ийнхүү мэдэгдэл өгсөн байхад эрүү үүсгэн яллахаар улайрч байгаа нь НПГ-ын орлогч Ё.Сагсайгийн шууд явуулга хэмээн тус иргэд үзэж байгаа гэнэ.Тиймээс Үндсэн хуулийн цэцэд хандсан байна. Цэц дээрх хэргийг хянан үзэж байгаа бөгөөд маргааш өргөдлийн хариуг өгөх юм байна.
Б.Чимэг
