Эдгээр өдрүүдэд Монгол улсын Ерөнхийлөгч Ц.Элбэгдорж Киргиз улсад ажлын айлчлал хийж байгаа билээ. Айлчлалын хүрээнд Киргизстанд “Киргиз Монголын хамтарсан бизнес форум” болж байна. Тус форумд Монголын талаас 55 бизнесмэн оролцож байгаа бол Киргизийн талаас барилга, хөдөө аж ахуй, харилцаа холбоо, аялал жуулчлал болон эдийн засгийн салбараас нь 100 орчим төлөөлөл оролцож байна. Монголын ГХЯ-ны сайд Г.Занданшатарын хэлж буйгаар 2011 оны байдлаар Монгол Киргизстан хоёр улсын хооронд 1.9 сая америк долларын худалдааны эргэлттэй байгаа нь дэндүү чамлалттай үзүүлэлт гэнэ. Киргизийн талын албан ёсны мэдээгээр бол 2011 онд Монгол руу 1.4 сая долларын экспорт хийсэн байна. Энэ үзүүлэлтийг өмнөх оныхтой харьцуулбал 30 хувиар доошилсон үзүүлэлт юм. Харин Монголоос 400 мянган долларын мах, махан бүтээгдэхүүн болон элс импортолсон. Тиймээс засгийн газар хоорондын үйл ажиллагааг идэвхжүүлж энэ үзүүлэлтүүдийг өсгөх хэрэгтэй байна гэж Г.Занданшатар сайд мэдэгджээ.

    Киргизстан улсын төрийн тэргүүн Алмазбек Атамбаев Монгол улсын ерөнхийлөгч Ц.Элбэгдоржтой уулзахдаа “Монголын парламентын засаглал хорин хоёр настай харин Киргизийх хоёрхон жилийн түүхтэй. Киргизстан улс Монголын парламентын засаглалаас судлах зүйл асар их” гэж мэдэгджээ. Тэрээр мөн “Монгол улсын амжилтын үндэс нь чөлөөт олон ургальч үзэл, улс төрийн шудрага өрсөлдөөнд оршиж байна" хэмээн хэлсэн байна. "Хорин хоёр жилийн туршид нэг ч хувьсгал гараагүй Монголын туршлагыг бид анхааралтай ажиглаж байна. Манай хоёр улсын ард түмэн эрх чөлөөтэй нүүдэлч ард иргэд учраас парламентын засаглал илүү тохирно" гэж Алмазбек Атамбаев хэлжээ. Тэрээр үгнийхээ төгсгөлд “Ард түмнийхээ итгэл дээр тогтсон засаг төр хүчтэй байдаг” гэжээ.

   Харин Монгол улсын ерөнхийлөгч Ц.Элбэгдорж Киргизстаны ерөнхийлөгчтэй уулзахдаа  байгалийн баялагийг үр ашигтай ашиглах талаар хоёр улс харилцан санал солилцох нь үр дүнтэй байх болно гэдгийг онцоллоо. Түүний хэлснээр "Монгол улс байгалийн баялагаараа дэлхийд эхний аравт орж байгаа. Тиймээс ч эх гүрнүүдийн сонирхолыг маш их татаж байна. Юуны түрүүнд бид өөрсдийн үндэсний эрх ашгийг нэн тэргүүнд тавьж хөрөнгө оруулалтаар олон үйлдвэр байгуулахыг зорьж байна. Байгалийн баялагт хөрөнгө оруулах талаар бидэнд олон санал ирдэг. Гэхдээ санал тавьсан хүмүүст би энэ асуудлыг ганцаараа шийддэггүй парламентаараа, ард түмэнтэйгээ зөвлөлдөж байж шийддэг гэж" хариулсан байна. Тэрээр мөн хууль боловсруулах болон байгалийн баялаг ашиглах салбарт Монгол улс ихээхэн туршлага хуримтлуулсан гэдгээ мэдэгдлээ.

Хоёр улсын хооронд агаарын зам нээх саналыг Киргизийн талаас тавьлаа

   Мөн хоёр улсын хооронд агаарын шууд харилцааг нээх саналыг Киргизстаны ерөнхийлөгч Алмазбек Атамбаев тавьлаа. "Монгол Киргизстан хоёрын хооронд эдийн засгийн харилцаа сул байгаагийн шалтгаан нь зам тээврийн асуудалд байх шиг байна. Тиймээс Бишкэк-Станбул-Улаанбаатар, Улаанбаатар-Станбул-Бишкэк гэсэн агаарын зам нээх саналыг Алмазбек Атамбаев дэвшүүллээ. Энэ саналыг ажил хэрэг болгох тал дээр Турк улстай Киргизчүүд тохирсон байгаа аж. Уул уурхай болон хөдөө аж ахуйн салбарт хамтарч ажиллаж болох юм. Монгол 40 сая малтай. Сайн чанарын ноолуур гардаг ямаатай. Тиймээс манайх энэ туршлагыг хэрэгжүүлж ямаагаа өсгөх боломжтой юм гэж тэрээр хэлсэн байна. Монголын ерөнхийлөгчтэй уулзахад хуучин цагийн дурсамж сэргэлээ. Монгол Киргизийн ард түмэн бол нэг гарал үүсэлтэй гэж үздэг. Эрдэмтэд Монгол, Киргиз хэлэнд адилхан хэлэгддэг 5000 үгийг тоолсон байдаг юм билээ. Монголд Киргиз буюу Хяргас гэж нуур бас байна. Чингис хааны 850 жилийн ой, Киргизийн тулгар төр байгуулагдсаны 1170 жилийн ойн хүрээнд түүхэн дурсгалуудыг судлах судалгааны баг гаргаж болох юм" гэж тэрээр мөн хэлсэн байна.

Монгол улсын ерөнхийлөгч Ц.Элбэгдорж Киргизийн үндэсний их сургуулийн хүндэт профессор болно  

Маргааш үдээс өмнө Монгол улсын ерөнхийлөгч Ц.Элбэгдорж Киргизийн хуучин ерөнхийлөгч хатагтай Роза Отунбаеватай уулзаж Алтангадас одон гардуулах гэнэ. Үүний дараа Киргизийн үндэсний их сургуулийн оюутнуудад хандан үг хэлэх юм байна. Тус сургууль Монгол улсын ерөнхийлөгч Ц.Элбэгдоржид хүндэт профессорын цол олгох аж.