Монголын үүрэн телефоны операторуудын нэг “Юнител” компани өнгөрсөн намар таван жилийнхээ ойд зориулан “5 байр 5 азтан” хэмээх хонжворт сугалааг хэрэглэгчдийнхээ дунд явуулж бөөн сенсааци дэлгэж орхисон.

   Монголын үүрэн телефоны операторуудын нэг “Юнител” компани өнгөрсөн намар таван жилийнхээ ойд зориулан “5 байр 5 азтан” хэмээх хонжворт сугалааг хэрэглэгчдийнхээ дунд явуулж бөөн сенсааци дэлгэж орхисон. Тус сугалаанд оролцож байр хожихын тулд юнителийн 2000 төгрөгөөс дээш нэгж худалдан авах шаардлагатай. “Томроход том жижиг хамаагүй ээ” гэсэн мэссэжийг бий болгож, “ТВ коктэйл”-ын залуусыг сурталчилгаандаа тоглуулж, телевиз, радио, сонин, сэтгүүл, интернэтээр хоёр сар бөмбөгдсөн нь том амжилт олсон юм. Үүнээс болж “Юнител”-ийн 2000-ын нэгж, шинэ дугаар хоёрт ч хүмүүс хуйларч өгсөн дөө. Үр дүн нь харин хулхидалтаар төгсөв.
   “Юнител”-ийн хулхидалт номер 1: Монголын топ компаниудын нэг “MCS” группын 100 хувийн хөрөнгө оруулалттай тус компанийг хэрэглэгчдээ ингэж “онхолдуулна” гэж хэн санахав. 2000 нэгж, шинэ дугаарын их нүүгэлдсэн аяны хугацаа дуусч, “Юнител” ч “цөм” хийчихлээ. Байраа ч азтанд нь өгөх цаг ирлээ. Тухайн үедээ “Юнител” компани таван азтандаа таван байраа өглөө хэмээн мөн л ХМХ-үүдээр цацаж, олон хүний анхаарлыг татсан. Байр хожсон иргэд хоолой нь зангиран бараг л маргааш шинэ байрныхаа найрыг хийнэ гэж ярьж байлаа. Гэтэл тэр нь “Юнител”-ийн аварга том хулхидалт номер 1 байжээ. Азтан болсон иргэд одоог хүртэл байрандаа ороогүй байгаа бөгөөд хулхидуулснаа мэдээд “Шударга өрсөлдөөн, хэрэглэгчийн төлөө газар”-т хүртэл ханджээ. Гомдлын дагуу тус газраас харин шалгалт явуулахад байр өгнө гэсэн ямар ч гэрээ хэлэлцээр байгаагүй бөгөөд бүр мартсан байсан гэх.
   Ийнхүү байрны хонжвортой сугалаат худалдаа зарласан Монголын хамгийн анхны компани нь “Юнител” гэж цаасан дээр бүртгэгдсэн ч байрны сугалаат худалдаа гэж зарлан том хулхидалт хийсэн Монголын хамгийн анхны компани “Юнител” гэж хэрэглэгчдийнхээ дунд давхар бүртгэгдлээ.
   Таван азтаныхаа байрыг оны сүүлээр олгох тухай ярьсан ч “Юнител” компани хэд хэдэн хуулийг зөрчлөө. Уг нь юуны түрүүнд таван байраа худалдаж авчихаад азтанаа тодруулах байсан юм. Гэтэл зар сурталчилгааны хуулийг зөрчиж иргэдийг төөрөгдүүлсэн. "Юнител" компани нь иргэдэд ингэж хандсанаар “Өрсөлдөөний тухай хууль”-ийн 12.1.3-д заасан "Өрсөлдөөнд харш үр дагавар үзүүлэх зар сурталчилгаа явуулахыг хориглоно", мөн тус хуулийн 12.1.10 дахь заалт болох "Хууль ёсны ашиг сонирхолд харшлах болон хэрэглэгчийг хууль бусаар хохироох худалдааны арга хэрэглэхийг хориглоно" зэргийг тус тус зөрчсөн байна. Мөн үүнээс гадна “Зар сурталчилгааны тухай хууль”-ийн 7.2.3-д заасан "Хангалттай, тодорхой мэдээллийг орхигдуулан... хэрэглэгчийг төөрөгдөлд оруулсан" хэмээх заалтыг зөрчсөнөөр хууль бус зар сурталчилгаа хийсэн байх юм.
   Түүнийхээ хариуцлагыг хүлээж ердөө арван сая төгрөгөөр торгуулсан нь тэдний хувьд юу ч биш. Тоо бодъё: “Таван байр, таван азтан” хөтөлбөрт нийтдээ 60 мянган хэрэглэгч оролцсон хэмээн бүртгэгджээ. Тэгвэл багаар бодож нэг хэрэглэгч нэг удаа 2000 нэгжийн карт худалдан авсан гэж тооцоход 120 сая төгрөгийн орлого олсон гэсэн үг. Гэвч нэг хэрэглэгч 2 сарын хугацаанд ганцхан удаа худалдан авалт хийхгүй нь лавтай. Ингээд бодоход хичнээн хэмжээний ашиг олсон нь харагдаж байгаа юм. Харин энэ ашгаасаа аравхан саяын торгууль төлөх нь тэдний хувьд инээдтэй хэрэг биз. Энэ мэтээр “Юнител” компани хэрэглэгчдээ төөрөгдүүлэн “шатааж”, өөрсдөө ашиг олжээ. Мөн хууль зөрчсөн хэргийг нь 10-хан саяар торгоод өнгөрөх нь хариуцлага тооцож байгаа бус харин ч өөгшүүлж байгаа хэрэг биш гэж үү.
   “Юнител”-ийн хулхидалт номер 1-ээ ингээд дуусгая. Харин дараагийн дугаарт “Юнител” компани хэрхэн хэрэглэгчдийнхээ тоог хиймлээр өсгөсөн маапаан дээр дөрөөлсөн шударга бус өрөлдөөний тухай хүргэх болно.