Өнөөдөр АН-ын дарга Н.Алтанхуяг болон ерөнхий сайд, МАН-ын дарга С.Батболд нар Таван толгойн ордын хувьцаа болон сая төгрөгийг иргэдэд тараах талаар дэлгэрэнгүй мэдээлэл хийнэ гэсэн зар тараасан. Гэсэн ч ерөнхий сайд С.Батболд энэ хэвлэлийн бага хуралд ирсэнгүй. Тэрбээр албан ёсоор хамтарсан хурал хийх хүсэлт ирээгүй тул хуралд оролцох боломжгүй гэжээ. Харин АН-ын дарга Н.Алтанхуяг ерөнхий сайдад хамтарч мэдээлэл хийх тухай хүсэлт албан бичгээр явуулсан, дараа нь утсаар ярьсан гэж баталж байна. Хурлын танхимд ганцаараа ирсэн АН-ын дарга Н.Алтанхуяг “УИХ-аас иргэн бүрт сая төгрөг өгөх тухай тогтоолыг 2011 оны 10-р сарын 15-нд гаргасан. Энэ тогтоолд 2012 оны хоёрдугаар сарын нэгэн гэхэд Таван толгойн хувьцаа иргэн бүрийн дансанд орохоор заасан. Хэрэв энэ хувьцаа нь дансанд нь баталгаажаад орсон бол өнөөдөр дөрөвдүгээр сарын дөрөвний өдөр гэхэд тэр хувьцаагаа иргэд Засгийн газарт зарах нь зарж, сая төгрөгөө авч байх байсан” гэв. Тэрбээр ахмад настан, хөгжлийн бэрхшээлтэй иргэдэд сая төгрөгийг заавал гурав хувааж өгөх албагүй гэсэн үг бас амнаасаа унагав.

  Н.Алтанхуяг энэ хэвлэлийн бага хуралд ерөнхий сайд ирээгүй талаар “Ер нь тал талд сууж хэрэггүй олон юм ярьж байхаа болимоор юм. Бие биенийхээ араар ард түмнээс нуугдахаа болих хэрэгтэй. Хэрэв ерөнхий сайд С.Батболд миний хажууд сууж байсан бол нүүрэн дээр нь хэлэх байсан. Миний өөдөөс харж зүрхлэхээ больчихсон юм байна. Хамтарч ажиллаж байсан болохоор буруу санаад яахав гэж бодож байсан. Гэхдээ зарим хүмүүс итгэл алдаад байна. Сонгуулийн өнгө аяс оруулж шоу хийгээд байна" гэлээ.
 
  Сэтгүүлчид түүнээс яагаад сая төгрөг тараах асуудал зогссон талаар асуухад манай нам хийх зүйлээ хийсэн үлдсэнийг нь хэрэгжүүлэх ёстой хүнээс нь асуу гэсэн хариулт хэлсэн юм.