Өнөөдөр Улсын ерөнхий прокурорын газраас хэвлэлийнхэнд мэдээлэл хийлээ. Энэ үеэр зарим аймаг, дүүргийн Засаг дарга нартай холбоотой хэргийн мөрдөн байцаалт ямар шатанд байгаа тодрууллаа.
Засаг дарга Э.Цасчихэрийн хэргийг харьяалал тогтоолгохоор Улсын дээд шүүхэд шилжүүллээ
Төсвийн мөнгө шамшигдуулсан гэх хэрэгт холбогдоод буй Увс аймгийн Засаг дарга Э.Цасчихэрт холбогдох хэргийг Нийслэлийн прокурорын газраас яллах дүгнэлт үйлдэж, харьяалал тогтоолгохоор Улсын дээд шүүхэд шилжүүлжээ. Түүнийг Увс аймагт барихаар төлөвлөсөн Нарийны голын 325 км, Тээлийн голын 75.3 км зам, гүүрийн барилгын ажлыг өөрийн “Мөнхжим” компаниар гүйцэтгүүлэхээр 710 сая, төрийн албан хаагчдын таван давхар орон сууцыг дөрвөн давхар болгон барьсан гэх иргэдийн мэдээллээр АТГ-т шалгасан юм. Налайх дүүргийн засаг даргын хэргийг хэрэгсэхгүй болгов
Налайх дүүргийн Засаг дарга Б.Баяндэлгэрийг Авлигатай тэмцэх газраас шалгаад нэлээдгүй хугацаа өнгөрсөн. Түүнийг 320 га газрыг БНСУ-ын хөрөнгө оруулалттай “Жэхуан групп”-т их хэмжээний мөнгөөр зарахыг завдсан байж болзошгүй хэмээн ИТХ-ын 25 гишүүнээс найман гишүүн нь шалгуулах хүсэлт гаргасан байдаг. Тэрбээр “Жэхуан групп”-т Налайх дүүрэгт орших газрыг өгөхийн тулд “Сеогёонг” компанийн эзэмшлийн 289 га газрыг 2009 оны наймдугаар сард 314 дүгээр тогтоолоор хүчингүй болгосон тухай ч мэдээлэл бий. Б.Баяндэлгэр “Сеогёонг” компаниас “булаасан” газраа “Жэхуан групп”-ийнхэнд 300 мянган ам.доллараар “зарах” санал тавьсан. Мөн газрын гэрчилгээ өгөхөөс өмнө урьдчилгаа төлбөр хэрэгтэй гэдгийг ч хэлсэн зэрэг мэдээллээр шалгаж байсан юм. Гэвч мөрдөн байцаалтын явцад дээрх мэдээллүүд тогтоогдоогүй гэсэн үндэслэлээр Нийслэлийн прокурорын газраас Б.Баяндэлгэрт холбогдох хэргийг хэрэгсэхгүй болгожээ. Говьсүмбэр аймгийн Засаг дарга Ж.Баянмөнхийн хэргийг шалгаж байна
Говьсүмбэр аймгийн Засаг дарга Ж.Баянмөнхийг өнгөрсөн нэгдүгээр сард АТГ-ын ажилтнууд саатуулж, цагдан хорьсон. Түүнийг Шивээговь сум дахь орон нутгийн өмчит “Илчлэг шивээ” үйлдвэрийн газрыг өөрийн дотнын найздаа хувьчлахын тулд Өмч хувьчлалын комисс болон удирдлагадаа байгаа албан тушаалтнуудад хууль бус шаардлага тавьж, дарамталсан гэх үндэслэлээр буруутгасан юм. Засаг дарга Ж.Баянмөнхийг ШШГЕГ-ын харьяа Цагдан хорих 461 дүгээр ангид хорьж байсан ч бие нь муудсан тул Сүхбаатар дүүргийн шүүхээс захирамж гаргаж, Шастины нэрэмжит Клиникийн төв эмнэлэгт хэвтүүлсэн. Тэрбээр Цагаан сарын үеэр батлан даалтад гарч, нутаг руугаа явсан талаар хэвлэлээр мэдээлсэн. Харин АТГ-аас түүнд холбогдох хэргийн мөрдөн байцаалтын ажиллагаа үргэлжилж байгаа аж. СХД-ийн Засаг дарга Ц.Болдын хэргийг шүүхэд шилжүүлэв
Сонгинохайрхан дүүргийн Засаг дарга Ц.Болдод өнгөрсөн намар эрүүгийн хэрэг үүсгэж, АТГ-аас шалгаж эхэлсэн. Түүнийг 2006 онд Нийслэлийн Хот тохижилтын газрын даргаар ажиллаж байхдаа их хэмжээний хөрөнгө завшсан гэсэн үндэслэлээр буруутган шалгасан юм. Мөн уг албан тушаалыг хашиж байхдаа цас хайлуулах бодис худалдан авахад төсөвлөсөн хөрөнгөөс 300 сая төгрөг завшсан хэрэгт буруутгасан. Харин Нийслэлийн прокурорын газраас түүнд холбогдох хэрэгт яллах дүгнэлт үйлдэн, харьяалал тогтоолгохоор Улсын дээд шүүхэд шилжүүлсэн байна.
Д.Оюунбатад оноосон ялыг хэвээр үлдээжээ
Орхон аймгийн Засаг дарга асан Д.Оюунбатыг албан тушаал, эрх мэдлээ хэтрүүлэн Төрийн болон орон нутгийн өмчөөр бараа, ажил үйлчилгээ худалдан авах хуулийг зөрчин танил тал, найз нөхдөдөө давуу эрх олгож улсад 3.7 тэрбум төгрөгийн хохирол учруулсан гэж буруутган АТГ-аас шалгаж эхэлсэн. Тиймээс өнгөрсөн хоёрдугаар сарын 15-нд Баянзүрх дүүргийн шүүх түүнд холбогдох хэргийг хэлэлцээд, төрийн байгууллагад ажиллах эрхийг гурван жилийн хугацаагаар хасаж, гурван жил зургаан сар хорих ял эдлүүлэхээр шийдвэрлэсэн. Гэвч тэрээр анхан шатны шүүхийн шийдвэрийг эсэргүүцэж, давж заалдах шатны шүүхэд гомдол гаргаснаар өнгөрсөн долоо хоногт түүний гомдлыг хэлэлцсэн. Харин Нийслэлийн шүүхээс түүнд оноосон анхан шатны шүүхийн шийдвэрийг хэвээр баталсан байна. Говь-Алтай аймгийн Засаг даргын хэргийг шүүхэд шилжүүлэв
Говь-Алтай аймгийн Засаг дарга Ш.Амгаланбаярт холбогдох хэрэгт Нийслэлийн прокурорын газраас яллах дүгнэлт үйлдэж, харьяалал тогтоолгохоор Улсын дээд шүүхэд шилжүүлсэн байна. Түүнийг албан тушаал, эрх мэдлээ хэтрүүлэн тендергүйгээр бараа, ажил, үйлчилгээ худалдан авч, танил талынхаа компанид давуу эрх олгосон хэрэгт буруутгаж буй юм.
Ховд аймгийн Засаг даргын хэргийг шалгаж байна
Ховд аймгийн Засаг дарга Г.Нямдавааг АТГ-ын мөрдөн шалгах хэлтэст шалгаж эхлээд удаагүй байгаа. Түүнд холбогдох хэргийн мөрдөн байцаалтыг нутагт нь хийхээр АТГ-ын Мөрдөн шалгах хэлтсээс байцаагч томилон тус аймагт ажиллуулсан. Түүнийг БНХАУ-аас аймгийнхаа гэрэл түүлгийн хэрэгслийг авч оронд нь их хэмжээний загас бариулах зөвшөөрөл өгсөн, Хөшөөтийн нүүрсний уурхайтай холбоотой, мөн хэд хэдэн тендер будилаантуулж, танил талдаа давуу эрх олгосон гэж сэжигтнээр татан шалгаж байгаа аж. Б.Чимэг
