Нууцаар Солонгос, Хятадын хамтарсан “Монголын төмөр замын дэд бүтэц” компанитай гэрээ хийсэн гэж МоАХ-ны тэргүүн, УИХ-ын гишүүн Х.Баттулгыг буруутгаж байгаа. Тэрбээр үүнд тайлбар хийхдээ ийм гэрээ хийх тухай чиглэлийг УИХ-ын дарга Солонгос руу айлчлаад ирснийхээ дараа өгсөн гэж мэдэгдсэн юм. Засгийн газар тэр гэрээний тухайд мэдээгүй  гэж удаа дараа эрс үгүйсгэж байгаа энэ үед УИХ-ын дарга Д.Дэмбэрэл “хам хэрэгтэн” байх магадлалтай болоод байсан. Х.Баттулга хэвлэлд ярилцлага өгөхдөө ““УИХ-ын дарга Д.Дэмбэрэлийн БНСУ-д хийсэн айлчлалын хүрээнд хэрэгжүүлэх ажлын төлөвлөгөө гарсан. Г.Занданшатар, Тамгын газрын дарга Ц.Шаравдорж нар төлөвлөгөөг нь батлаад “Солонгостой төмөр замын салбарыг бүх хэлбэрээр хөгжүүлж, хамтран ажиллана. 2010 оноос эхэлнэ, хариуцах  байгууллага ЗТБХБЯ” гээд их хурлын дарга үүрэг өгсөн  байгаа юм. Түүнээс Ц.Нямдоржийн яриад байгаа шиг зүйлд огт байхгүй” гэсэн юм. Тиймээс “Женко” Х.Баттулгын худал ярьсан эсэхийг батлах хүний нэг нь УИХ-ын Тамгын газрын дарга Ц.Шаравдорж болоод байна. Харин өчигдөр Ц.Шаравдорж дарга үнэнийг өчив.

   Тэрбээр “2010 оны дөрөвдүгээр сард Солонгосын Үндэсний ассамбелийн даргын урилгаар УИХ-ын дарга Д.Дэмбэрэл айлчилсан. Энд нэг буруу ойлголт яваад байна. Тэр айлчлалаар төмөр замын асуудлыг яриад, түүний дагуу “Монголын төмөр замын дэд бүтэц” компанитай гэрээ хийчихсэн юм шиг яриад байгаа. УИХ-ын дарга айлчлалын үеэр ямар асуудал хөндөх вэ гэдгийг Засгийн газар, Үндэсний аюулгүй байдлын зөвлөлөөр оруулж батлуулдаг. Цуг явсан хэд хэдэн УИХ-ын гишүүн ч хөтөлбөртэй нь танилцсан байгаа” гэв. Мөн “Тэр үед төмөр замын асуудлыг хөндсөн нь үнэн. Төмөр замын салбарт хамтран ажиллах төлөвлөгөөний дагуу дэс дараатай арга хэмжээ авах, энэ салбарт Солонгосын хөрөнгө оруулалтыг дэмжих гэсэн өгүүлбэр байгаа. Үүнээс өрөөр ямар нэгэн гэрээ хэлэлцээр, байхгүй. Тиймээс миний амнаас гарч байгаа үг бол олонд хүргэх үнэн үг шүү гэдгийг би хэлье” гэж Х.Баттулгын мэдэгдлийг “тас цохив”.

   С.Дэмбэрэл дарга нууц гэгдэж байгаа 20 хуудас гэрээг хийх чиглэл өгөөгүй болж таарав. “Женко” Х.Баттулга УИХ-ын даргыг гүтгэсэн болов.

   Ц.Шаравдоржийн хэлсэн үгэнд бас нэгэн сайдын нэр дурдагдсан нь Гадаад хэргийн сайд Г.Занданшатар юм. Тэрбээр УИХ-ын даргын Солонгост хийсэн айлчлалын бүрэлдэхүүнд багтаж байсан Д.Дэмбэрэл дарга нууц гэрээ хийх тухай ярьсан уу, үгүй юу гэдгийг тодорхой болгож өгөх бас нэг эх сурвалж болж байна. Хэрэв Г.Занданшатар сайд “ийм зүйл болоогүй” гээд тас гүрийчихвэл Х.Баттулга гишүүн яах аргагүй хүн гүтгэсэн хэрэгт унах болоод байна. 

Б.Баяр