Ерөнхийлөгч Ц.Элбэгдорж Кыргызстан улсад хийж байгаа айлчлалынхаа хүрээнд Кыргызстаны Үндэсний их сургуульд очиж үг хэлсэн. Энэ үеэр ерөнхийлөгч Ц.Элбэгдорж Монголын төлөөлөгчид нутгаасаа Киргиз буюу Хяргас нуурын арвин усыг авчирсан гээд Хяргас нуурын усыг Кыргызстаны ерөнхийлгөч, ерөнхий сайд, парламентийн дарга, их сургуулийн ректор нарт хүртээжээ. Ерөнхийлөгч Ц.Элбэгдорж “Би Кыргызстанд хийх айлчлалыг их удаан хүлээсэн. Өчигдөр манай нэг нөхөр энд ирсэндээ сэтгэл нь хөдлөөд уйлмаар байна гэж байсан. Биднийг өнгөрсөн түүхийн олон учиг холбодог. Танай орон бидний зүрх сэтгэлд ойрхон байдаг болохоор энд яг л гэртээ байгаа мэт санагдаж байна. Бид зөвхөн нийтлэг өнгөрсөн түүх биш, бас нийтлэг ирээдүйгээр холбогдоно гэж найдаж байна. Танайд сайн сайхан зүйл болоход бид баярлаж, хэцүү бэрх зүйл тохиоход бид адилхан шаналж байдаг” гэв. Мөн тус сургуулийн багш, оюутнуудад хандан “Та бүхэн ч бас Киргиз /Хяргас/ нуурыг харж, уснаас нь амтлахыг хүсч байгаа биз дээ” гээд хоёр улсад багш, оюутнуудаа солилцох боломж байгааг дурджээ.