Киргиз Монголын хамтарсан урлагийн тоглолт боллоо

Бүгд Найрамдах Киргиз Улсад албан ёсны айлчлал хийж буй Монгол Улсын Ерөнхийлөгч Цахиагийн Элбэгдоржийг хүндэтгэн Киргиз Улсын Ерөнхийлөгч Алмазбек Атамбаев, ерөнхий сайд Омурбаек Бабанов, парламентын дарга Асылбек Жээнбеков нар хүндэтгэлийн зоог барьсан. Энэ үеэр Киргиз, Монголын урлагийн тоглолт болж хоёр улсын Ерөнхийлөгч нар харилцан үг хэлсэн юм.

Киргиз Улсын Ерөнхийлөгч А.Атамбаев Монгол Киргизийн түүхэн харилцаа, соёлын гүн гүнзгий улбаа хийгээд Чингис хааны цогцлоосон эзэнт гүрний гайхамшгийн тухай сэтгэгдлээ хуваалцаж монголчуудад амжилт хүсч ардчилсан үзэл санааны төлөө тууштай үйл хэргээр нь бахархаж буйгаа илэрхийлсэн юм.

Ерөнхийлөгч Ц.Элбэгдорж энэ үеэр Увс аймгийн Нутагт орших Хяргас нуурын уснаас дээжлэн мөнгөн домбонд хийж Киргизийн Ерөнхийлөгчид барьсан бөгөөд  Киргизчүүд өвөг дээсийнхээ үүх түүхтэй холбоотой ариун дагшин газрын рашаанаас хүртсэнээ баяртай байгаагаа илэрхийлж байв.