Нийслэлийн хөдөлмөр халамж, үйлчилгээний хэлтсийн дарга Б.Оюунбат, Н.Баярмаа нарыг УМБГ-аас хөгжлийн бэрхшээлтэй иргэдэд зориулсан төсвийн мөнгөнөөс их хэмжээний мөнгө шамшигдуулсан хэмээн шалгаж байгаа. Мөрдөн байцаалтын явцад тэд нийт 217 сая төгрөгийг хувьдаа завшсан нь тогтоогдсон ба тэд өөрсдөө ч хэргээ хүлээсэн байна. Тэд хөгжлийн бэрхшээлтэй иргэдэд сургалт зохион байгуулсан, үйлдвэрлэл эрхлэхийг нь дэмжсэн, ном сурах бичгээр хангасан, тахир дутуу иргэдэд зориулалтын тэргэнцэр гадаадаас захиалж авчруулсан гэж их зүйл хийсэн мэтээр тайлагнаж байсан нь хуурамч байсан аж.
Уг хэргийг Баянгол дүүргийн шүүхэд шүүсэн ч мөрдөн байцаалтын ажиллагаа дутуу хэмээн мөрдөн байцаалтад буцаасан байна. Учир нь, УМБГ-ын мөрдөн байцаагч, хошууч Ж.Болд хэргийг гүйцэд шалгалгүйгээр шүүхэд шилжүүлсэн байжээ. Энэ нь тэднийг ялнаас хөнгөвчлөх гэсэн санаатай үйлдэл хэмээн тус байцаагчийг ажлаас нь чөлөөлсөн байна. Харин одоо уг хэргийг УМБГ-ын мөрдөн байцаагч Н.Бадраа шалгаж эхэлжээ.
Б.Чимэг
