Өнөөдөр 12.00 цагаас Үндэсний мэдээллийн төвд Хадгаламж зээлийн хоршооны хохирогчдын түр хорооны ерөнхий зохицуулагч Х.Оюунцэцэг, тус хорооны удирдах зөвлөлийн гишүүн Нямдорж, Дашдорж, Дашдаваа нар  хэвлэлийн бага хурал хийлээ.
    Өнөөдөр 12.00 цагаас Үндэсний мэдээллийн төвд Хадгаламж зээлийн хоршооны хохирогчдын түр хорооны ерөнхий зохицуулагч Х.Оюунцэцэг, тус хорооны удирдах зөвлөлийн гишүүн Нямдорж, Дашдорж, Дашдаваа нар  хэвлэлийн бага хурал хийлээ. Уг хурлаараа тэд Хадгаламж зээлийн хоршооны хохирогчдын хохирлыг барагдуулах ёстой байсан хөрөнгийг ШШГЕГ, цагдаа, шүүхийн хүмүүс завшиж идсэн талаарх мэдээллийг өгсөн юм.
    Тус мэдээлэлд “Нэгдүгээр хороололд байрлалтай “Глоб центр” буюу доороо гараж, баар, ресторантай дөрвөн давхар зочид буудлыг 1532 ширхэг дагалдах эд хөрөнгийн хамт 1.574.000.000 төгрөгөөр заржээ. Бүр задалбал, шийдвэр гүйцэтгэгч шинжээч 1.272.900.000 төгрөгөөр “Глоб центр”-ийн барилгыг үнэлсэн бол 1532 ширхэг дагалдах эд хөрөнгийг нь 267.544.660 төгрөгөөр борлуулахаар тогтсон байна. Ингээд нийтдээ нэг тэрбум 572 сая 704 мянган төгрөгөөр үнэлэгдсэн “Глоб центр” албадан дуудлага худалдаанд ирээд нэг тэрбум 574 сая төгрөгөөр зарагдсан аж.
    Нэг ёсондоо өр барагдуулах ажлын алба маань хоёрхон сая төгрөгийг нэмсэн болоод зарж орхижээ. Элдэв зардал суутгагдсаар төрийн дансанд 1.212.784.482 төгрөг шилжин орсон аж. Нэг тэрбум 574 саяаас дагалдах 267.544.660-ийг хасахаар нэг тэрбум 308 сая 455 мянга болж байна. Ингээд 2970 орчим м.кв талбай бүхий “Глоб центр”-ийн 1 м.кв-ийг ердөө 439 мянган төгрөг буюу 340 ам.доллараар үнэлэн заржээ. Одоогийн зах зээлийн үнээс 4-5 дахин бага үнээр зарж, дагалдах хөрөнгө гэдэгт бүхэл, тоног төхөөрөмж, тавилга сэлтээс гадна хөдлөх хөрөнгө буюу хүн тээврийн автобуснууд, жийп машин, автомашин зэрэг эд хөрөнгө оржээ.
    Түүнчлэн Баянгол дүүргийн Гандан дахь БОСА худалдааны төвийн дэргэдэх гурван давхар барилгыг 271 сая төгрөгөөр заржээ. Мөн Баянзүрх дүүргийн Гачуурт тосгон дахь Хар усан тохойн амын Баяндөхөмийн амралтыг 111-хэн сая 400 мянган төгрөгөөр 2009 онд заржээ. Бүхэл бүтэн амралтын газрыг 111 сая төгрөгөөр зарагдсан нь ихээхэн хардлага төрүүлж байна.
    Мөн Сонгинохайрхан дүүргийн 15 дугаар хороо, нэгдүгээр хороолол дахь 19/20 байрны дунд байрлах үйлчилгээний зориулалттай 200м.кв газрыг 14-хөн сая төгрөгөөр зарсан бол Баянгол дүүргийн зургадугаар хороо, “UB palace”-ын баруун талд байрлах 2568м.кв талбай бүхий газрыг 95.617.516 сая төгрөгөөр борлуулсан байна. Нийслэлийн төвд гэж хэлэгдэх энэхүү талбайг зах зээлийн мэдрэмжтэй шинжээч хэрвээ үнэлсэнсэн бол хоёр, гурван тэрбум төгрөгөөр ч зарчихаж болох байсан.
    Бидэнд олдсон материалын төгсгөлд Сонгинохайрхан дүүргийн дөрөвдүгээр хороо, Мах-Импексийн зүүн талд байрлах аж ахуйн хашаа нэрлэгдэж байна. Энэ нь нийт 2 га газартай гэсэн. Энийг л гэхэд 125-хан сая төгрөгөөр заржээ.
2010 оны гуравдугаар сарын 10-ны өдөр Шүүхийн шийдвэр гүйцэтгэх газраас явуулсан дуудлага худалдаагаар Бүтээн байгуулалт хөгжлийн сан хадгаламж зээлийн хоршооны өмч болох Улаанбаатар хотын Сүхбаатар дүүргийн 5-р хороо Их-Өргөөгийн 14-10 тоот 180 метр квадрат бүхий 6 өрөө орон сууцны зориулалтын хотын А зэрэглэлийн бүсэд байрших байрыг 73.600.000 төгрөг дээр ердөө 400.000 төгрөг нэмэгдэж 74.000.000 төгрөгөөр зарагдсан байгаа нь уг дуудлага худалдаанд анхнаасаа бүгд нэгдмэл сонирхол бүхий этгээдүүд оролцсон нь илэрхий байна. 1м2 нь 270 орчим америк долларт зарагдсан байгаа нь даруй зах зээлийн үнээс 5 дахин хямд байгаа нь төрийн албан хаагчид замаас нь шамшигдуулах замаар идэж уусныг гэрчилж байгаа юм” гэжээ.