Улаанбаатар хот дахь гадаадын зарим сэтгүүлчдийн дунд “MCS” группийн ерөнхийлөгч Ж.Оджаргалыг хүчний байгууллагууд баривчилсан гэсэн мэдээлэл таржээ. Энэ талаар Нийслэлийн прокурорын газрын орлогч Е.Сагсайгаас тодруулахад “Ж.Оджаргалыг хорьж, цагдсан зүйл байхгүй” гэж мэдэгдсэн. Харин “MCS” группийн хэвлэл, мэдээлэл хариуцсан төлөөлөгчөөс 24tsag.mn-ий сурвалжлагч тодруулахад “Ийм мэдээлэл гарсанд гайхаж байна. Х.Баттулга гишүүний өгсөн өргөдлийн дагуу АТГ-аас шаардсан баримт, мэдээллийг саадгүй гаргаж өгч байгаа. Удахгүй энэ талаар мэдээлэл хийнэ” гэв.Гадаадын сэтгүүлчдийн дунд энэ мэдээлэл тарсныг холбогдох хүмүүс няцааж байгаа ч яагаад ийм цуу яриа гарсан нь сонирхол татаж байгаа юм.
Өнгөрсөн сард Засгийн газрын дөрвөн сайдыг “MCS” групп болон “Энержи ресурс” компанитай ашиг сонирхлын холбоотой гэж УИХ-ын гишүүн Х.Баттулга АТГ-т өгсөн. Ж.Оджаргалыг Х.Баттулга гишүүний өргөдлийн дагуу АТГ хэд хэдэн удаа дуудаж байцаасан гэж эх сурвалжууд хэлж байгаа юм.
Энэ хооронд Хонконгийн хөрөнгийн бирж дээр “Mongolian mining corporation” нэрээр арилжаалагддаг “Энержи ресурс” компаний Ухаа худгийн үнэт цаасны ханш буурчээ. Өнөөдрийн байдлаар “Mongolian mining corporation”-ий хувьцаа өмнөх өдрөөс 2,643 хувиар буурсан байна.
