Долоо хоногийн ажлын сүүлчийн өдрийн төгсгөлд MCS, Х.Баттулга, АТГ сэдвээр тун сонирхолтой үйл явдлууд өрнөжээ. УИХ-ын гишүүн Х.Баттулгыг АТГ-аас дуудаж нэр бүхий улс төрчдийн “Энержи ресурс” ХХК-тай холбоотой байж болзошгүй гэх мэдээллийнх нь хариуг өгчээ. Нийслэлийн прокурорын газраас мэдээллийг татаж авч хянаад шалгах шаардлагагүй гэж үзсэн тул таны ирүүлсэн мэдээллийг манайх нягтлах боломжгүй гэж АТГ-аас албан бичгээр түүнд 17 цагийн үед мэдэгдсэн байна. Энэ тухай Х.Баттулга өчигдөр орой “Eagle” телевизийн шууд эфирт оролцохдоо хэллээ. “Ц.Нямдоржийн нутгийнх нь хүмүүсийн хийж байгаа ажил. Энэ бол хоёр хүний, хоёр намын, хоёр компаний хоорондох маргаан биш ээ. Ийм болгож харагдуулах сонирхол тэдэнд байна” гэж тэр мэдэгдэв. АТГ-аас өгсөн энэ хариулт УИх-ын гишүүнийг цочролд оруулсан гээд цаашид хэнд хандах, ямар алхам хийхээр төлөвлөөд байгаа тухай сэтгүүлчийн асуултад “Ёстой хэлж мэдэхгүй байна” гэж санаа алдан хэлжээ.
Харин “фронтын нөгөө талд” Ж.Оджаргалыг цагдаагийнхан саатуулсан гэх цуу яриатай давхцуулан MCS группын Олон нийттэй харилцах алба ажил тарсны дараа яаравчлан мэдэгдэл гаргасан байна. Мэдэгдэлд “УИХ-ын гишүүн Х.Баттулгын хүсэлтээр Авилгатай Тэмцэх Газар нэр бүхий улс төрчдийг шалгах явцдаа М-Си-Эс компаниас холбогдох асуудлаар мэдээлэл өгөхийг хүссэн. Компанийн зүгээс бололцоотой мэдээллийг цаг тухайд нь гаргаж өгч хуулийн хүрээнд хамтран ажиллаж байгаа” гэдгээ дурдаад “тус компанийн удирдлага болон аль нэг охин компанитай холбоотой хэрэг үүсгэж шалгагдаж байгаа явдал байхгүй. Улс төрчдийг шалгуулахаар өгсөн өргөдлийн мөрөөр манай холбогдох ажилтнуудаас мэдээлэл авч байгаа” гэдгийг хүлээн зөвшөөрчээ. Мэдэгдлийн “Сонгууль дөхөхийн хэрээр зарим нэг улс төрч зохиомол дуулиантай асуудлыг буй болгож олон түмний анхаарлыг өөртөө татаж, тархийг нь угааж, хувийн атаа жөтөө, явцуу эрх ашгийг хөөж, хувийн хэвшлийг улс төрийн хиймэл маргаан, мэтгэлцээнд хутган оролцуулж,хэвлэл мэдээллийн хэрэгслээр олон түмнийг хэрүүл тэмцэлд уриалж” гэсэн хэсгийг Х.Баттулга гишүүн телевизийн ярилцлагын үеэр “инээдтэй марзан юм” гэж тодорхойлсон байна.
