-
2017 оны 11 сарын 29
УИХ дахь Ардчилсан намын бүлэг өнөөдөр хуралдаж, энэ долоо хоногт УИХ-ын чуулганы нэгдсэн хуралдаанаар хэлэлцэх хуулийн төслүүдийн талаар хэлэлцэв.
-
2017 оны 11 сарын 29
Улсын Их Хурлын Эдийн засгийн байнгын хорооны өнөөдрийн (2017.11.29) хуралдаан 10 цаг 07 минутад 52.6 хувийн ирцтэйгээр эхэлж, Төв банк /Монголбанк/-ны тухай хуульд нэмэлт, өөрчлөлт оруулах
-
2017 оны 11 сарын 29
Улсын Их Хурлын Төсвийн байнгын хорооны өнөөдрийн (2017.11.29) хуралдаан 10 цаг 15 минутад гишүүдийн 52.6 хувийн ирцтэйгээр эхэлж, Гаалийн албан татвараас чөлөөлөх тухай, Нэмэгдсэн өртгийн албан татвараас чөлөөлөх тухай хуулийн төслүүдийн эцсийн хэлэлцүүлгийг хийлээ. Хуралдаанд Хүнс, хөдөө аж ахуй, хөнгөн үйлдвэрийн сайд Б.Батзориг болон холбогдох албан тушаалтнууд оролцов.
Засгийн газраас 2017 оны 11 дүгээр сарын 17-ны өдөр өргөн мэдүүлсэн Гаалийн албан татвараас чөлөөлөх тухай хуулийн төслийн эцсийн хэлэлцүүлэгтэй холбогдуулж санал хэлэх гишүүн байсангүй. Иймд уг хуулийн төслийг УИХ-ын чуулганы нэгдсэн хуралдаанаар хэлэлцүүлж, батлуулах саналыг хуралдаанд оролцсон гишүүдийн 80 хувь нь дэмжсэн. Эцсийн хэлэлцүүлэг хийсэн талаарх Байнгын хорооны санал, дүгнэлтийг Улсын Их Хурлын гишүүн Г.Тэмүүлэн УИХ-ын чуулганы нэгдсэн хуралдаанд танилцуулахаар болов.
Дараа нь Засгийн газраас 2017 оны 11 дүгээр сарын 17-ны өдөр өргөн мэдүүлсэн Нэмэгдсэн өртгийн албан татвараас чөлөөлөх тухай хуулийн төслийн эцсийн хэлэлцүүлгийг хийлээ. Хуулийн төсөлтэй холбогдуулж УИХ-ын гишүүн О.Батнасан санал хэлэв. Тэрбээр, ОХУ-аас саяхан нэг боодол тэжээл 1900 төгрөгөөр авч байсан бол одоо 6000 төгрөгийн үнэтэй болжээ. Салбарын яамны ажлын хурдаас болоод Ховд аймгийн малчид үнэтэй тэжээл авахад хүрээд байгаа уг асуудлыг анхааралдаа авахыг сануулж байв.
Ингээд хуулийн төслийг УИХ-ын чуулганы нэгдсэн хуралдаанаар хэлэлцүүлж, батлуулах саналыг хуралдаанд оролцсон гишүүдийн 90.9 хувь нь дэмжсэн. Нэмэгдсэн өртгийн албан татвараас чөлөөлөх тухай хуулийн төслийн эцсийн хэлэлцүүлэг хийсэн талаарх Байнгын хорооны санал, дүгнэлтийг Улсын Их Хурлын гишүүн Г.Тэмүүлэн УИХ-ын чуулганы нэгдсэн хуралдаанд танилцуулахаар боллоо гэж УИХ-ын Хэвлэл мэдээлэл, олон нийттэй харилцах хэлтсээс мэдээллээ.
-
2017 оны 11 сарын 29
Соёл, урлагийн ажилтны Улсын хоёрдугаар чуулган өнөөдөр Төрийн ордны их танхимд болж байна. Уг чуулганд оролцогчдод хандан Монгол Улсын Ерөнхийлөгч Х.Баттулга илгээлт явуулав.
Монгол Улсын Ерөнхийлөгчийн илгээлтийг Ерөнхийлөгчийн Соёл, шашны бодлогын зөвлөх Ц.Хулан уншиж сонордууллаа.
Уг илгээлтэд “Эрхэмсэг хатагтай ноёд оо,
Хүндэт зочид оо,
Монгол Улсын түүх бол дэлхийн түүх, Монгол соёлын түүх бол хүн төрөлхтний соёлын түүх билээ. Эх газрынх нь хөрсөн дээр ухамсар, оюун ухаант эртний хүн мөрөө гаргаж, нүүдэлчин соёл иргэншлийг бүтээн бий болгосон, төрт улсыг байгуулсан агуу гайхамшигт өв соёлын өлгий нутаг Монголоос өөр дэлхийд хаана ч байхгүй. Түүхэн хөгжлийнхөө мандал буурал, цаг хугацааны ээдрээт нугачаанд монголчууд бид энэхүү түүхэн соёл, соёл урлагаа тулгын гал мэт сахиж, нүдний цөцгий мэт хамгаалсаар ХХI дүгээр зуунтай золголоо.
Монгол Улсын Үндсэн хуульд “Монголын ард түмэн бид төрт ёс, түүх, соёлынхоо уламжлалыг нандигнан өвлөж, хүн төрөлхтөний соёл иргэншлийн ололтыг хүндэтгэн үзэж,эх орондоо хүмүүнлэг, иргэний ардчилсан нийгэм цогцлуулан хөгжүүлэхийг эрхэм зорилго болгоно” хэмээн тунхагласан байдаг.
Мянганаар өртөөлсөн Монгол үндэстний төрт ёс, түүх соёл, язгуур уламжлал, орчин цагийн ололт амжилтыг дархлан, гурван цагийн хэлхээнд орших эх орныхоо тусгаар тогтнол, ардчилал, эрх чөлөө, шударга ёсыг эрхэмлэн дээдэлж, “ХҮЧИРХЭГ МОНГОЛ УЛС”-ыг цогцлоох Эх оронч Ерөнхийлөгч байна хэмээн миний бие Монгол Улсын Ерөнхийлөгчийн мөрийн хөтөлбөртөө мөн тусгасан билээ.
Монгол Улсын Үндэсний Академик театрууд, аймгийн хөгжимт драмын орднууд, сумдын соёлын төвүүд болон уран зургийн галерей, музей, номын сангууд бол соёл, соёл, урлагийн ариун голомт гарцаагүй мөн. Соёл, урлагийн эдгээр голомтыг байнгын үзэгчидтэй, уншигчидтай, дотоод гадаадын халуун дотно дэмжигчидтэй байлгахад Монгол Улсын төрөөс удаа дараа үе шаттайгаар салбарын бодлогын баримт бичгүүд хэрэгжиж, хөрөнгө мөнгө төсөвлөгдсөөр ирснийг та бид мэднэ.
Гэвч соёл, урлагийг бид соёл урлагийн үйл ажиллагаа явуулдаг тайз дэлгэц, үзэсгэлэнгийн танхим зэргээр хязгаарлан авч үздэг хандлагаас татгалзах цаг болжээ. Соёл, урлаг бол нэгээхэн салбар төдий зүйл биш, харин улс үндэстний амин зүрх,нийгмийн харилцаа юм.
Хүүхэд залуус, ард иргэдийн сурч боловсордог, соён гэгээрдэг ахуй нөхцөл хурдацтай өөрчлөгдөж, мэдээ мэдээлэл авдаг арга хэлбэр боловсронгуй болохын хэрээр монголчуудын уламжлалт соёл, зан заншил мартагдаж, эрхэм ёс жудаг алдагдаж байна. Соёл, урлагийг зах зээлийн хатуу ширүүн хуулиар зөнд нь орхиж, хөгжлийнх нь жолоо цулбуурыг сул тавьснаас болж уршигт үр дагаврууд гарсаар байна.
Монгол хүн, монгол соёлоо дээдлэн хүндэтгэдэг торгон нарийн сэжмүүд тасарч алдагдсаар байна. Үндэсний язгуур соёл маань даяаршлын эриний масс соёлын түрэгдэлд нэрвэгдэж байна. Дотоодын хяналтгүй, гадаадын зах хязгааргүй, хямд, харь соёлын гаж нөлөө, цахим ертөнцийн хүчирхийллийн өмнө монгол үндэсний соёл урлаг хүчин мөхөсдөж байна.
Монгол хүний ертөнцийг үзэх үзэл өөрчлөгдөж, олон зууны түүхээр шалгаран өвлөгдсөн оюуны болон сэтгэл, сэтгэлгээний үнэт зүйлс тогтворгүй, тодорхойгүй болж, үндэсний бахархал, нэгдмэл байдал сул байгааг хөндлөнгөөс хүлцэнгүй харж суух цаг биш ээ. Соёлын ажилтан нэг бүр Монгол Улсынхаа соёлын өв тээгч, соёлын дархлааг бүтээн бий болгогч, соёл урлагийн нэгж байгууллага тус бүр ард иргэдийнхээ үндэсний ухамсрыг сэргээн хөгжүүлэгч, улсынхаа язгуур эрх ашгийг сахин хамгаалагч байх ёстой.
Аливаа урлаг соёлын бүтээлийг зүрх тархины шүүлтүүргүйгээр хүртдэг Монгол үзэгчийг бус, гүн ухаанч хандлага, гоо зүй болон ёс суртахууны өндөр шалгуураар хүлээж авдаг монгол хүнийг бэлтгэхэд гол тулгуур болсон уран бүтээлчид, соёл урлагийн менежерүүд та бүхэнтэйгээ нягт хамтран ажиллахыг Төрийн тэргүүний зүгээс хүсч байна.
Соёл, урлагийн ажилтны хоёрдугаар чуулганы төлөөлөгчид өө,
Өнөөдөр та бүхэнд тулгамдаж буй олон асуудал бий. Тус салбарын ажилтны цалин тэтгэвэр, нийгмийн халамж, ажлын болон орон байрны хүрэлцээг нэмэгдүүлэх, соёл урлагийн ажилтны нийгэм дэх нэр хүнд, байр суурийг бэхжүүлэхэд төрийн оролцоо дутмаг явж ирснийг би хүлээн зөвшөөрдөг. Оюуны бүтээлийг үнэлж цэгнэх, зохиогчийн эрхийг баталгаажуулах, олон улсад сурталчлах тал дээр ч бид хангалтгүй ажилласаар ирсэн. Соёл, урлаг бол мөнгөтэй хөрөнгөтэйн гар хардаг, эрх мэдэлтэйн тушаал заавраар хөдөлдөг улстөржсөн, өөрийгөө авч явах чадваргүй салбар огт биш .Соёл, урлаг бол нийгмийн оюун санааны манлайлагчид, хосгүй өв соёлын эзэд гэдгийг төр, түмнээрээ хүлээн зөвшөөрүүлэх цаг болжээ. Ерөнхийлөгчид оногдсон эрх үүргийн хүрээнд та бүхэнтэй хамтран ажиллаж, хөхиүлэн дэмжихээ илэрхийлье.
Цаашид Монгол Улсынхаа соёлын дархлааг тогтооход, монгол хүний үнэт зүйлсийг бий болгоход соёл судлаач эрдэмтдийг тэргүүлэх байр суурьтай татан оролцуулъя. Өргөн олныг хамарсан судалгаа, шинжилгээний үндсэн дээр Төрөөс баримтлах Соёл, соёл урлагийн бодлогыг шинэчилж, урт настай, эрх зүйн орчныг сайжруулах хэрэгцээ шаардлага урган гарч байна. Та бүгдээс ирэх дэвшилтэт, шинэлэг санал бодлыг хүлээж авахад бэлэн байна.
Соёл урлагийн хоёрдугаар чуулганы үйл ажиллагаанд амжилт хүсэн ерөөе. Үндэсний түүх, хэл, соёл, өв уламжлал, зан заншлаа дээдэлж, тусгаар тогтнол, эв нэгдлээ сахин хамгаалцгаая” гэсэн байна.
-
2017 оны 11 сарын 29
ХЗДХ-ийн сайд Ц.Нямдорж С.Зориг агсны хэргийг нууцаас гаргах эсэх асуудлыг
-
2017 оны 11 сарын 29
Өнөөдөр хоёр байнгын хороо хуралдах товтой байна.
1.Эдийн засгийн байнгын хорооны хуралдаан 09.00 цагаас “Их Эзэн Чингис хаан” танхимд:
Хэлэлцэх асуудал:
- Стандартчилал, техникийн зохицуулалт, итгэмжлэлийн тухай хуулийн төсөл болон холбогдох бусад хуулийн төсөл /Засгийн газар 2017.06.20-ны өдөр өргөн мэдүүлсэн, анхны хэлэлцүүлэг/;
- Төв банк /Монголбанк/-ны тухай хуульд нэмэлт, өөрчлөлт оруулах тухай хуулийн төсөл болон холбогдох бусад хуулийн төсөл /Улсын Их Хурлын гишүүн Ө.Энхтүвшин нарын 10 гишүүн 2017.11.17-ны өдөр өргөн мэдүүлсэн, төслийн үзэл баримтлалыг хэлэлцэх эсэх/.
2.Төсвийн байнгын хорооны хуралдаан 09.00 цагаас “Жанжин Д.Сүхбаатар” танхимд:
Хэлэлцэх асуудал:
- Гаалийн албан татвараас чөлөөлөх тухай хуулийн төсөл /Засгийн газар 2017.11.17-ны өдөр өргөн мэдүүлсэн, эцсийн хэлэлцүүлэг/;
- Нэмэгдсэн өртгийн албан татвараас чөлөөлөх тухай хуулийн төсөл /Засгийн газар 2017.11.17-ны өдөр өргөн мэдүүлсэн, эцсийн хэлэлцүүлэг/.
-
2017 оны 11 сарын 28
Манай улсад ажлын айлчлал хийж байгаа Бүгд Найрамдах Словак Улсын Шадар сайд Петер Пеллегрини тэргүүтэй төлөөлөгчид 2017 оны 11 дүгээр сарын 28-ны өдөр Монгол Улсын Ерөнхий сайд У.Хүрэлсүхэд бараалхав.
Словакийн Шадар сайдын энэ удаагийн айлчлал хоёр орны найрсаг харилцаа, хамтын ажиллагааг өргөжүүлэн хөгжүүлэх боломж гэж үзэж байгаагаа Ерөнхий сайд илэрхийлэв.
Айлчлалын хүрээнд “Эдийн засгийн хамтын ажиллагааны тухай Монгол Улсын Гадаад харилцааны яам, Словак Улсын Эдийн засгийн яам хоорондын хэлэлцээр”-т гарын үсэг зурж, бизнес форум зохион байгуулахаар төлөвлөсөн нь бизнес эрхлэгчид, аж ахуйн нэгжүүдэд шинэ зах зээлд нэвтрэх гарц болох нь дамжггүй гэв.
Талууд худалдаа, эдийн засгийн харилцаандаа түлхүү ач холбогдол өгч, хүнс, хөдөө аж ахуй, газар тариалан, мэдээллийн технологи, уул уурхай, болон бусад харилцан сонирхсон салбарт хамтран ажиллах өргөн боломж байгааг Ерөнхий сайд тэмдэглэв.
Шадар сайд Петер Пеллегрини улсынхаа Ерөнхий сайдын мэндчилгээг Монгол Улсын Ерөнхий сайд У.Хүрэлсүхэд хүргэж амжилт хүслээ. Тэрээр энэ удаагийн айлчлал хоёр улсын харилцаанд шинэ хуудас нээнэ гэдэгт итгэлтэй байгаагаа илэрхийлэв. Словакийн тал мөн худалдааны эргэлтийн хэмжээг нэмэгдүүлэх, хүнс, хөдөө аж ахуй, мэдээллийн технологи, цахим засаглал болон бусад салбарт хамтран ажиллах сонирхолтой байна гэлээ. Мөн оюутан солилцооны хөтөлбөрөө цаашид үргэлжлүүлнэ гэв хэмээн Засгийн газрын Хэвлэл мэдээлэл, олон нийттэй харилцах хэлтсээс мэдээллээ.
-
2017 оны 11 сарын 28
Монгол Улсын Шадар сайд Ө.Энхтүвшингийн урилгаар Бүгд Найрамдах Словак Улсын Шадар сайд Петер Пеллегрини манай улсад ажлын айлчлал хийж байна.
Шадар сайд Ө.Энхтүвшин хүндэт зочныг 2017 оны 11 дүгээр сарын 28-ны өдөр Төрийн ордонд хүлээн авч уулзан хэлэлцээ хийв
Словакийн тал өндөр түвшинд, өргөн бүрэлдэхүүнтэй айлчилж байгаа нь хоёр улсын харилцаа, хамтын ажиллагааг идэвхжүүлэхэд чухал түлхэц үзүүлнэ гэдэгт итгэлтэй байгаагаа Шадар сайд илэрхийлэв.
Мөн найрсаг харилцаа, хамтын ажиллагааг худалдаа, эдийн засаг, хүнс, хөдөө аж ахуй, мэдээллийн технологи, боловсрол зэрэг салбарт өргөжүүлэн хөгжүүлэх сонирхолтой байна гэв.
Монгол Улстай харилцах харилцаандаа ач холбогдол өгч байдгийн илэрхийлэл нь энэ удаагийн айлчлал гэдгийг Словакийн Шадар сайд Петер Пеллегрини тэмдэглэлээ. Цаашид хүнс, хөдөө аж ахуй, мэдээллийн технологи, геологи зэрэг салбарын хамтын ажиллагааг идэвхжүүлэх сонирхолтой байгаагаа нотлов. Мөн харилцан туршлага солилцох, Словакийн тэргүүлэх техник, технологи нэвтрүүлэх чиглэлээр хамтран ажиллах бүрэн боломжтой гэдгээ илэрхийлэв.
Бүгд Найрамдах Словак Улсын Шадар сайдын айлчлалын бүрэлдэхүүнд тус улсын Эдийн засгийн сайд П.Жига, Сангийн сайд П.Кажимир болон холбогдох агентлаг, банк, бизнес эрхлэгчдийн төлөөлөл багтсан байна.
Айлчлалын үеэр хоёр улсын бизнес форум зохиох бөгөөд “Эдийн засгийн хамтын ажиллагааны тухай Монгол Улсын Гадаад харилцааны яам, Словак Улсын Эдийн засгийн яам хоорондын хэлэлцээр”-т гарын үсэг зурна гэж Засгийн газрын Хэвлэл мэдээлэл, олон нийттэй харилцах хэлтсээс мэдээллээ.
-
2017 оны 11 сарын 28
Монгол Улсын Ерөнхий сайдын ахалдаг Хүнсний аюулгүй байдлын зөвлөл маргааш буюу 11 дүгээр сарын 29-нд хуралдаж, мах экспортод гаргах квотыг нэмэгдүүлэх талаар ярилцана. Манай улсад мах, махан бүтээгдэхүүний үйлдвэрлэл эрхэлдэг 40 гаруй аж ахуйн нэгж байдаг ч байнгын үйл ажиллагаатай нь гарын арван хуруунд багтана гэдгийг ХХААХҮЯ хэлж байгаа юм. Эдгээр компаниас төлөөлөл болгож Монгол Улсын Ерөнхий сайд У.Хүрэлсүх өнөөдөр үдээс өмнө “Мах маркет”, “Мах импекс” компанид ажиллалаа.
2016 оны тооллогоор мал сүрэг 61.5 сая толгойд хүрсэн. 27.8 сая хонь, 25.5 сая ямаа, 3.6 сая адуу, 4.0 сая үхэр, 400 мянган тэмээтэй. Дотоодын махны хэрэгцээ жилд 10-12 сая толгой мал, мах байна. Энэ хэрэгцээгээ бүрэн хангаад зогсохгүй жилд есөн сая толгой мал, мах экспортлох бүрэн боломжтой.
2017 оны 11 дүгээр сарын байдлаар нийт 21.5 мян.тн мах ОХУ, БНХАУ, ОХУ, Казахстан, Япон, Иран, Катар зэрэг улсад экспортлоод байна. Энэ тоог өнгөрсөн таван жилийнхтэй харьцуулахад махны экспорт тав дахин нэмэгдсэн байна. Мөнгөн дүнд шилжүүлэн үзвэл энэ онд 108 тэрбум төгрөгийн үнэ бүхий мах, махан бүтээгдэхүүний экспорт хийгээд байна. Энэ дүн долоо дахин нэмэгдэх боломжтой гэж Монгол Улсын Ерөнхий сайд У.Хүрэлсүх хэллээ.
Хүнсний аюулгүй байдлын үндэсний зөвлөлөөс энэ онд тогтоосон 20 мян.тн адууны махны квотыг экспортлогч аж ахуйн нэгжүүдэд бүрэн олгосон, гүйцэтгэл нь 100 хувьтай байна. Адууны мах авах хүсэлт, захиалгаа ирүүлж буй улс орнууд ч байна. Иймд адууны мах бэлтгэхэд илүү анхаарч, экспортыг нэмэгдүүлэх нь зүйтэйг тэрээр тэмдэглэв. Мөн мал, махан бүтээгдэхүүний дотоодын хэрэгцээг бүрэн хангаад зогсохгүй экспортыг нэмэгдүүлэх нь Засгийн газрын гол бодлого, ажлын нэг гэдгийг Ерөнхий сайд онцолж байлаа.
Ерөнхий сайдын очсон хоёр компани үйлдвэрээ өргөтгөх, техникийн шинэчлэл хийж, ажлын байр болон бүтээгдэхүүнийхээ хэмжээг нэмэгдүүлэх төлөвлөгөөгөө танилцуулсан юм. Тухайлбал, “Махмаркет” компани 300 гаруй ажилтантай бөгөөд өргөтгөл, шинэчлэлээ хийж чадвал ажлын байр хоёр дахин нэмэгдэнэ гэж байна. Өргөтгөл, техникийн шинэчлэл хийхэд нь хөрөнгө оруулалт болон жижиг, дунд үйлдвэрлэлийг дэмжих зээлд хамруулж, анхаарч ажиллахыг Ерөнхий сайд ХХААХҮ-ийн сайд Б.Батзоригт үүрэг болголоо.
Монгол Улс ганц уул уурхайн салбарыг түшиглэж болохгүй гэдгийг мэдэрсэн. Иймд бид хөтөлгөө морьтой, эхний ээлжинд хос, дараа нь олон тулгуурт эдийн засагтай болох ёстой. Хөдөө аж ахуй, газар тариалангийн салбараа, жижиг дунд үйлдвэрлээ хөгжүүлэх ёстой. Малаа өсгөж, дотоодын махны хэрэглээгээ хангахаас мал, махны нөөцдөө тулгуурлан экспортыг эрчимтэй нэмэгдүүлэх шаардлагатай. Ингэж чадвал улс орны эдийн засаг тогтворжино. Үүнд үйлдвэрлэгч та бүхний оролцоо нэн чухал. Иймд Засгийн газар үндэсний үйлдвэрлэгчдээ дэмжиж хамтарч ажиллана гэдгийг Ерөнхий сайд У.Хүрэлсүх онцолж байлаа гэж Засгийн газрын Хэвлэл мэдээлэл, олон нийттэй харилцах хэлтсээс мэдээллээ.
-
2017 оны 11 сарын 28
Монгол Улсын Их Хурлын дарга М.Энхболдод өнөөдөр (2017.11.28) Олон улсын хөрөнгө оруулалтын банк үүсгэн байгуулах тухай хэлэлцээр болон дүрэмд өөрчлөлт оруулах тухай 2014 оны протоколыг соёрхон батлах тухай мөн Эдийн засгийн хамтын ажиллагааны олон улсын банк үүсгэн байгуулах, түүний үйл ажиллагааны тухай хэлэлцээр болон Банкны дүрэмд өөрчлөлт оруулах тухай 2014 оны протоколыг соёрхон батлах тухай хуулийн төслүүдийг УИХ-ын гишүүн, Засгийн газрын ХЭГ-ын дарга Г.Занданшатар өргөн мэдүүллээ.
Олон улсын хөрөнгө оруулалтын банк үүсгэн байгуулах тухай хэлэлцээр болон дүрэмд 2014 оны 5 дугаар сарын 08-ны өдрийн протоколоор дараах өөрчлөлтийг оруулжээ.
-Компанийн засаглал. Компанийн засаглалын шинэ систем буюу Удирдлагын дээд түвшнийг Удирдах зөвлөл, Захирлуудын зөвлөл (ТУЗ), Ерөнхий хороо гэсэн гурван түвшинт удирдлагад шилжүүлэх;
-Шинэ дүрэм. Удирдах зөвлөл, Захирлуудын зөвлөл, Ерөнхий хорооны эрх үүргийг зааглан тогтоох;
-Санал хураах зарчим. “Нэг орон-нэг санал” гэсэн санал хураалтын хуучин зарчмаас татгалзаж, олон хөгжлийн банкуудын жишгийн дагуу гишүүн орнуудаас банкны дүрмийн санд оруулсан хөрөнгийн хэмжээнээс хамаарсан санал хураалтын шударга зарчимд шилжих;
Иймд Олон улсын гэрээний тухай хуулийн 8 дугаар зүйлийн 8.2 дахь хэсэг, 9 дүгээр зүйлийн 9.1 дэх хэсэг, 10 дугаар зүйлийн 10.1 дэх хэсгийг тус тус үндэслэн Олон улсын хөрөнгө оруулалтын банк үүсгэн байгуулах тухай хэлэлцээр болон дүрэмд өөрчлөлт оруулах тухай 2014 оны протоколыг соёрхон батлах тухай хуулийн төслийг Улсын Их Хурлаар батлуулснаар энэхүү банкыг үүсгэн байгуулсан хэлэлцээр болон банкны дүрэмд оруулах өөрчлөлтийг хүлээн зөвшөөрч, банкны гишүүний эрх хадгалагдана хэмээн Засгийн газрын ХЭГ-ын дарга Г.Занданшатар онцоллоо.
Түүнчлэн Эдийн засгийн хамтын ажиллагааны олон улсын банк үүсгэн байгуулах, түүний үйл ажиллагааны тухай хэлэлцээр болон Банкны дүрэмд өөрчлөлт оруулах тухай 2014 оны протоколыг соёрхон батлах тухай хуулийн төслийг өргөн мэдүүлсэн юм.
Эдийн засгийн хамтын ажиллагааны олон улсын банк үүсгэн байгуулах, түүний үйл ажиллагааны тухай хэлэлцээр болон Эдийн засгийн хамтын ажиллагааны тухай олон улсын банкны дүрэмд 1970 оны 12 дугаар сарын 18, 1977 оны 11 дүгээр сарын 23, 1990 оны 12 дугаар сарын 18 болон 2014 оны 11 дүгээр сарын 25-ны өдрийн протоколоор тус тус нэмэлт, өөрчлөлт оржээ.
Иймд Олон улсын гэрээний тухай хуулийн 8 дугаар зүйлийн 8.2 дахь хэсэг, 9 дүгээр зүйлийн 9.1 дэх хэсэг, 10 дугаар зүйлийн 10.1 дэх хэсгийг тус тус үндэслэн Эдийн засгийн хамтын ажиллагааны олон улсын банк үүсгэн байгуулах, түүний үйл ажиллагааны тухай хэлэлцээр болон Эдийн засгийн хамтын ажиллагааны тухай олон улсын банкны дүрэмд өөрчлөлт оруулах тухай 2014 оны протоколыг манай улс соёрхон баталснаар банкны гишүүний эрх хадгалагдах юм байна хэмээн УИХ-ын Хэвлэл мэдээлэл, олон нийттэй харилцах хэлтсээс мэдээлэв.
-
2017 оны 11 сарын 28
УИХ-ын Нийгмийн бодлого, боловсрол, соёл, шинжлэх ухааны байнгын хороо, Боловсрол, соёл, шинжлэх ухаан, спортын яам хамтран “Багшийн хөгжлийн тухай хуулийн төсөл” сэдэвт хэлэлцүүлгийг өнөөдөр (2017.11.28) Төрийн ордонд зохион байгуулав.
Хэлэлцүүлэгт УИХ-ын дэд дарга Л.Энх-Амгалан, УИХ-ын гишүүн Г.Мөнхцэцэг, М.Оюунчимэг, Н.Учрал, УИХ-ын гишүүн, Засгийн газрын гишүүн, Хөдөлмөр нийгмийн хамгааллын сайд С.Чинзориг, УИХ-ын гишүүн, Засгийн газрын гишүүн, Боловсрол, соёл, шинжлэх ухаан, спортын сайд Ц.Цогзолмаа болон боловсролын салбарын багш, эрдэмтдийн төлөөлөл оролцсон юм.
Багшийн хөгжлийн тухай хуулийн төслийг танилцуулах хэлэлцүүлгийг нээж УИХ-ын дэд дарга Л.Энх-Амгалан үг хэлэв.
Багш хүн ард түмнийг соён гэгээрүүлэгч, хүүхэд залуучуудын оюун ухааныг хөгжүүлэгч, авъяас билгийг нээн илрүүлэгч, тэднийг амьдарч, хөдөлмөрлөх арга ухаанд сургаж, өөрийн биеэр үлгэрлэн хүмүүжүүлэгч байдаг. Тийм ч учраас өөрийгөө хөгжүүлэх таатай нөхцөлд ажиллах шаардлагатай байна гэж үгийнхээ эхэнд тэмдэглэлээ.
Тэрбээр “Багш хүнийг хөгжүүлэх арга хэрэгсэл үндэслэл муутай, хангалтгүй байгаа гэж үзэж “Багшийн хөгжлийн тухай” хуулийн төслийг өргөн мэдүүлсэн байна. Багшийн нийгэмд оруулж буй хувь нэмрийг бодитой үнэлэх асуудал нь тулгамдсан асуудлын нэг болоод байна. Үүнтэй холбоотойгоор багшийн нэр хүнд, ур чадварын үнэлэмж, багшийн ёс зүйд нийгмийн зүгээс өгч буй үнэлэмж буурч байгааг дурдах хэрэгтэй. Монгол Улсын Засгийн газар эдийн засгийн нөөц бололцоог ашиглан төрийн үйлчилгээний албан хаагчдын бодит орлогыг нэмэгдүүлэх хүрээнд хөдөлмөрийн үнэлэмж, хариуцлагатай нь холбох байдлаар 300 мянга хүртэлх төгрөгийг 2017-2018 онуудад олгохоор шийдвэрлэсэн. Багш болох сонирхолтой хүүхэд залуучуудыг сонгон шалгаруулж, төрөөс санхүүгийн дэмжлэг үзүүлэх, багшид ажлын ур чадвар, үр дүнд суурилсан урамшуулал олгодог тогтолцоотой болох, үүнтэй уялдуулан боловсролын чанарыг хэрхэн сайжруулах, багшийн хөгжлийн төвийг бүх шатны боловсролын байгууллагын дэргэд байгуулж, багшийг ажлын байрандаа тасралтгүй хөгжих боломж нөөцөөр хангах зэрэг заалтууд энэ хуулийн төсөлд туссан. Өнөөдрийн хэлэлцүүлэгт бүх шатны боловсролын байгууллагад ажиллаж байгаа багш нарын болон төрийн бус байгууллагын төлөөлөл оролцож байгаа бөгөөд хуулийн төсөлтэй холбоотой асуудалд өөрсдийн санал бодлоо чөлөөтэй илэрхийлэхийг хүсч байна” гэв.
Үргэлжлүүлэн Багшийн хөгжлийн тухай хуулийн төслийн талаарх танилцуулгыг УИХ-ын гишүүн Н.Учрал хийсэн юм. Мөн багш нарын цалин, нийгмийн баталгааг хэрхэн сайжруулахаар ажиллаж байгаа талаарх товч мэдээллийг УИХ-ын гишүүн, Засгийн газрын гишүүн, Хөдөлмөр, нийгмийн хамгааллын сайд С.Чинзориг оролцогчдод өглөө.
Дараа нь “Багшийн хөгжлийн олон улсын чиг хандлага” сэдвээр УИХ-ын гишүүн, Засгийн газрын гишүүн, Боловсрол, соёл, шинжлэх ухаан, спортын сайд Ц.Цолгзолмаа илтгэл тавилаа.
Тэрбээр “Дэлхийн түвшинд сэтгэж, 21-р зууны “Монгол хүний загвар”-ыг тодорхойлох, монгол хүнийг төлөвшүүлэх мэргэшлийн үндэсний хүрээг боловсруулах, түүнд суурилан боловсролын тогтолцоог бий болгох шаардлагатай. Мөн боловсролын салбарын удирдах ажилтнуудаас орчин үеийн менежментийг мэдэх, хэрэгжүүлэх, бодлогын түвшинд сэтгэх ур чадварыг суулгах шаардлага ч тулгарч байна” хэмээн онцлов.
Мөн “Багшийн хөгжлийн асуудлаар бусад улс орнуудын хуулийн зохицуулалт” сэдвээр Боловсролын хүрээлэнгийн захирал М.Итгэл, “Багшийн хөгжлийн төвийн үйл ажиллагаа, цаашдын чиг хандлага” сэдвээр МУБИС-ийн зөвлөх, академич Б.Жадамба, БМДИ-ийн албаны дарга Ш.Оюунцэцэг нар илтгэл тавьсан юм.
Үргэлжлүүлээд хэлэлцүүлэгт оролцогчид саналаа хэллээ. Тухайлбал, багш бэлтгэх төрийн нэгдсэн бодлоготой болох, хос мэргэжлээр багш бэлтгэх сургалтын хөтөлбөрийг хуульчилж өгөх, ур чадварын нэмэгдлийг эрх тэгш олгодог байх, цэцэрлэгийн багш нарт мэргэжлээ дээшлүүлэхэд дэмжлэг туслалцаа үзүүлдэг байх, сургуулийн захирлыг сонгон шалгаруулахдаа тухайн сургуулийн багш нараас сонгодог байх зэрэг асуудлыг хуулийн төсөлд тусгаж өгөхийг хүсч байлаа гэж УИХ-ын Хэвлэл мэдээлэл, олон нийттэй харилцах хэлтсээс мэдээлэв.
-
2017 оны 11 сарын 28
УИХ-ын гишүүн Ц.Нямдорж Хууль зүй дотоод хэргийн сайд ажлаа авсан даруйдаа С.Зоригийн хэргийг нууцын зэрэглэлээс гаргана гэдгээ мэдэгдсэн билээ.
-
2017 оны 11 сарын 28
Монгол Улсын Гадаад харилцааны сайд
-
2017 оны 11 сарын 28
“Хөдөлмөр, нийгмийн хамгааллын салбарын бүхий л үйл ажиллагаа олон түмэнд нээлттэй, ил тод байх ёстой. Манай салбарт тусламж дэмжлэг хүссэн хүмүүс ханддаг. Тэр хүмүүст ямар нэг чирэгдэл учруулахгүй, хүнд сурталгүй үйлчлэх үүргийг бид төрийн өмнө хүлээж байгаа. Тиймээс тавьсан асуудалд нь судлаад хариу өгье гэж хандах нэг ч албан тушаалтан энэ салбарт байх учиргүй” хэмээн Хөдөлмөр, нийгмийн хамгааллын сайд С.Чинзориг яам болон харьяа газрын удирдлагуудтай хийсэн уулзалтын үеэр онцгойлон анхааруулсан юм. Тэрбээр сайдын ажил авснаас хойш яам болон харьяа газрын удирлагуудтай тус тусад нь уулзаж байсан бол өнөөдөр нэлээд өргөн бүрэлдэхүүнтэй цуглуулан хуралдаж үүрэг даалгавар өглөө. Сайд салбартаа сахилга хариуцлагыг чангатгахад бүгд анхаарч ажиллах ёстойг сануулаад ажлын болон төсвийн сахилга батыг чанд сахиж, бүхий л үйл ажиллагаагаа ил тод нээлттэй явуулж, зөвхөн яам, харьяа газрууд гэхгүй суманд ажиллаж байгаа мэргэжилтнийг ч олон нийт иргэдээр ажлаа дүгнүүлдэг байхыг шаардана хэмээсэн.
Түүнчлэн төрийн албан хаагчидтай байгуулсан үр дүнгийн гэрээний биелэлт бодитой байх учиртайг сануулж ийш тийш нь бичиг шидэж дамжуулагчийн үүрэг гүйцэтгэснээ ажил хийсэн нэр зүүхийг яав ч хүлээн зөвшөөрөхгүй гэдгээ хэлсэн юм.
С.Чинзориг сайд ажилгүйдэл, ядуурал, хүчирхийллийг бууруулахад салбарын бодлогыг чиглүүлж ажиллахын тулд нэн тэргүүнд анхаарах зүйлүүдийг нэг бүрчлэн тайлбарлаж, холбогдох газруудын дарга нарт тодорхой үүргүүдийг өгсөн. Тухайлбал, ажилгүй, ядуу иргэдийн судалгааг хүн нэг бүрээр нарийвчлан гаргаж ур чадварт тохирсон хөдөлмөр эрхлэлтийн бодлого явуулах, зохион байгуулалттай ажлын байрыг дэмжих, ажлын байрыг хадгалах зэрэг арга хэмжээг Ажилгүйдлийн даатгалын сантай уялдуулах арга хэмжээний төлөвлөгөөг ойрын хугацаанд гаргахыг даалгалаа. Ядуурлыг бууруулах үндэсний хөтөлбөр боловсруулж иргэдийг ядуурлаас хамгаалах үйл ажиллагааг санаачлан хэрэгжүүлэх нь ХНХЯ, харьяа газруудын хийх ёстой ажил. Гэр бүлийн хүчирхийлэл, ялангуяа бага насны охид хүчирхийллийн золиос болж буй аймшигт хэргүүд гарч олон нийтийг түгшээж байгаад дүгнэлт хийж урьдчилан сэргийлэх, соён гэгээрүүлэх ажлыг далайцтай явуулах, эцэг эх, олон нийтийн оролцоотойгоор хүчирхийллийг бууруулахад анхаарч ажиллахыг сануулав.
Хүүхдийн асрамж халамжийн төвүүдийн үйлчилгээний стандартыг шинэчлэх, асрамжийн төвд хүмүүжсэн хүүхдийг бие даан амьдрах чадварт сургах, насанд хүрсэн ч амьдралд хөлөө олоход нь туслах хүүхэд хөгжил, хамгааллын шинэ үйлчилгээг нэвтрүүлэхийг холбогдох албаныханд үүрэг болголоо. Мэргэжлийн боловсрол сургалтын салбарыг сайжруулахад чиглэсэн дорвитой шийдвэрийг Засгийн газраар гаргуулах, Монголбанк, арилжааны банкуудтай хамтран ажиллаж зээлийн хүүг бууруулах боломжийг судлах, шахаж шаардах ажлыг ч хийх ёстой гэлээ.
Ирэх оноос хэрэгжиж эхлэх хуулиудтай холбоотой тооцоо судалгаа, дүрэм журмыг яаралтай гаргаж батлуулах үүргийг ч өгсөн. Тэдгээрт, хүүхдээ асарч буй ээж, өрх толгойлсон эцэг эхэд олгох мөнгөн тэтгэмж, малчдын тэтгэврийн насыг наашлуулан тооцох, ОУВС-тай тохирсон тэтгэврийн насыг жилд зургаан сараар нэмж тооцох аргачлал зэргийг ойрын хугацаанд бэлэн болгох ёстойг ч анхааруулсан юм. Мөн хөдөлмөр, нийгмийн хамгааллын салбарт хэрэгжиж буй гадны төсөл хөтөлбөрүүдийг хүнд наалдсан, бодитой үр дүнтэй байлгахад үйл ажиллагаагаа чиглүүлж, дарга нарын гадаад томилолтыг эрс хязгаарлахаа ч дуулгалаа.
-
2017 оны 11 сарын 28
Багшийн хөгжлийн тухай хуулийн төслийг
-
2017 оны 11 сарын 28
Хөдөлмөр, нийгмийн хамгааллын сайд С.Чинзориг Монголын Хараагүйчүүдийн үндэсний холбооны удирдлагуудыг хүлээж авч уулзлаа. Тэд сайдтай биечлэн уулзаж хөгжлийн бэрхшээлтэй иргэдийн талаар баримтлах бодлого, үйл ажиллагааны чиглэлээр болон харааны бэрхшээлтэй иргэдэд тулгарч буй асуудлуудыг шийдэх арга замын талаар санал солилцож дэмжлэг хүсэхээр ирснээ танилцуулсан.
9000 гаруй гишүүнийг эгнээндээ нэгтгэсэн Хараагүйчүүдийн үндэсний холбоо дэргэдээ үйлдвэрлэл явуулах замаар хүмүүсийнхээ хөдөлмөр эрхлэлтийг дэмжиж тэр хэрээр амьдралд нь тус нэмэр болдог. Төрөөс үйлдвэрлэлийг нь дэмжсэний үр дүнд 2012 онд 2,0 тэрбум төгрөгийн борлуулалт хийж байсан ч сүүлийн жилүүдэд үйлдвэрлэлийнх нь гол чиглэл монгол гэрийн борлуулалт муудаж, эргэлтийн хөрөнгөгүйн улмаас үйлдвэрлэлээ хэвийн явуулах боломжгүй болж эдийн засгийн хувьд бие даан хөгжих боломж хомсдсоныг сайдад учирлаж байв. Монгол гэрийн үйлдвэрлэл ашиг муутай болсон тул чиглэлийг нь өөрчлөх арга хайж ариун цэврийн цаасны жижиг үйлдвэр байгуулахаар ажиллаж байгаа гэнэ. Мөн цаасан дугтуйны үйлдвэр, оёдлын цех, “Вест массаж”-ны сүлжээгээр л бага зэргийн орлого олж байгаа аж. Тиймээс хөгжлийн бэрхшээлтэй иргэдийн үйлдвэрлэсэн бараа бүтээгдэхүүний борлуулалтад төр дэмжлэг үзүүлдэг байхад анхаарч өгөөч гэдэг саналыг тавьсан юм. Буцалтгүй тусламж гэхээсээ илүү бага хүүтэй, урт хугацаатай хөнгөлөлтэй зээлд хамрагдаж чадвал эдийн засгийн хүндрэлтэй байгаа өнөөгийн нөхцөлд төр засагт дарамт үүсгэхгүйгээр үйл ажиллагаагаа явуулаад байх боломж бий гэсэн.
Хараагүй хүмүүсийн дийлэнх нь халамжлуулагч байхыг хүсдэггүй бөгөөд өөрсдийн боломж бололцоо бүрийг ашиглан ажиллаж хөдөлмөрлөхийг хүсдэг ч харамсалтай нь ажлын байр олддоггүй тухай ярьсан Хараагүйчүүдийн хөдөлмөр сургалтын төвийн захирал З.Болдсайхан “Таны 2015 онд Хөдөлмөрийн сайдаар ажиллаж байхдаа Хараагүйчүүдийн үндэсний холбооны дэргэд МСҮТ байгуулж, сургалт явуулах зөвшөөрлийг нь өгсний ачаар олон хүн мэргэжилтэй болж буйд манайхан баяртай байдаг” хэмээсэн.
Хараагүйчүүдийн үндэсний холбооны ерөнхийлөгч Д.Гэрэл хөгжлийн бэрхшээлтэй иргэдийн талаар гаргаж байгаа шийдвэрийн талаарх мэдээллийг цаг алдалгүй авч байх хүсэлтээ илэрхийлсэн бөгөөд ингэж чадвал өөрсдийнхөө эрх ашгийн төлөө саналаа төрийн бодлогод тусгуулахад дөхөмтэй байна хэмээн үзэж буй аж.
Тэдний тавьсан бас нэг санал нь хараагүй хүмүүсийн хамгийн наад захын хэрэгцээ болсон туслах хэрэгслийн жишиг үнийг шинэчлэн тогтоож зах зээлд ойртуулж өгөх байлаа. Ирэх оноос туслах хэрэгслийг тендергүйгээр нийлүүлэх болсноор үнэ болон чанарын хувьд сөрөг тал гарч болохыг тус холбооныхон ярьсан. Харааны бэрхшээлтэй иргэдийн дийлэнх нь халамжийн тэтгэврээр амьдардаг тул тэтгэврийг дор хаяж 40 хувиар нэмэгдүүлэх хэрэгтэйг ч хэлсэн.
С.Чинзориг сайд тэдний саналыг нэг бүрчлэн сонсоод ойрын үед хөгжлийн бэрхшээлтэй иргэдийн талаар авах зарим арга хэмжээний талаарх мэдээллийг хуваалцлаа. ХНХЯ-наас төрийн болон төрийн бус байгууллагуудтай хамтран боловсруулсан Хөгжлийн бэрхшээлтэй иргэдийн үндэсний хөтөлбөрийг Засгийн газраар хэлэлцүүлэхээр ажиллаж байгаа. Халамжийн тэтгэврийн хэмжээг амьжиргааны баталгаажих түвшинтэй уялдуулан нэмэгдүүлж байх ёстой гэдэг байр суурийг УИХ-ын гишүүнийхээ хувьд парламентад байнга илэрхийлж ирсэн. Сайд болоод ч энэ байр сууриа өөрчлөөгүй гэдгээ С.Чинзориг сайд тэдэнд дуулгасан. Тиймээс энэ чиглэлийн хууль эрх зүйн орчныг боловсронгуй болгох ажлыг ойрын хугацаанд хийнэ гэлээ. Мөн бүтээгдэхүүн борлуулах, зээлийн суваг нээх зэрэг асуудлыг шийдэх гарцыг олж шийдвэрлэх үүргийг холбогдох газар, хэлтсийн дарга нарт өглөө.
БНХАУ-ын буцалтгүй тусламжаар барих хөгжлийн бэрхшээлтэй иргэдийн спорт цогцолбор, Хөгжлийн бэрхшээлтэй хүүхдийн хөгжлийн төвд шаардлагатай гүүрэн гарцны газрын асуудлыг шийдвэрлүүлэх, МҮХАҮТ, МАОЭНХ-той хамтран хөгжлийн бэрхшээлтэй иргэдийн хөдөлмөр эрхлэлтийг сайжруулахад чиглэсэн үйл ажиллагааг зохион байгуулах гэж байгаа зэрэг олон мэдээллийг сайд өгсөн бөгөөд энэ бүхнийг хийхэд иргэдийн өөрсдийнх нь оролцоо чухал гэдгийг онцолсон юм.
-
2017 оны 11 сарын 28
11 дүгээр сарын 28-ны Мягмар гарагт:
-
2017 оны 11 сарын 27
УИХ-ын Аюулгүй байдал, гадаад бодлогын байнгын хорооны хуралдаан өнөөдөр
-
2017 оны 11 сарын 27
УИХ-ын Тамгын газар, НҮБ-ын Хөгжлийн хөтөлбөр хамтран Швейцарын Хөгжлийн агентлагын дэмжлэгтэйгээр “Монгол Улсын төлөөллийн байгууллагыг бэхжүүлэх нь” төслийг хэрэгжүүлж байгаа билээ.
Энэ хүрээнд харилцан туршлага судлах, семинар зохион байгуулахаар Швейцарын Холбооны Улсын парламентын Тамгын газрын Парламентын техникийн хамтын ажиллагааны төслийн менежер Александре Фүзесери тэргүүтэй төлөөлөгчид монголд хүрэлцэн ирээд байна. Төлөөлөгчдийг УИХ-ын Тамгын газрын Ерөнхий нарийн бичгийн дарга Ц.Цолмон өнөөдөр (2017.11.27) хүлээн авч уулзан, хамтын ажиллагааг хэрхэн өргөжүүлэх талаар санал солилцлоо.
Хоёр орны парламент болон Тамгын газруудын харилцаа, хамтын ажиллагаа өргөжиж байна. Харилцан туршлага судлах, семинар зохион байгуулахаар ирсэн та бүхэнд талархлаа илэрхийлье гэж УИХ-ын Тамгын газрын Ерөнхий нарийн бичгийн дарга Ц.Цолмон үгийнхээ эхэнд тэмдэглээд УИХ-ын Тамгын газрын үйл ажиллагааны талаар товч мэдээлэл хийв.
Ноён Александре Фүзесери хүлээн авч уулзаж байгаад нь УИХ-ын Тамгын газрын Ерөнхий нарийн бичгийн дарга Ц.Цолмонд талархал илэрхийлээд хуримтлуулсан туршлага мэдлэгээ хуваалцахад бэлэн байгаагаа илэрхийллээ.
Тэрбээр “Швейцарын парламентын Тамгын газар бусад улс орны парламенттай солилцооны хөтөлбөрийг хэрэгжүүлдэг. Сургалт гэхээсээ илүүтэй харилцан туршлага солилцоход анхаарч ажилладаг. Энэ нь сургалт явуулахаас илүү үр дүнтэй байдаг” гэв.
Уулзалтад Швейцарын Холбооны Улсын парламентын Тамгын газрын Нийгмийн бодлого, эрүүл мэндийн байнгын хорооны Бодлогын зөвлөх Мариа Стосич, Тээвэр, харилцаа холбооны байнгын хорооны дэд нарийн бичгийн дарга Ирис Холлингер, Аюулгүйн бодлогын байнгын хорооны Бодлогын зөвлөх Вера Тронг, Хяналт шалгалтын нэгжийн дарга Никола Грожан, тус нэгжийн Төслийн зохицуулагч Феликс Штребел болон УИХ-ын Тамгын газрын Хууль, эрх зүйн хэлтсийн дарга Э.Түвшинжаргал нарын албаны хүмүүс байлцав гэж УИХ-ын Хэвлэл мэдээлэл, олон нийттэй харилцах хэлтэс мэдээллээ.
-
2017 оны 11 сарын 27
Монгол Улсын Шадар сайд Ө.Энхтүвшин 2017 оны 11 дүгээр сарын 27-ны өдөр Мэргэжлийн хяналтын байгууллагын албан хаагчидтай уулзаж, санал бодлыг нь сонсон, үүрэг, чиглэл өглөө.
Шадар сайдын эрхлэх асуудлын хүрээний агентлагууд хоорондоо уялдаа холбоотой ажиллах нь чухал байгааг тэрээр тэмдэглэв. Мэргэжлийн хяналтын байцаагч нар бизнес эрхлэгчид, аж ахуйн нэгжийг хянаж шалгадаг, торгож шийтгэдэг хуучирсан арга барилаас аль болох татгалзаж, зөвлөн тусладаг, соён гэгээрүүлдэг байхыг санууллаа.
Ард иргэд, аж ахуй эрхлэгчидтэй уулзан, санал бодлыг нь сонсож, асуудлыг нь амьдралд ойрхон, бодитойгоор шийдвэрлэх, зөвшөөрөл, гэрчилгээ, мэдэгдэл олгох зэргээ хялбаршуулж, хугацааг нь богиносгох, өргөдөл, гомдлыг шуурхай барагдуулж байхыг зөвлөв.
Улсын байцаагч өөрөө мэдлэг боловсрол сайтай, харилцааны өндөр соёл, ёс зүйтэй байж бусдаас хууль, дүрэм, журам сахин биелүүлэхийг шаардах эрхтэй гэдгийг ч санууллаа.
Үндэсний аюулгүй байдлыг хангах тусгайлсан чиг үүрэгтэй байгууллагын хувьд иргэдийн ажиллаж амьдрах орчин, эрүүл мэнд, хүнс, хөдөлмөр, хүрээлэн буй орчны аюулгүй байдал улсын байцаагч нараас шалтгаална гэлээ.
Мэргэжлийн хяналтын нэгдмэл тогтолцоог хэвээр хадгалах, санхүүгийн хяналтыг энэ байгууллагад буцааж шилжүүлэх, холбогдох хуулиудад өөрчлөлт оруулах, нэр бүхий аймгуудын Мэргэжлийн хяналтын газрын барилгыг засварлах, техник хэрэгслийг шинэчлэх зэргийг улсын байцаагч нар хүслээ. Эдгээрийг боломж, бололцооны хэрээр шийдвэрлэнэ гэдгээ Шадар сайд Ө.Энхтүвшин хэлээд Мэргэжлийн хяналтын байгууллагыг бүх талаар дэмжиж ажиллана гэлээ хэмээн Засгийн газрын Хэвлэл мэдээлэл, олон нийттэй харилцах хэлтсээс мэдээллээ.
