Хэрэгтэй хэрэггүй, бусдын сэтгэлзүйд нөлөөлөхүйц мэдээллүүд сүүлийн өдрүүдэд ихээр түглээ.  Уншсан, сонссон хэнийг ч болов тэрхүү мэдээллүүд багагүй түгшээж орхив.

-Үл таних эмэгтэйд тариулсан бүсгүй амиа алджээ-

Өнгөрөгч амралтын өдөр фэйсбүүк хуудсаар цацагдсан “Оройн цагаар гэртээ харих гэж явсан эмэгтэйн биед үл таних этгээд тариа хийсний улмаас 26 настай бүсгүй нас барлаа” гэх мэдээлэл. Үүнийг уншсан эмэгтэйчүүдийн олонход нь түгшүүр төрсөн гэхэд хилсдэхгүй болов уу. Фэйсбүүкийн хэрэглэгч охид, бүсгүйчүүд “Болгоомжил, сэрэмжил” гэж бичээд бусадтай хуваалцаж байсан.

    Харин энэхүү үйлдэлд хууль сахиулагчид анхаарал хандуулж, цагдаагийн байгууллагаас уг мэдээллийг тараасан Э гэгчийг шалгахад өөрийнх нь бичсэн мэдээлэл худал гэдгийг хэлсэн. Ажлаасаа чөлөө авах гэсэн нэгний башир арга эцэстээ ийн олон хүнийг сэтгэлзүйд нөлөөлөв.

-ДОХ-ын халдвартай цус шахсан жимс-

     Өнгөрсөн долоо хоногийн яг өдийд фэйсбүүкчид “ДОХ-ын халдвартай цус шахсан жимс орж иржээ” гэж биесээ айлгав. “Ийм юм байх боломжгүй” гэсэн нэгийгээ “Тэгвэл чи идээд үзэхгүй юу” гэж тавласан нь ч харагдсан. Хамгийн гол нь тэр жимс нь хаанаас хаана ирсэн, ийм явдал хэзээ хэнд тохиолдсон нь тодорхойгүй, харсан хүн бүр түгээсээр анх фэйсбүүкт оруулсан эзнийг нь олоход ч бэрх болсон байв. Аль, аль талын мэргэжлийн эх сурвалжуудаас тодруулахад “Ийм зүйл байх боломжгүй” гэсэн хариулт өгсөн. Үүнийг бататгаж МХЕГ-аас худал мэдээлэл, ийм зүйл огт байхгүй гэдгийг онцлов.

Фэйсбүүк бол хүссэн хүн бүр хэрэглэж болохоор нас, хүйс, мэргэжил, боловсрол харгалзахгүй дэлхийн хэн бүхэн буй том орчин. Зөвхөн манай улсын иргэдийн 35 орчим хувь нь энэхүү цахим хуудсын хэрэглэгч гэсэн судалгаа байдаг.

Хязгаар, хяналт багатай энэ орон зайд санаатайгаар болон санамсаргүйгээр олны ам дамжсан хов жив, цуу яриаг өөрт тохиолдсон мэтээр худал мэдээлэх сонирхолтой хүн олширчээ.

Одоогийн байдлаар хуудал цуурагчийг шалгаад захиргааны хариуцлага хүлээлгэж торгууль ногдуулах эсвэл баривчлах шийтгэл хүлээлгэж байна. Харин худал мэдээллийн улмаас бусдад онц их хэмжээний хохирол учирсан, хүний амь нас хохирсон бол эрүүгийн хариуцлага хүлээлгэх хууль үйлчилж байгаа. Иймээс санаатай эсвэл санамсаргүйгээр худал мэдээлэл тарааж, хүний сэтгэл санаагаар “наадах” цуурхагчдад хүлээлгэх хариуцлагыг чангатгахыг олон нийт уриалж эхэллээ.

24tsag.mn