Баянгол дүүргийн XIV хорооны 16 дугаар байрны хажууд барилга барихаар газар ухсанаас болж тус байр хазайж нурах аюулд хүрсэн хэмээн оршин суугчдыг түр нүүлгэн шилжүүлээд байгаа билээ. Тус байрыг цагдаагийнхан хамгаалалтад авч Мэргэжлийн хяналтын ерөнхий газраас ажлын хэсэг гарган хяналт шалгалт хийсэн байна.

Мэргэжлийн хяналтын улсын байцаагч нар эхлээд 16 дугаар байрны дөрвөн булан болон арван цэгт түр тэмдэг тавиад геодезийн хэмжилт хийжээ. Ингээд барилгын оройн хэсгийг суурийн хэсэгтэй харьцуулж үзэхэд дөрвөн см хазайлттай гарсан аж. Энэ нь шинээр баригдах барилгын эсрэг тал руу хазайсан дүгнэлт гарчээ. Тодруулбал, тус барилга дөрвөн см хазайсан нь “БИ ЖИ БИ ЖИ” компанийн ухсан суурийн нүхтэй ямар ч холбоогүй аж. Анх барихдаа дөрвөн см хазайлгаж барьсан ч байж магадгүй гэнэ. Мөн барилга байгууламжийн төлөв байдалд ямар нэгэн эвдрэл гэмтэл, хэв гажилт үүсээгүй хэмээн дүгнэжээ.

Гэхдээ тус байрны хөрсөнд бэхэлгээ, хүчитгэлийг яаралтай хийх юм байна. Үүний дараа оршин суугчдыг орон сууцанд нь оруулах боломжтой бөгөөд зочид буудлуудад байрлаж байгаа иргэдийг долоо хоногоор хугацааг нь сунгажээ.

Д.Дуулим