Манай улсын чөлөөт бөхийн шигшээ багийн тамирчид, дасгалжуулагчдын хамт энэ сарын гуравны өглөө Бээжингээр дамжин Дубай хот руу ниссэн.

Гэтэл Бээжингийн нисэх онгоцны буудал дээр бичиг баримтаа шалгуулахад ямар нэгэн зөрчил илрээгүй ч  Дубайгаас цааш хөдлөх гэтэл Манай шигшээ багийн дасгалжуулагч Б.Баяраа, тамирчин Д.Худэрбулаг, Н.Золбоо, Готбодорж нарыг визний зөрчилтэй хэмээн саатуулсан талаар бид өмнө нь мэдээлж байсан. Тэгвэл манай шигшээ багийн тамирчид эх орондоо ирж мэдээлэл хийсэн юм.  

Манай тамирчид багшийн хамтаар визний зөрчлийн учрыг олохоор Катарын чөлөөт бөхийн холбооноос тодорхой хариу ирэхийг нь хүлээж байтал тус нисэх буудлын гаалийн ажилтнууд бидний визийг хуурамч байна гээд бүх бичиг баримтыг нь хурааж авчээ. Уг нь виз дээрх овог нэр, гадаад паспортынх нь дугаар таарч байсан ч дугаарыг нь компьютерт оруулахаар манай гурван тамирчны нэр биш өөр хүний нэр гарч ирээд байсан аж.

Үүнээс үүдэж гаалийн ажилтнууд нь асуудлын үнэн мөнийг олохын оронд манай тамирчидтай гэмт хэрэгтэнтэй харьцаж байгаа юм шиг хандсан гэдгийг эрэгтэйчуудийн шигшээ багийн дасгалжуулагч Б.Баяраа мэдээлсэн.  Түүнчлэн манай шигшээ багийнхнаас “Та нарын хэн нь Катарын чөлөөт бөхийн холбоотой холбогдож, хуурамч виз авсан бэ” гэж хүртэл асуусан аж.

Тиймээс визний зөрчилтэй хэмээгдсэн тамирчид “Бид яагаад хуурамч визтэй явж байгаагаа мэдэхгүй байна. Та нар Монголын Элчин сайдын яам, Монголын Чөлөөт бөхийн холбооны удирдлагуудтай холбогдож, бид нарын талаар мэдээлэл өгнө үү. Эсвэл бид өөрсдийн байгаа орчин нөхцөл, тулгараад байгаа асуудлын талаар ЭСЯ, МЧБХ-нд дуулгах хэрэгтэй байна” гэж гуйж, зөвшөөрөл аваад фэйсбүүк хуудаснаа өөрсдийн талаар бичсэн байна.

Манай шигшээ багийн гурван тамирчин дасгалжуулагчийн хамт Бээжингийн нисэх онгоцны буудал дээр дахин саатуулагдсаныхаа дараа Чөлөөт бөхийн холбооны Ерөнхий нарийн бичгийн дарга О.Баянмөнхтэй холбогдож “Бээжингийн ЭСЯ- тай холбогдоод, бидэнд туслах арга хайгаад өгөөч” хэмээн гуйсан байна. Харин О.Баянмөнх дарга “Бээжин хотод суугаа Монголын ЭСЯ-тай холбогдчихлоо. Ямар ч боломж байхгүй гэнэ. Наанаа хоригдож байгаад маргааш нисээрэй” хэмээн хээв нэг хэлээд утсаа тасдаж орхисон аж.

Гэтэл тамирчид таван цаг саатуулагдсаныхаа дараа Монголын ЭСЯ дээр очиж, Элчин сайд Ц.Сүхбаатартай уулзахад “МЧБХ-ноос ЭСЯ-тай огт холбоо бариагүй” гэжээ. Ийнхүү худал хэлж, тамирчдаа солиосонд гаргаж байгаа нь үнэхээр харамсалтай Чөлөөт бөхийн холбооны удирдлагуудын увайгүй үйлдэл үүгээр зогссонгүй.

Чөлөөт бөхийн холбооны гадаад харилцаа хариуцсан, шүүгч н.Төмөрбаатар гэгч нь Дубайд манай дөрөв тамирчинтай таарчээ. Гэсэн ч “Та нарын тухай сонссон” гэж хэлчихээд л хаяад явчихсан байна. Уг нь гадаа харилцаа хариуцсан гэх гуншингийн хэрэг юу билээ. Уг нь тамирчдынхаа төлөө гүйх л хүмүүсийн нэг байлтай. Гэтэл тэгсэнгүй. Энэ юуны учир, хэний төлөө вэ гэдэг нь ч бас эргэлзээ төрүүлэх шиг.

Түүнчлэн Дубайд 36, Бээжинд таван цаг хоригдсон багш, гурван тамирчны талаар МЧБХ-ны ерөнхийлөгч Д.Дагвадорж “Тамирчдаа Бээжин рүү будаачихлаа. Кувейтын ЭСЯ-ныхандаа баярлалаа” гэж твиттертээ бичиж олны талархалыг хүлээж байсан. Гэтэл үнэн хэрэгтээ яг тэр үед манай тамирчид багшийнхаа хамтаар харийн нутагт хуурамч визтэй хэмээн чичлэгдэн хоригдож, хүйтэн шалан дээр хэвтэж байсан байна. Юуны учир ийнхүү худал мэдээлэл түгээж, олны тархийг угааж байсан нь ч үнэхээр хачирхалтай.

Хэдийгээр манай шигшээ багийнхан дөрөвдүгээр байрт орсон ч чамлахааргүй амжилт. Гэхдээ визний асуудлаас болж тэмцээнд оролцоогүй саатуулагдсан тамирчид барилдсан бол нэгдүгээр байр эзлэх байсан гэдгийг таах аргагүй юм.

Олон сар, жил хүч хөдөлмөр, хөлсөө урсгаж бэлтгэл хийснийхээ төлөө тамирчид, дасгалжуулсаныхаа төлөө тэд хүний нутагт яахаа мэдэхгүй ёстой тэнгэр хол газар хатуу гэдэг үгийг яс махандаа шингэтэл ойлгон хоригдсон нь үнэхээр харамсалтай.

Ер нь Монголын Чөлөөт бөхийн холбоо нэг бус удаа алдаа гаргаж тамирчдаа золиослож байгаа нь олны дургүйцлийг төрүүлээд байгаа нь нууц биш.  

Д.Дагвадорж аваргыг хайрлаж хүндэлдэггүй Монгол хүн гэж ховор. Гэтэл хайр, хүндлэлийн хариуд энэ мэтээр удирдсан салбарын тамирчид, багшийг золиослож, худал мэдээллээр өөрийн нэр хүндийг өсгөх гэж оролдсоныг эх орон элгэн садандаа ирсэн шигшээ багийнхан илчиллээ. Үнэхээр ч энэ мэт асуудлыг дуугүй өнгөрч яахан болох билээ. 

Б.Батчимэг

www.24tsag.mn