Улаанбаатар хотоос 35 километрийн зайд Туул голын сав газрыг түшиглэн үйл ажиллагаа явуулдаг загас үржүүлгийн “Хилэм ост” компанийн үйл ажиллагаатай танилцлаа.

“Хилэм ост” загас үржүүлгийн аж ахуй нь 2002 онд байгуулагдан үйл ажиллагаа явуулж байгаа. Тус компани нь загас үржүүлгийн байр, лаборатори байгуулан шинжлэх ухааны үндэслэлд тулгуурлан шинэ арга технологиор үнэт хар түрс бүхий хилэм болоод бусад тэмжээллэг загасыг өсгөн үржүүлдэг байна.

Одоогоор 17 төрлийн загас үржүүлж байгаа бөгөөд 08 дугаар сараас жилдээ 10-25 мянган тонн загасыг Улаанбаатар хотын хэрэглэгчдийн хүнсний хэрэгцээнд нийлүүлэхээр ажиллаж байгаа болохыг тус компанийн захирал Б.Алтаншанд бидэнд танилцуулсан.

Засгийн газраас 3 дахь жилдээ хэрэгжүүлж буй “Загас” дэд хөтөлбөрт "Хилэм ост" компани хамрагдаснаар 1.7 тэрбум төгрөгийн зээл авсны 200 сая төгрөг нь Чингис бондын эх үүсвэрээс, 200 сая нь Улаанбаатар хотын жижиг дунд үйлдвэрлэлийг дэмжих сангийн зээлээр санхүүжүүлсэн байна.

Мөн олон улсын байгууллагын төсөл хөтөлбөрүүдийг амжилттай хэрэгжүүлэн, техникийн туслалцаа авсан бол 2014 оноос БНХАУ-ын Засгийн газар, Монгол Улсын Засгийн газар хоорондын хамтарсан “Өмнөд, өмнөдийн хамтын ажиллагааны төсөл”-д хамрагдан техник, арга зүйн туслалцаа авч байгаа гэв. Энэ төслийн хүрээнд ойрын хугацаанд 6000 ширхэг хилэм загасны жагамхайг БНХАУ-аас авч ирэхээр төлөвлөөд байгаа аж. 

“Хилэм ост” ХХК өөрсдийг нь  зориод ирсэн хүмүүст таксаа төлөөд загас барих боломжийг олгодог байна. Тэдний такс нь бүтэн өдрийн турш 15 мянган төгрөг бөгөөд тухайн өдөртөө хичнээн загас барих нь хамаагүй түүнийгээ авах эрхтэй байдаг гэдгийг компанийн ерөнхий менежер Л.Норжмаа танилцуулж байсан.

Энэ нь нэг талаар монголчуудынхаа эрүүл мэнд нөгөө талаар загас үржүүлгийн аж ахуйн ажлаа танилцуулах зорилгоор таксаа ийнхүү багаар үнэлсэн байна.  

Хилэм загасны мах нь амтлаг, хар түрс нь дэлхийд өндөр үнэлэгддэг. Хилэм загасны хар түрс 35-50 гр нь дэлхийн зах зээл дээр 100 ам.доллараар худалдаалагддаг байна.

Нэн ховордсон хилэм загасыг ийнхүү үржүүлж байгаа нь нэг талаараа байгалийн нөхөн сэргээлт хийж байгаа зүйл юм. Энэ ажлыг хийхэд уйгагүй хөдөлмөр, урт хугацаа шаардагддаг. Тэд 13 жилийн туршид өсгөж үржүүлж байж, сүүлийн хоёр жилээс л зах зээлд нийлүүлж эхэлсэн байна.

Эхний ээлжинд Улаанбаатар хотын иргэддээ загасан бүтээгдэхүүн нийлүүлэх, цаашдаа Монголынхоо хүн амыг эрүүл аюулгүй органик хүнсээр хангах зорилт тавиад ажиллаж байгаа аж.