Үндэсний үйлдвэрлэл эрхлэгчид өнөөдөр Чингисийн талбайд жагсаал хийлээ. УИХ-аар Аж үйлдвэрийн салбарт төрөөс баримтлах бодлогын баримт бичгийг хэлэлцэж байгаа. Мөн Үйлдвэржилтийг дэмжих тухай хуулийн төслийг хэлэлцэж эхэлсэн билээ. Үйлдвэрлэл эрхлэгчид эх орныхоо үйлдвэрлэлийг хөгжүүлэх, дотоодын үйлдвэрлэлийг дэмжих зорилготой уг хуулийг яаралтай батлахыг шаардаж, ийнхүү Чингисийн талбайд цугласан аж. Жагсаал, цуглааныг Монголын Зохион бүтээгчдийн нэгдсэн холбоо, Баялаг бүтээгчдийн холбоо, Төмөрлөг, машин үйлдвэрлэлийн үндэсний холбоо болон Хөдөө аж ахуйн техникийн Шинжлэх ухаан, технологи үйлдвэрлэлийн нэгдлүүд хамтран зохион байгуулжээ.
Жагсаалд оролцож буй залуусаас “Монгол залуус яагаад экспортолж болохгүй гэж. Баялаг бүтээгчид болж байж бид Монгол Улсын хөгжилд хувь нэмэр оруулмаар байна. Биднийг дэмжээд, туслаад өгөөсэй гэдэг үүднээс цугласан. Өнөөдөр аж үйлдвэрийн хууль батлагдана. Энэ дээр ухаалаг зөв хандаасай гэж бодож байна. Энэхүү хуулинд дотоодын аж үйлдвэрийг дэмжих зүйл нарийн тусгагдаагүй байна лээ. Хөнгөлөлттэй зээл өгнө гэдэг үйлдвэрлэгчдэд маань маш ашигтай. Гэтэл энэ бүхэн хуулиндаа нарийн тусгагдаагүй байсан. Хэтэрхий үндэсний үзэл битгий гаргаач гэдгийг ч хэлмээр байна”
Монголын зохион бүтээгчдийн нэгдсэн холбооны ерөнхийлөгч Д.Жаргалсайханаас өнөөдрийн жагсаалын талаар тодруулахад “ “Ажлын байрыг олноор бий болгох зорилготойгоор Аж үйлдвэрийн яамны гаргаж байгаа санааг дэмжиж байгаа.. Тэгэхээр Монголд өнөөдөр ажлын байрны хомсдолтой, маш олон залуус ажилгүйн улмаас гадаадруу гарчихсан байдалтай байгаа. Олон хүн амьжиргааны доогуур нөхцөлд амьдарч байгаа зэрэг эдийн засгийн хүндрэлтэй нөхцөл байдал үүссэн байгаа. Тэгэхээр үндэсний үйлдвэрлэлийг дэмжиж байж ажлын байр бий болгох чухал. Тэр утгаараа өнөөдөр УИХ дээр хэрэгжиж байгаа үйлдвэрчдийн тухай хуулийг Монгол хүнд, монголын баялаг бүтээгчид, Монголын компаниудад ээлтэй гаргаач гэсэн хүсэлт дуу хоолойгоо гаргаж байна.
Өнөөдрийн жагсаалд 10-иад компани, 300-гаад хүн цуглаж байна. “Аж үйлдвэрийг дэмжих ард түмний холбоо” цаашид ажлаа улам эрчимжүүлнэ. Бид намраас 10 мянга, 100 мянган хүнтэй акцууд зохион байгуулна. Өнөөдөр бол дөнгөж үйлдвэржилтийн эхний хучилт босч байна. Энэ хучилт цаашдаа бамбар, түүдэг болж асна. Ингэснээр Монголын нийгэмд харанхуйлаад байгаа ажилгүйдэл байхгүй болно. Бид бүхэн өөрсдөө зүтгэж байж монгол улс хөгжинө. Монгол хүнээ дэмжиж байж Монгол орон хөгжинө. Тиймээс үндэсний үйлдвэрлэгчдээ дэмжээрэй гэж хэлмээр байна” гэв.
Д.Ундрах /24tsag.mn/
