Улаанбаатарт хавар иржээ. Урин цагийн аяс хотын өнгөтэй ижилсэж Улаанбаатарт хавар иржээ. Хахир өвөл “хаалгаа хаасан”-ы баяр хаа сайгүй. Барилгын салбар, хөдөө аж ахуй, боловсролын салбар ч хаврын их ажлын хөлд дарагдсан урин өдрүүд иржээ.
Үүний нэг нь “Улаанбаатар Элит” олон улсын сургуулийн зохион байгуулж байгаа “World scholar’s cup” олон улсын тэмцээн. Энэ удаагийн тэмцээнийг “Шинэ дэлхий” сэдвийн хүрээнд зохион байгуулж байгаа юм.
Цар тахлын хоёр жилд хязгаарлагдмал байсан аливаа үйл ажиллагаа энэ жилээс ийн үүдээ нээж байна. “Улаанбаатар Элит” олон улсын дунд сургуулийн коллежийн зөвлөх Х.Жавзандуламын хэлснээр тус сургууль “World scholar’s cup” тэмцээнийг дөрөв дэх удаагаа зохион байгуулж байна. Хамгийн сонирхолтой нь энэ удаагийн тэмцээний зохион байгуулагчид нь сурагчид.
АНУ, Их Британи, БНХАУ, БНСУ зэрэг 50 гаруй орны 30 мянга орчим сурагч хамрагддаг “World scholar’s cup” олон улсын тэмцээний “Улаанбаатар Эмпати”-гийн зохион байгуулж байгаа энэ удаагийн тэмцээнд “English school of Mongolia”, Монгол-Оросын хамтарсан гуравдугаар сургууль, “Орхон Эмпати”, “Дархан Эмпати”, “Улаанбаатар Эмпати”, “Баян-Өлгий Эмпати”, “Глобал”, “American school”, ”Орхон Хасу” зэрэг англи хэлний гүнзгийрүүлсэн сургалттай, нийслэл орон нутгийн улсын болон төрийн өмчит 15 дунд сургуулийн 650 гаруй сурагч оролцож байна.
2007 оноос хойш зохион байгуулагдаж буй “World scholar’s cup” тэмцээнд оролцож буй сурагчид гурав, гурваараа нэг баг болдог бөгөөд түүх, нийгэм судлал, урлаг, уран зохиол, шинжлэх ухаан зэрэг олон сэдвийн хүрээнд мэтгэлцэж, илтгэл тавьж, эсээ бичих зэргээр өрсөлддөг юм. “World scholar’s cup” нь олон улсын тэмцээнд оролцох сонирхолтой бүх хүүхдэд нээлттэй байдаг бөгөөд тэмцээний онцлог нь, хүүхдүүдийн ерөнхий мэдлэгийг хөгжилтэй байдлаар шалгадаг. Өөрөөр хэлбэл, академик олимпиад шиг зохион байгуулагддаггүй, оролцсон бүх хүүхдэд сертификат олгодог. “Улаанбаатар Эмпати” олон улсын сургуулийн зохион байгуулсан “World scholar’s cup”-аас шалгарсан хүүхдүүд Дубай хотод зохион байгуулагдах шигшээ тэмцээн “Global Round”-д оролцох боломжтой. “World scholar’s cup” тэмцээнд оролцож байгаа сурагчдын сэтгэгдлийг хүргэе.
Б.Гоомарал: “Шинэ дэлхий” сэдвийн хүрээнд зохион байгуулагдаж байгаа
Намайг Б.Гоомарал гэдэг. Би “Улаанбаатар Элит” олон улсын дунд сургуулийн 11 дүгээр ангид суралцдаг. “World scholar’s cup” тэмцээний зохион байгуулалтын албанд Маркетингийн ахлагчаар ажиллаж байгаа. Энэ тэмцээнд гурван жил дараалан оролцогчийн хувиар өрсөлдсөн. Оролцогч бүх тэмцээнд оролцож, хүүхдүүдтэй өрсөлддөг. Харин зохион байгуулагчид тэмцээний дэг журам, зохион байгуулалтыг хариуцаж ажилладаг. Энэ тэмцээнд орсноор багаар ажиллах чадвар нэмэгдсэн. Мөн ярих, илтгэх чадвар сайжирсан. Түүнчлэн эсээ бичих, судалгаа хийх ур дүйд суралцсан. Энэ жилийн тэмцээнд маш олон хүүхэд оролцож байна. Тэмцээн “Шинэ дэлхий” гэх сэдвийн хүрээнд зохион байгуулагдаж байгаа. Ковид19 халдварын дараа бүх зүйл нөхөн сэргээгдээд, бид хэвийн амьдралын хэв маягтаа шилжиж байгаа. Энэ талаар хөндсөн сэдвийн хүрээнд зохион байгуулагдаж байгаа учир хүүхдүүдэд маш сонирхолтой байгаа.
Б.Төгөлдөр: Гадаадад сурах хүсэлтэй хүүхдүүдэд том боломж бий болгодог
Намайг Б.Төгөлдөр гэдэг. Би 16 настай. “Улаанбаатар Элит” олон улсын дунд сургуулийн 11 дүгээр ангийн сурагч. Би биоложистик багийг удирдаж байгаа. “World scholar’s cup” арга хэмжээг манай сургууль дөрөв дэх удаагаа зохион байгуулж байна. “World scholar’s cup” тэмцээний зохион байгуулалтын багт багтсанаар иаш олон зүйл суралцаж байна. Англи хэл дээр явагддаг учир хэлний мэдлэг сайжирч байгаа. Мөн ярих, илтгэх, харилцах чадвар дээшилсэн. Үүнээс гадна, гаднын их сургуульд суралцахаар зорьж байгаа хүүхдүүдэд маш том давуу тал бий болж байгаа. Илүү ухаантай, илүү чадвартай хүүхдүүдтэй найзалж, олон зүйл сурч байгаадаа баяртай байна.
Б.Тодоо: Дараа жил ч энэ тэмцээнд оролцоно
Намайг Б.Тодоо гэдэг. Би English school of Mongolia сургуулийн зургадугаар ангийн сурагч. Би дунд сургуулийн дарга болсон. Тиймээс өөрийгөө сорих зорилгоор “World scholar’s cup”-д оролцохоор шийдсэн. Маш их таалагдаж байна. Үнэхээр хөгжилтэй санагдлаа. Мөн анх удаа мэтгэлцэж үзлээ. Өөртөө итгэлтэй ярих, багаар ажиллах, эсээ бичих зэрэг олон туршлага хуримтлууллаа. Манай сургуулийн 75 сурагч энэ тэмцээнд оролцож байгаа. Би найзуудтайгаа энэ тэмцээнд оролцож байна. Би дараа жил ч энэ тэмцээнд оролцоно. Ер нь алтан медаль авах хүртлээ тэмцээндээ оролцоно гэж бодож байгаа.
Б.Жаргал
