Энэ удаагийн дугаарт сайн ээж, сайн гэрийн эзэгтэй байхын зэрэгцээ өөрийн мөрөөдлөө ажил мэргэжил болгосон залуу үеийн төлөөлөл Make up артист Ч.Мөнхзулыг урьлаа.
Анх нүүр будна гэхэд ойлгох хүн байхгүй, чи үүгээр хоолоо олж идэхгүй шүү дээ гэх хүмүүсийн үгийг олон сонсож байсан. Гэсэн ч өөрийн хийх дуртай зүйлээ, мөрөөдлөө дагасан
- Танд энэ өдрийн мэнд хүргэе. Яриагаа хүүхэд наснаас нь эхлүүлье гэж бодлоо. Ч.Мөнхзул багадаа ямар мэргэжилтэй хүүхэд болно гэж боддог байв?
- Би Дарханд өссөн тэндэхийн хүүхэд л дээ. Дунд сургуулиа Дарханд төгсөөд Улаанбаатарт ирж байсан. Багадаа, ахлах ангидаа нээх сайн зурдаг байгаагүй хэрнэ ангийнхаа охидын нүүрийг будах дуртай, өөрийгөө янз бүрээр будаж үзээд л, туршаад суудаг байсан. Шинэ жил, ямар нэг баяр болохоор найзуудыгаа би будаад өгье, гээд будаж өгнө. Тэр үеийн хобби нь байсан юм уу даа. Энд ирээд бага ангийн багшийн ангид элссэн ч дуртай зүйл маань өөр зүгт байгааг мэдрээд байсан. Ингээд анх нүүр будах сургалтад суугаад үзье гэж шийдсэн.
- Нэг ёсондоо арван жилийн мөрөөдлөө одоо бодит болгож ээ дээ. Анх гэр бүл, ойр дотнынхон нь юу гэж хүлээж авч байсан бэ?
- Тэр үедээ гэрийнхэндээ ийм сургалтад сууж байгаагаа хэлээгүй. Учир нь мэргэжлийн нүүр будалт, сургалт гэхээр тэр бүр хүмүүс ойлгохгүй, мэргэжлийн гэдэг утгаар нь хүлээж авахгүй үе байсан. Сургалтдаа суугаад, энэ чиглэлээр ажиллаад, сертификатуудаа авсан хойноо ээждээ хэлж байсан. Харин одоо бол ээж маань, нөхөр маань миний ажлыг хамгийн сайн дэмждэг.
- Ажлын гараагаа хэзээ эхэлж байв?
- Анх сургалтад суухдаа энэ чиглэлээр ажиллана гэж бодоогүй. Ямартай ч эхлээд өөрийгөө будаад, хүн будаад сурчихъя гэж бодож байсан. Гэтэл сайн багшийн гарт ирээд энэ хүсэл маань илүү хол явж болох юм гэсэн итгэлтэй болсон. Ингээд ажиллахаар шийдээд, олон сар дагалдаж, их зүйл сурсан. Тэр үед хичээл зүтгэлийг минь ашиглаад цалингүй ажиллуулж байсан газар ч бий. Өөрийнхөө дуртай зүйлээ хийгээд, алсыг харчихсан болохоор тэр бүрт гомдоллож байгаагүй ээ. Хувийн газраа нээхээс өмнө артист Сабрина багш дээрээ дагалдан багш хийж, будалт авна, өөр хувийн газруудад будалт авах зэргээр ажиллаж эхэлсэн. Ингээд 2019 онд өөрийнхөө салоныг нээхээр шийдэж байсан.
- Залуу гэр бүлийн хувьд хүүхэд харах хүн гэдэг хамгийн том тус дэм, дэмжлэг болдог. Бага насны хүүхдээ харахын хажуугаар хувийн газраа нээж ажиллахад хүндрэл байв уу? Танай гэр бүлийн хувьд энэ асуудлыг хэрхэн шийдвэрлэж байна вэ?
- Тийм шүү. Бага насны хүүхэдтэй гэр бүлд хүүхэд харах хүн гэдэг үнэхээр том асуудал болдог. Энэ бүхэнд нөхөр хамгийн их тусалдаг даа. Миний ажил цагийн хуваарьт баригддаггүй, өглөө, орой хэзээ ч хамаагүй ажилладаг учраас нөхөр маань хүүгээ хараад би ажлаа хийхээр явна, нөхөр ажилтай үед би хүүгээ харна. Үүний зэрэгцээ хоёр ээж маань бидэнд маш их тусалдаг. Залуу гэр бүлд энэ мэтчилэн тулгарах асуудал зөндөө бий. Тэр бүрийг хамтдаа даваад эргээд харахад сайхан шүү дээ.
- Гэр бүлийнхэндээ хэлэлгүй сургалтад сууж байсан гэсэн шүү дээ. Энэ чиглэлээр ажиллана, хувийн салоноо нээнэ гэхэд юу гэж хүлээж авсан бэ?
- Анх ойлгохгүй үе байсан. Харин ажиллаад эхлэхэд хамгийн их дэмжсэн хүмүүс гэр бүлийнхэн маань байсан. Нөхөр маань намайг хамгийн их дэмжсэн. Өөрийнхөө газрыг нээж ажиллая гэхэд анхны санхүүжилтийг хадгаламжаасаа өгч байсан. Хүн бүрт анхны алхам хийхэд эхлэл чухал байдаг шүү дээ. Бид залуу хүмүүс, бие биенээ маш сайн ойлгосон.
- Бага ангийн багшаар сурч байсан хэрнэ, артист болохоор шийдсэн гэсэн. Сонголтондоо эргэлзэх үе гарч байсан уу? Таны хэлснээр хүмүүс мэргэжлийн төвшинд ойлгохгүй үе гардаг байх?
- Сонголтондоо эргэлзэж байгаагүй ээ. Мэргэжлээ сонгоход хүмүүс хэд хэдэн сонголттой нүүр тулдаг шүү дээ. Мөрөөдлөө дагах уу, ажлын байраа бодох уу? Энэ хоёр сонголтод төөрөх үе байсан ч дуртай зүйлээ хийх, өөрийн хүсэлээ дагах шийдвэрийг гаргасандаа харамсаж байгаагүй. Хүн чинь ажлаа жаргаж хийх хэрэгтэй шүү дээ.
- Өмнө нь мэргэжлийн нүүр будалт гэхээр хүмүүс юу гэж хүлээж авдаг байв, одоо Монголд энэ чиглэлийг хүмүүс хэрхэн хүлээж авч байна вэ?
- Нүүр будалт харьцангуй залуу мэргэжлийн чиглэл, учир нь саяхныг хүртэл мөнгө төлж нүүрээ будуулах хүн ховор байдаг байлаа. Одоо бол нийгэм үүнийг мэргэжил, урлаг гэдэг талаас нь хүлээж авдаг болсон байна. Сүүлийн үед Монгол Улсын чадварлаг төлөөллүүд олон улсын make up чиглэлийн тэмцээнүүдэд амжилттай оролцож байгаа нь өөрөө энэ салбарын хөгжил манай улсад хэр хэмжээнд байгааг харуулж байна.
- Таны хувьд ямар төрлийн нүүр будалтыг хийдэг вэ? Цаашдын төлөвлөгөөнөөс хуваалцаж болох уу?
- Миний хувьд ихэвчлэн Beauty төрлийн нүүр будалтыг хийдэг. Энэ нь бүсгүйчүүдийн өдөр тутмын, гоёлын, үдэшлэгийн болон студийн будалтыг хэлдэг. Мэдээж цаашдаа мэргэжлийн чиглэлээ ахиулж, олон улсад суралцах хүсэлтэй. Одоогоор өөрийн газраа бүрэн тохижуулж амжаагүй, шинэхэн байгаа шүү дээ. Тиймээс ойрын хугацаанд салоноо тохижуулаад, сургалтаа авах бодолтой байна.
- Цаг гаргаж ярилцсан танд баярлалаа. Цаашдын ажилд нь амжилт хүсье.
Т.Мөнхжаргал
