Цаг уурын байгууллагын ирүүлсэн мэдээллээр өнөөдөр буюу дөрөвдүгээр сарын 27-ны өдрийн байдлаар манай орны ихэнх гол, мөрөн мөснөөс бүрэн чөлөөлөгдсөн хэдий ч зарим голууд болон томоохон нуурууд битүү мөсөн бүрхүүлтэй байна.

Тухайлбал, Хөвсгөлийн уулсаас эхтэй Дэлгэрмөрөн, Хангай нурууны араас усжих Чулуут, өврийн Онги, Цагаантуруут, Идэр, Хожуул, Хэнтий нурууны баруун хажуугийн Сөгнөгөр, Увс нуурын савын Хархираа, Чигж, Түргэн, Хариг зэрэг голууд 30-150 см, Хөвсгөл, Тэрхийн цагаан, Өгий, Буйр, Хөх нуур, Ойгон, Увс зэрэг нуурууд 40-115 см зузаан мөсөн бүрхүүлтэй байгаа юм. Гэхдээ мөс байрандаа хайлах, харлах, мөсөн дээгүүр ус урсах, нимгэрэх зэрэг үзэгдэл зонхилон ажиглагдаж байна.

Мөн цаашид цаг агаарын дулаарлаас шалтгаалан гол мөрөн, нуурын мөс улам нимгэрч, хэврэгших тул мөсөн дээгүүр явах болон авто тээвэр хийхгүй байхыг Онцгой байдлын ерөнхий газраас анхаарууллаа.