Ч.Хүрэлбаатар: LRT төсөл манай улсын өрийн бодлоготой зөрчилдсөн тул дэмжээгүй
УИХ-ын гишүүн, Төсвийн байнгын хорооны дарга Ч.Хүрэлбаатар хөнгөн галт тэрэг буюу LRT гүүрэн байгууламжийн бүтээн байгуулалтын төсөлтэй холбоотой асуудлаар мэдээлэл өглөө. Тэрбээр "Засгийн газрын өөрийн өргөн мэдүүлсэн төсөлд байгаа зээлийн баталгаа гаргуулагч нь нэг компани байгаа. Тэр компани нь регистрийн дугаараа аваагүйн дээрээс нь 3 жил ашигтай ажилласан байх ёстой гэсэн өрийн удирдлагын хуультай зөрчилдөж байна” гэв.
Улсын ерөнхий прокуророос дөрвөн гишүүний бүрэн эрхийг түдгэлзүүлэх хүсэлтээ өглөө
Улсын ерөнхий прокуророос УИХ-ын гишүүн Ё.Баатарбилэг, Н.Алтанхуяг, Г.Амартүвшин, Х.Ганхуяг нарын бүрэн эрхийг түдгэлзүүлэх хүсэлтээ УИХ-ын дарга Г.Занданшатарт хүргүүллээ. Улмаар дээрх УИХ гишүүдийн бүрэн эрхийг түдгэлзүүлэх асуудлыг Хууль зүйн байнгын хороо, Улсын Их Хурлын гишүүний халдашгүй байдлын дэд хороо, Төрийн байгуулалтын байнгын хороодын санал, дүгнэлтийг үндэслэж нэгдсэн хуралдаанаар хэлэлцэх бөгөөд Төрийн байгуулалтын байнгын хороо нууцаар санал хурааснаар ажлын тав хоногт шийдвэрлэх юм.
Олон нийтэд зориулсан амралт, чөлөөт цагаа өнгөрүүлэх дөрвөн бүсийг байгуулж эхэллээ
Байгаль орчин, аялал жуулчлалын яамнаас нийт дөрвөн байршилд олон нийтэд зориулсан амралт, чөлөөт цагаа өнгөрүүлэх бүсийг байгуулж эхэллээ. Нийт 11.3 га газрыг ээлж дараалан тохижуулж, иргэдийн чөлөөт цагаа өнгөрүүлэх бүс бий болгох бөгөөд олон улсын болон олон нийтийн байгууллагуудтай хамтран тохижуулах юм. Зайсангийн аманд 18426.1, Хүүшийн аманд 17627.5, Богины аманд 23707.7, Нүхтийн аманд 19481.7 ам метр газар тус тус чөлөөт цагаа өнгөрүүлэх бүс бий болгох юм. Газрыг аль нэг аж ахуйн нэгжид өгөхгүй бөгөөд гэрчилгээжүүлэхгүй юм байна.
НҮБ-ын Дэлхийн аялал жуулчлалын байгууллага ОХУ-ын гишүүнчлэлийг түдгэлзүүллээ
Нэгдсэн Үндэсний Байгууллагын Дэлхийн аялал жуулчлалын байгууллага өнгөрсөн лхагва гарагт ээлжит бус чуулганаа хийж ОХУ-ын гишүүнчлэлийг түдгэлзүүллээ. Дэлхийн аялал жуулчлалын байгууллагаа өөрийн твиттер хаяг дээрээ: “ДАЖБ-ын гишүүдийн ОХУ-ын гишүүнчлэлийг түдгэлзүүлэх эсэх дээр санал хураалт явагдсан. Улмаар ОХУ-ын гишүүнчлэлийг хүчингүй болгох шийдвэрт хүрсэн бөгөөд ОХУ ч өөрсдийн байр сууриа хамгаалалгүйгээр ДАЖБ-аас гарах хүсэлт гаргасан.” гэж жиргэжээ. ДАЖБ-ын уг шийдвэрийг Украин улсын Гадаад хэргийн сайд Кулеба ихэд сайшааж ОХУ-ын дайны гэмт хэрэгтнүүд зөвхөн олон улсын шүүх рүү явах ёстой гэх утгатай үгсийг хэлжээ.
Халдашгүй байдлын дэд хороо нэр бүхий дөрвөн гишүүнийг түдгэлзүүлэхээс татгалзлаа
Халдашгүй байдлын дэд хороо нэр бүхий дөрвөн гишүүнийг түдгэлзүүлэхээр Прокурорын байгууллагаас ирүүлсэн саналыг дэмжих боломжгүй гэдгийг мэдэгдэн хэвлэлийн хурал хийв.
Энэ үеэр Халдашгүй байдлын дэд хорооноос “Энэ асуудлыг Хууль зүйн байнгын хороо, Төрийн байгуулалтын байнгын хороо хуралдаж, УИХ-ын чуулганы нэгдсэн хуралдаанд танилцуулна. Гишүүдээс ирүүлсэн мэдүүлэг, тодруулгыг тодорхой ярих боломж хуулиараа байхгүй.Энэ хэрэг нь Прокурорын байгууллагаас нууцын зэрэглэлтэй ирсэн. Тиймээс цаашид энэ асуудлын талаарх нэгдсэн шийдвэр УИХ-ын нэгдсэн чуулганаар гарна” гэлээ.
