Бөөрөнд нь наалдсан айлын шоовдор хүүхэд шиг боловсролын салбарын нэг хэсэг болох МСҮТ, Политехник коллежийнхэн дахиад л гомдол тээв. Дахиад гэсний учир нь 2012 онд тус салбарыг ажиллах хүч, хөдөлмөр эрхлэлттэй холбоотой хэмээн үзэж Хөдөлмөр, нийгмийн хамгааллын яам руу шилжүүлж байсан юм. Гэтэл оны өмнө дахиад л бөөн маргаан болж манай, танай зөв, буруу гэсээр 2022 оноос БШУЯ-ны харьяанд багтах болсон. Шинээр сонгогдсон гишүүд, шинэ Засгийн газар, шинэ сайд гээд хэн ч байсан, ямар ч улс төрийн холион бантангийн золиос болж хоёр тийшээ шидэж тоглосны эцэст нь иргэн, хүн л хохирдог.
Шилжүүлсний дараахнаас тус салбарын багш ажилчид бухимдаж, санал гомдлоо илэрхийлсээр байв. Тодруулбал, салбарын сайдын дөрөвдүгээр сарын 1-нд гаргасан тушаал тэдний гомдох эхлэл болов.
СӨБ болон ЕБС-ийн багш нарын цалинг нэмэх шийдвэр гаргахдаа МСҮТ, Политехник коллежийн багш ажилтнуудыг үлдээсэн байна. Үүнд МСҮТ, Политехник коллежийн багш ажилтнууд бухимдаж “Биднийг үеийн үед л ингэж гадуурхаж, айлын шоовдор хүүхэд шиг үздэг. БШУЯ руу шилжээд өөрчлөгдсөн, сайжирсан зүйл алга. Өмнө нь тус яамны харьяанд байхад мөн л бусад боловсролын салбартаа түлхүү анхаарч манайхыг орхигдуулдаг байсан. ЕБС-д тааруу дүнтэй хүүхдүүд энэ салбарт элсдэг гэж суралцагчдыг гадуурхдаг байсан бол одоо яаман дотроо багш ажилчдаараа гадуурхагдлаа” зэргээр санал гомдлоо илэрхийлж, цалинг нь бусад боловсролын байгууллагатай ижил хэмжээнд хүргэх хүсэлт бичиг илгээсэн ч тодорхой хариу өгөхгүй байгаа тул жагсах хэмжээнд хүрээд байгаа аж.
Зарим хөдөө, орон нутгийн МСҮТ, ПК-ийн багш нар нийслэлд нэгдэж жагсахаар ирж байгаа гэнэ. Жагсаалаас өмнө буюу өнөөдөр салбарын сайд Л.Энх-Амгалан хүлээн авч уулзахаар болсон талаар мэдээлэл авсан юм. Тус уулзалтаас шалтгаалж жагсах эсэх нь шийдэгдэх болов уу.
Мөн 2022 онд ТҮ-1-3 ажилчдын улирлын үр дүнгийн урамшуулал, хоол унааны нэмэгдлийг нь зарим сургуульд одоог хүртэл олгоогүй байгаа аж. Учир нь санхүүжилт нь дутуу ирсэн байна. Гэтэл аль хэдийн хоёр улирал дуусах гэж байдаг.
Багш нарын төлөөлөл цалингаа нэмүүлэх хүсэлт албан ёсоор салбарын сайд болон Засгийн газрын хэрэгжүүлэгч агентлаг болох Боловсролын ерөнхий газарт илгээсэн ч сайдаас хариу ирээгүй гэнэ. Харин Боловсролын ерөнхий газраас дараах хариу иржээ.
СӨБ болон ЕБС-ийн багш нарт улирлын үр дүнгийн урамшуулал 60 хүртэлх хувь олгодог бол МСҮТ, ПК-ийн багш нарт 21-25 хувиар бодож олгодог байна. Уг нь багш нарынх нь чадвар, сурч төгссөн сургууль ижил МСҮТ, ПК-ийн багш нар мэргэжлийн чиг баримжаа олгодог, мэргэшүүлдэг илүү ур чадвартай ч багш бий. Гэтэл цалингийн хэмжээ нь бусдаасаа бага, ялгаатай. Үүнээс гадна мэргэжлийн хичээл заадаг багш нар 5-р шатлалд, ерөнхий эрдмийн хичээл заадаг багш нар 4-р шатлалаар цалинждаг байна. Энэ нь багш нарын дунд үл ойлголцол, маргаан үүсгэх шалтгаан болдог аж. Тухайлбал, хөдөө орон нутгийн МСҮТ, ПК-д 15 жил ажиллаж байгаа багшийн үндсэн цалин 895.945 төгрөг. Үйлчилгээний ажилчид бол бүр 400-500 мянган төгрөг гар дээрээ авдаг аж.
“Танайх нүүрс түлдэг манайх бакришк түлдэг” гээд хошин шог шиг л. СӨБ, ЕБС-ийн багш нар өндөр цалин авдаг, МСҮТ, ПК-ийн багш нар бага цалин авдаг. Салбарын яам дотроо ингэж ялгаварлаж байгаад тэд бухимдаж байна. Бухимдахаас ч аргагүй. Өнөөдөр хэрэглээний үнийн дүн хэдэн хувиар өссөнтэй тэдний авдаг цалинг харьцуулбал “инээдэм”-тэй байгаа биз. Энд зөвхөн БШУЯ-наас гадна, хөдөлмөрийн цалин, хөлстэй холбоотой ХНХЯ, Монгол Улсын төсвийг зохицуулдаг Сангийн яамандч хамаатай асуудал юм.
Өнөөдөр манай улсад 76 МСҮТ, Политехник коллежид 4000 гаруй багш ажилтан, 40 мянга гаруй суралцагчтай үйл ажиллагаагаа явуулж байгаа. Эдгээр багш, ажилтнуудын эрх ашиг хөндөгдөж байгаа юм.
Одоо яригдаж байгаа Боловсролын тухай багц хуульд бас л орхигдчих вий гэсэн анхаарал, айдас болгоомжлол ч байсаар.
Он гараад эхний хагас жил болох гэж байгаа ч саяхныг хүртэл тус яаманд хариуцаж ажиллах хэлтсийн дарга, бүтэц нь тодорхой болоогүй, үйл ажиллагаа нь жигдрээгүй л байсаар өнгөрсөн сарын сүүлчээр хэлтсийнх нь дарга, мэргэжилтэн тодорхой болсон. Гэсэн ч “Мэргэжлийн болон техникийн боловсрол” цэс нь одоо ч ямар нэг мэдээлэлгүй хоосон хэвээр л байгаа.
Б.Хулан
