Эрүүл мэндийн сайд С.Энхболд болон ЭМЯ-ны Төрийн нарийн бичгийн дарга Ц.Эрдэмбилэг нар өчигдөр Өвөрхангай аймгийн Хархорин сумын Нэгдсэн эмнэлэгт ажиллав.

Энэ үеэр Хархорин сумын Нэгдсэн эмнэлэг "Эрүүл мэндийг дэмжих төв" нээлтээ хийж, үйл ажиллагаагаа эхлүүллээ. Тус эрүүл мэндийн төвд 24 нэр төрлийн аппарат тавилга, засварыг улсын төсвийн 1.1 тэрбум төгрөгийн хөрөнгөөр ийнхүү ашиглалтад оруулж байгаа юм.

Мөн энэ үеэр Эрүүл мэндийн сайд С.Энхболд Өвөрхангай аймгийн БОЭТ-д алсын дуудлагын зориулалтаар бүрэн тоноглогдсон, туулах чадвар өндөр Ланд Круйзер 78 автомашин гардуулан өглөө.

Нээлтийн үйл ажиллагаанд Эрүүл мэндийн сайд С.Энхболд,  ЭМЯ-ны Төрийн нарийн бичгийн дарга Ц.Эрдэмбилэг, УИХ-ийн Гишүүн С.Чинзориг, Өвөрхангай аймгийн засаг дарга А.Ишдорж,Хархорин сумын засаг дарга Г.Одгэрэл,  ЭМГ-ын дарга Д.Шивааннүрдэв болон бусад албаны хүмүүс оролцов.

Ташрамд дурдахад, Өвөрхангай аймаг нь 117 мянган хүн амтай бөгөөд Монгол Улсын хэмжээнд хүн амын тоогоор хоёрдугаарт ордог томоохон нутаг дэвсгэртэй. Тус аймагт Хархорин Нэгдсэн эмнэлэг, Бүсийн оношилгоо эмчилгээний төв, Зоонозын өвчин судлалын үндэсний төв зэрэг Засаг захиргааны нийт 19 сум 2 багийн эмнэлэг, 4 өрхийн эмнэлэг, нийт 25 эрүүл мэндийн байгууллага үйл ажиллагаа явуулж байна. Мөн бүсийн аймгууд болох Архангай, Булган, Өмнөговь, Баянхонгор, баруун аймгийн зорчигч иргэд хүн амд эрүүл мэндийн тусламж үйлчилгээ үзүүлдэг юм.

Эх сурвалж: Эрүүл мэндийн яам