Түүнийг Б.Заяахүү гэдэг. Ид хийж бүтээх насан дээрээ яваа 34 настай залуу. Сурсан мэргэжлээрээ ажиллах туйлын хүсэлтэй хэдий ч бөөрний архаг дутагдал хэмээх хүнд өвчинтэй нүүр тулснаар энэ мөрөөдөлдөө хүрэхэд хүндрэлтэй болжээ. Дөнгөж 21 насандаа бөөрний дутагдал хэмээн оношлогдож, энгийнээр ажиллаж амьдрах боломжгүй гэсэн хариу сонссон хэдий ч бууж өгөлгүй явсаар Казахстан Улсад аялал жуулчлалын чиглэлээр докторын зэрэг дээшлүүлэхээр сурчээ. Дипломын ажлаа "Говь гурван сайхан тусгай хамгаалалттай газрын тухай" сэдвээр бэлдэж байгаа хэдий ч сэдвээ хамгаалах боломжгүй болжээ. Учир нь бөөрний дутагдал нь хүндэрсээр 2019 онд бөөрний архаг дутагдал болж аппаратаар амьдрах эсвэл бөөр шилжүүлэн суулгах шаардлагатай болсон байна. Гэр бүлийнхний цусны бүлэг таарахгүй гэх шалтгаанаар өнөөдрийг хүртэл хэвлийн диализ буюу аппаратаар амьдарч байна. Монгол Улсад эмчлэх боломжгүй хэдий ч Бүгд найрамдах Турк улсын анагаахын ухааны их сургуулийн харьяа эмнэлэгт эмчлэх боломжтой гэсэн хариу авсан  түүнд эмчилгээний зардал болох 150-200 сая төгрөг шаардлагатай байгаа юм. Ингээд тэрбээр ард түмнээсээ тусламж гуйжээ.

-Сайн байна уу. Бүгд найрамдах Турк улсын зүгээс ямар хариу ирсэн бэ?

- Сайн байна уу. БНСУ, БНТУ-д эмчлэх боломжтой эсэх талаар судалж үзэхэд Турк улсын анагаах ухааны их сургуулийн эмнэлгээс нааштай хариу ирсэн. Энэ эмнэлэгт Монгол Улсаас очиж бөөрөө эмчлүүлсэн, бөөрөө солиулсан хүмүүс олон байдаг юм билээ. Холоос очих учраас ямар нэг дараалал, хүлээлэггүйгээр эмчилгээ эхлэхээр байгаа.

- Хэвлийн диализтай байгаа гэхээр бөөрний үйл ажиллагааг энэ аппаратаар орлуулж байна гэсэн үг үү?

- Тийм ээ. Өдөрт дөрвөн удаа эмчилгээ хийдэг.  Залуу хүний хувьд аппаратаар амьдарна гэдэг эмгэнэл шүү дээ. Бөөрний үйл ажиллагаа явагдахгүй болсноор зүрх рүү хортой цус хүрч байдаг. Ингээд сүүлд зүрхний дутагдал гэж оношлогдсон. Одоо бол зөвхөн 30 хувьтай ажиллаж байгаа. Бөөр солиулах хагалгаа хийлгэхийн тулд зүрх маань үүнийг дааж чадах ёстой. Тиймээс Турк улсад очоод юун түрүүнд зүрхээ эмчлүүлж байж, бөөр шилжүүлэх боломжтой.

- Одоогоор өдөрт ямар эмчилгээ хийж байна вэ? Хэчнээн төгрөг зарцуулдаг вэ?

- Хэвлийн диализийг эрүүл мэндийн даатгалын сангаас даадаг болсон. Нэг өдрийн эм тарианд дунджаар 120 мянга орчим төгрөг, сардаа 3,6 сая төгрөг зарцуулагддаг. Үүнээс гадна маш олон төрлийн эмүүд уудаг. Дааврын эм, фосфор буулгах, цус шингэлэх, даралтны эм, гэх мэт. Зарим эм тариаг даатгалын сангаас хөнгөлүүлээд авдаг бол зарим нь Монголд олддоггүй, огт байдаггүй. Химийн хүчтэй найрлагатай эм тариаг хэрэглэхээр эмийн хордлогод орно, харшилна. Диализд орохоосоо өмнө сэхээнд хүртэл орсон.

- Хандивын аян эхэлснээс хойш хэчнээн төгрөг цуглаад байна вэ?

- Ард түмнээсээ тусламж гуйгаад долоо хоног болж байна. Энэ хугацаанд нэг сая орчим төгрөг цугларсан. Сэтгэлийн хандив өргөж байгаа та бүхэнд чин сэтгэлээсээ баярлалаа. Би хүү, охин хоёртой. Бурхан надад өвчин өгсөн ч гэсэн хүү, охин хоёр заяасан. Том хүү маань энэ жил есөн нас хүрч байна. Харин бага охин маань гурван настай. Охиныгоо төрснөөс нь хойш аав нь ийм хүнд өвчтэй харагдаж эхэлсэн. Охины маань харц намайг эмзэглүүлдэг. Хоёр хүүхдэдээ эрүүл, саруул харагдах юмсан. Насан туршид нь өвчтэй аав баймааргүй байна. Энэ бол маш том хариуцлага. Тиймээс боломж олдсон дээр нь бөөрөө  солиулаад, эрүүл болохыг хүсч байна. Тиймээс ард түмнээсээ надад туслаач хэмээн хүсч байна.

Т.Мөнхжаргал