Улаанбаатар хотын хамгийн олон хүн амтай, нягтаршил ихтэй хороодын нэг бол Баянзүрх дүүргийн 26 дугаар хороо. Энд 2021 оны байдлаар 26,727 иргэн оршин суух бүртгэлтэй. Үүнээс цэцэрлэгийн насны буюу 0-4 насны 3052 хүүхэд, ЕБС-ийн насны буюу 5-19 насны 8025 хүүхэд амьдардаг. Гэвч тэдэнд харьяаллаараа орох улсын цэцэрлэг байхгүй, ганцхан улсын сургуультай нь асуудал хэвээр байсаар ирсэн.

Энэ асуудалд арга хэмжээ авахаар УИХ-ын гишүүн Б.Энхбаяр, Улаанбаатар хотын захирагч бөгөөд Нийслэлийн засаг дарга Д.Сумъяабазар нар хамтран ажиллаж газрын асуудлыг шийдвэрлэснээр 10 тэрбум төгрөгийн төсвөөр 640 хүүхдийн суудалтай ЕБС барихаар болсон юм. Сургуулийн бүтээн байгуулалтыг хоёр жилийн хугацаанд гүйцэтгэх бөгөөд шав тавих ажил өнгөрсөн зургаадугаар сарын 22-нд эхэлсэн.

Энэ үеэр УИХ-ын гишүүн Б.Энхбаяр “БЗД-ийн 26 дугаар хороонд дахиад 2-3 газар байгаа ч эрх мэдэлд ойр хүмүүс авчихсан. Энэ хүмүүстэй шүүхээр дамжуулан “зодолдож” байгаа. Нийслэлийн Засаг дарга, Нийслэлийн Боловсролын газар гурван шатны шүүхээр явж, удаан хугацааны тэмцлийн үр дүнд сургууль барих боломж бүрдлээ. 25 дугаар хороонд Замын цагдаагийн 10 давхар оффис барих гэж байсныг Хотын дарга болиулж, сургууль барихаар газрын асуудлыг шийдсэн. 240 хүүхдийн хүчин чадалтай цэцэрлэгийн шавыг ирэх сард  тавина. Сул газруудад ногоон байгууламж, эсвэл сургууль, цэцэрлэг байгуулна” хэмээсэн. Гэвч шав тавьснаас хоёр сарын дараа барилгын ажил эхлээгүй л байгаа дүр зургийг та харж байна.

Газрынх нь асуудлыг, төсвийг нь шийдэн шав тавьсан ч хоёр сарын хугацаанд барилгын ажил эхлээгүй байгаа нь “Тайгам Алтай”, “ИКА” хэмээх компанийнхантай холбоотой ажээ. Учир нь, сургууль барих талбайн газрын хэсгийг энэ компани хашаалаад барилгын ажилд саад учруулаад буй юм.

“Тайгам Алтай”, “ИКА” хоёр бол ах дүүс Цулын Сономцэрэн, Цулын Даваасүрэн нарын эзэмшлийн компани. Барилгын салбарт үйл ажиллагаа явуулдаг “Тайгам Алтай” нь “Алтай” хотхон, “Олимп” хотхоныг барьсан. Өдгөө 26 дугаар хорооны шинэ цэцэрлэг барих газрын хойд талд газар эзэмшдэг бөгөөд энд мөн л орон сууцны хороолол барихаар төлөвлөж байгаа гэнэ. Гэсэн ч тэд сургуулийн газар руу хашаагаа оруулж татсанаас болоод сургуулийн барилга эхлэх боломжгүй болоод байгаа юм.  

Т.Мөнхжаргал