Нийгэм, соёлын урсгал даган бидний амьдрал ч хувьсан өөрчлөгдөж байна. Зарим нь үл анзаарагдах боловч түр азнаад харвал олон янзаар хувирч байгаа.

Жилийн дараа хүн төрөлхтний цэнгэлийн манлай олимп Парис хотноо болно. Гэтэл бэлтгэлдээ төвлөрөх учиртай чөлөөтийн тамирчид өчнөөн жилийн хөлс хөдөлмөрөө урсган байж олсон олон улсын шагналын мөнгөө “Чөлөөт бөхийн холбоо”-ныхоо өрөнд залгиулчихаад, шинэчлэл хүлээж, итгэл найдвар тээж суусаар тэвчээр нь барагдаж, өчигдөрхөн хэвлэлийн хурал хийв.

Үүнтэй давхцан Монгол улсын сайд, Олимп, нийтийн биеийн тамир спортын үндэсний хорооны дарга Б.Бат-Эрдэнэ гуай сүмо бөхийн зодог тайлах ёслолд очиж, даахь үргээсэн шиг ээ явна. 

Тамирчид хүйтэн зааланд бэлтгэлээ хийж, мандатных нь мөнгөөр улсын чанартай тэмцээнүүдийн аваргаа байлдаг юм байх. Чөлөөт бөхийн хөгжлийн төлөө сая, саяаар “үрэх”-д дээдсийн “зүрх үхээд”, хэдэн бутархай мөнгийг нэг тамирчны халааснаас нөгөө тамирчны халаас дамжуулан өгдөг бололтой. 

Ингээд болоогүй, тэд хэзээ нэг өдөр дарга нь хөшүүн биеийнхээ чилээг гаргаж, сүр бараагаа харуулах нар хур тэгширсэн, балжинням дашнямтай билэгт сайн өдрийг хүлээн суудаг байжээ. Гэтэл ирсэнгүй.

Хамаг л амьдралаа зориулж байгаа спортдоо “хайгуулчин” шиг зардал мөнгө эрж явсаар “ядарна шүү дээ, ядарна”. Өөрийн зуухан дахь гал унтарвал өөр айлын гэр бараадаж мэдэхээр “сэтгэлгүй дарга” нарыг цэгцлэх цаг болжээ.  

Сэвлэг үргээх ёслолын сайхныг мартаад салбарынхаа “муухай”-тай нүүр тулж, хэн давахаа үзсэн нь дээргүй юу урт нэрт хорооны дарга аа.  

 М.Дээв