"Шинэ сэргэлт Чингэлтэй" залуучуудын хөгжлийн хөтөлбөрийн хаалтын үйл ажиллагаа өнөөдөр Хууль зүйн үндэсний хүрээлэнд боллоо. Гурван өдрийн турш үргэлжилсэн тус хөтөлбөрийн гол зорилго нь залуусын ур чадварыг нэмэгдүүлэх, улс төрийн утга учиртай оролцоо, хүний эрхийн мэдрэмжийг нь дээшлүүлэх зэрэгт чиглэсэн байна.
Мөн арга хэмжээгээр дамжуулан тэдний оролцоог хангах, бодлогод дуу хоолойгоо хүргэдэг идэвхтэй иргэн байхад нь урам зориг өгөх зорилготой гэж байлаа.
Түүнчлэн хөтөлбөрт Чингэлтэй дүүргийн хороо бүрээс багадаа хоёр хүн оролцуулсан ба үүнд нь сурагчдын төлөөлөл ч байгаа юм. Сургалт дууссны дараа бүгд тал тал тийш тараад явах бус хамрагдсан 16-40 насны 100 орчим залуус клуб байгуулан цаашид эргэх холбоотой байхаар болжээ.
Тус хөтөлбөрийн талаар Чингэлтэй дүүргийн засаг дарга Н.Батсүмбэрэл, “Дүүргийн хэмжээнд хийгдэж байгаа ажлууд болон УИХ, ЗГ-ын шийдвэр орон нутагт хэрхэн хэрэгжиж буй талаарх мэдээлэл, танилцуулгыг залууст хүргэх зайлшгүй шаардлага байдаг. Чингэлтэй дүүргийн 21 хорооноос залуучуудыг шалгаруулж, иргэдийн төлөөллийг сонгон оролцуулдаг уг хөтөлбөр хоёр дахь жилдээ хэрэгжиж байна. 2023 оныг Чингэлтэй дүүрэг үйлдвэрлэлийг дэмжих жил болгон зарласан. Жижиг дунд үйлдвэрлэл эрхлэгчдийн нуруун дээр манай улсын эдийн засаг явж байгаа.Одоо гарааны бизнесийг дэмжих тал дээр анхаарч ажиллана. Манай дүүргийн залуучууд маш идэвхтэй оролцоотой, санаачлагатай” гэсэн юм.
Залуусын зүгээс чөлөөт цагаа өнгөрүүлэх орчин хомс ялангуяа гэр хороололд, залуу хосууд хүүхдүүдээ аваад гарахад ногоон байгууламж алга, хүүхдийн тоглоомын талбай шаардлага хангадаггүй зэрэг асуудлыг хөндөн ярьжээ. Бас ядуурал, түгжрэл, нийгмийн сэтгэл зүй, БЗС-ийн асуудлыг ч орхигдуулахгүй санал бодлоо илэрхийлж байсныг хэлж байлаа.
“Шинэ сэргэлт Чингэлтэй” хөтөлбөрийн талаар Чингэлтэй дүүргийн ИТХ-ын төлөөлөгч Д.Ядамжав, “Залуусыг оролцоог хангах, тэдэнд урам зори,г өгөх нь энэ хөтөлбөрийн туйлын зорилго юм. Энэ үеэр бодлогод юу тусгамаар байна, хийгдэж буй бүтээн байгуулалтууд бодит амьдралд нийцэж байна уу, ямар бодлого шийдвэр гаргавал залуучуудад хэрэгтэй байгаа юм гэх мэт сэдвээр зураглалынхаа хүрээнд ярилаа.
Шүүмжилж суухаасаа илүү оролцох хэрэгтэй.
Цаашид бид хөтлөөд чиглүүлээд байх бус бүгдээрээ идэвхтэй байх оролцоотой байх нь чухал” гэв.
Мөн үеэр оролцогчид өөр, өөрийн мэдэхийг хүссэн, сонирхсон зүйлсээ тухайн хөтөлбөрөөр дамжуулн сурч мэдэж авснаа илэрхийлж байв. Тэдний төлөөлөл болох Ч.Отгонжаргал, “Үр дүнтэй сайхан сургалт боллоо. Залуус бидэнд маш их боломж байдгийг мэдэж авснаараа үр бүтээлтэй байлаа. Хэрэв би оролцоогүй байсан бол зарим зүйлсийг мэдэхгүй хэвээрээ байжээ. Залуучууд хоорондоо санал солилцох боломж бүрдсэнд баяртай байна” гэсэн билээ.
Сургалтаар “SMB+F+C”, “Хөгжлийн хурд ба хүний хувьсал”, “Ардчилал дахь залуусын утга учиртай оролцоо”, Хөгжих эрхийн зарим асуудал”, “Шинжлэх сэтгэлгээ” олон сэдвээр хэлэлцүүлэг өрнүүлжээ.
М.Дэвээжаргал
