Манай сайтын цоо шинэ булан болох "Долоо хоногийн онцлох хүн" буланд уншигч та бүхэн тавтай морилно уу. Бид энэхүү буландаа тухайн долоо хоногт олны анхаарлыг татсан нэгнийг онцлох юм.

Энэ долоо хоногийн онцлох хүнээр Чөлөөт бөхийн холбооны ерөнхийлөгч Х.Бадамсүрэнг нэрлэж байна.

Энэ долоо хоногийн сүүлээр буюу зургаадугаар сарын 8-ны өдөр Чөлөөт бөхийн тамирчид холбооныхоо талаар олон нийтэд мэдээллээ. Дэлхийн олимпоос анхны медалиудыг авч байсан түүхтэй чөлөөт бөхийн холбоо өнөөдөр 1,4 тэрбум төгрөгийн өртэй аж. Тамирчид нь амжилт гаргасан ч амжилтынх нь мөнгийг өөрт нь бус нөгөөх өрөндөө суутгачихдаг гэнэ. Харин хөлсөө урсган байж авсан мөнгөн шагнал нь ердөө цаасан дээрх тоо болон үлдсээр байгаа талаар Чөлөөт бөхийн тамирчид хэлж байв. Мөн гадаад дотоодын тэмцээнд оролцохдоо хүмүүсийн гар харж, зардал мөнгөө олдог тухай ч мөн дурдсан юм.

Нэг ёсондоо тэд чөлөөт бөхийн холбооны удирдлагуудыг чөлөөндөө гарахыг хүсэж, шинэ залуу, тамирчдаа дэмжих хүмүүст уг холбоог даатгахыг хүсэж буй.

Тэгвэл чөлөөндөө гардаггүй чөлөөт бөхийн холбооны ерөнхийлөгчийн албыг Х.Бадамсүрэн хашиж буй. Тэрбээр Эрдэнэт үйлдвэр, Эрдэнэт Монголын зэсийн группийн ерөнхийлөгчөөс тэтгэвэртээ суухаар чөлөөлөгдсөн нэгэн. Гэсэн ч өөр нэгэн албан тушаалд буюу Чөлөөт бөхийн холбооны ерөнхийлөгчөөр томилогдсон нь 2022 оны гуравдугаар сарын 19-ны өдөр. Томилогдсон цагаасаа хойш тус холбоонд юу хийж бүтээснийг мэдэх нэгэн тун цөөн. Мөн цаг хугацааны баримжаагаа алдсан хэдэн нөхөд Дэлхийн аварга шалгаруулах тэмцээн болохоос сарын өмнө бэлтгэлийг нь хангуулна хэмээн хуваарь баталдаг гэнэ. Дасгалжуулагч, тамирчдынхаа үзэл бодлыг ч сонсдоггүй тус холбоо тамирчдаа холбох ёстой байтал хоёр хуваагаад амжжээ. Дэлхийн аварга П.Орхон, Т.Тулга тэргүүтэй тамирчдын мэдээлснээр чөлөөт бөхийн хобоонд эвийн цавуу, шинэ салхи үгүйлэгдэж байна. 

Д.Батчулуун